亂皂𥴊仔店 ⓂⒺⒾⓃⓀⒾⓄⓈⓀ

若是有人開始 tī 指教我 ê 穿插。

我 kan-na ē 按呢回答：曷無你是想 bueh 按怎？

我已經 uī 彼條牛仔褲換到這條牛仔褲。

原文 --SWR3

對譯這段文章，除了確定我並無 kā「穿插/tshīng-tshah」記 m̄ 著掠外 ，對譯 ê 過程 mā hōo 我發見家己 ê 問題。

進前翁講，德國人食瓜仔哖 kan-na 生食，無摻醬料抑是橄欖油。

頂幾日，伊寄瓜仔哖食譜 hōo 我閣寫講「這看起來蓋好味素，咱做來食好無？」

食譜讀煞隨寄兩張相片 hōo 伊順紲送伊記持「早前有人 tuì 我講，gún 德國人食瓜仔哖 kan-ta 生食，無人 ē 捎來炒菜抑是佮其他物件相拍參」尾句閣無料送伊一句「Ne。」

今仔日這份 mā 是 hōo 伊一路 Ne 到底 ê 生菜盤，我開喙蚶無臭 buē-tàng 隨講「我正經是貓仔食鹽，揣死，歹勢我隨 kā 你換一盤。」

「這隻貓仔食鹽 buē 死，因為我愛食王梨」伊講。

見若 tī「Überbacken」(德文) 佮「Gratin」(英文)，我攏 ē 想咱臺語愛按怎講。

請教 Allwissend 猶原捎無一个摠。

落尾踮《台語活辭典》讀著「鹹焗雞」這个我已經 buē 記得 ê 辭，隨綴 leh 唸喙內 ê 喙瀾 mā m̄ 知發生啥物代誌竟然綴 leh 津。

資料來源：教育部台語字典

樂暢食，快樂剾板膋行到今仔日拄拄好滿 5 月日。

照慣例寫落來做記錄，後日 tsiah 有資料通參考。

體重：保密

煏出來 ê 膩瓤油： 1kg

1. 30日 1.9kg

Bueh「欠錢怨債主，不孝怨父母」進前，誠實愛目睭金金看、張持繩問題。

昨昏，tī Books 揣冊、注文。

一切是過五關斬六將 hōo 我這个電子青盲牛肚臍空插鎖匙歡喜甲 buē 顧--tit。

當我掠做我有法得輕輕鬆鬆行出山海關，彼號 ... m̄ 是講 ē-tàng īng 過數 ê 方式付數？

是按怎這馬點入去揣無𪜶 ê 口座？

翁講食林檎蓋健康，所以愛 bué 一袋2公斤半。

看伊又閣受著價數 ê 影響，我講「你想 bueh 閣耍一斗俗物食破家 ê 活動？」

「我是𠢕扞數 m̄ 是食破家」伊應。

「曷無咱閣來做一改試驗，看 tsiâ tsiah 是彼隻雞」我講。

「好，彼隻雞決定 m̄ 是我」伊拍胸坎掛保證。

林檎 m̄ kan-na 是 lìn-gòo。

Tī 超市 bué 菜，翁看著林檎 ê 價數開始踅唸食林檎 tùi 身體好等等。

「葫蘆墩白米，無糙(錯)，總是你敢有法度 kā 林檎囥甲 bueh 歹去進前就食 hōo 煞？」我問。

「彼曷著問，包穩是食甲清氣啖啖 hōo 你揣無一屑仔肉幼仔通拭桌仔」伊講。

「天公有目喙➀，你 m̄-thang 又閣成做五錢豬仔掛一支喙➁」我 kā 手按一盒六粒裝 koh 盒子セット(setto)甲宛然 Barbie ê 林檎指過。

踮 mplus|云閱讀佮報導者讀著這兩段話，真佮意。

mplus|云閱讀

如果你的靈魂是冷的，你的頭腦是空的，即便自然賦予你美麗的雙眼，也沒有用。

--- Pierre Choderlos de Laclos，法國軍官、小說家，《危險關係》作者。1741-1803

報導者

讀著這篇新聞誠有感觸。

起因，我想著我關掉家己 ê 面冊徙來 gún 翁面冊鵁鴒順便空 ê 往過。

Tī 我猶未參加任何面冊社團，我 ê 面冊信息總是是恬卒卒甲連蠓仔虼蚻攏 bueh 興來蹓蹓(lâu-lâu)hui-hui ê 所在。

尾來接受一位佮伊窮實無交情 ê 生份朋友 ê 邀請綴伊參加伊 ê 社團 mā 自接受邀請揤落去了後，我 ê 面冊 m̄ 捌閣恬靜過。

我無討厭這个改變，起因迵過社團我楦闊我 ê 世界。

聽著議員分張伊 tuì 媽媽講 ê 話，我想--著家己 tuì 媽媽講 ê 話佮伊 tuì 我講 ê 話。

Gún 媽媽講「我真幸福 mā 足快樂有你做我 ê 查某囝，媽媽時間到矣，無氣力通閣陪伴你。」

Gún 某囝手牽牢牢 tshan-tshiūnn 囡仔時伊行到佗，我 kā 伊 ê 手牽牢牢綴到佗，只是這擺我 buē-tàng 閣 tshan-tshiūnn 往過按呢愛哭愛綴路。

「你 m̄ 免煩惱，我 ē 好好照顧我家己，我足愛你」我輕輕唚伊那來那白 ê 額頭，漸漸無氣力 ê 伊喙角微微仔笑，目角滲珍珠。

我輕輕仔 kā 伊 ê 真珠承入手蹄，tsham 伊靜靜等待遐 ê tshan-tshiūnn 纏 tī Sigourney Weaver ê 外星塗婆離開伊 ê 肉體放伊自由。

讀這葩新聞靜甲若以色列死海 ê 心步頻起海湧，並𤆬領我順海湧趨湧到停跤 tī 祖靈身邊 ê 澳洲 tuì 我講 ê 話。

你堅持 ê 代誌有可能無機會結子 mā 有可能從來 m̄ 捌 uī 你停跤。

M̄-koh，信念是一欉樹。

你無 uī 家己栽欉，你 buē 發穎，你 ê 心 m̄ 永遠是渡鳥佮水薸。

所致，請你保持信心佮樂觀，我 ê 朋友。

我 m̄ 是素食者 mā m̄ 是超級食物等等 ê Fans。

不而過，我愛拆白講踅有機店是搜揣菜蔬食譜 ê 好所在。

弓蕉麥片煎餅

...... 材料 ......

頂日，恬寂寂 ê Blog 步頻加足 tsuē 號碼。

我 tuì 翁講「今仔日出現 tsuē-tsuē 德國國旗」。

「按呢誠好，表示你踮德國 mā 有讀者」翁講。

「遮 ê 數字攏是半暝 tsiah 出現」我講。

「遐 ê 是金瓜鬼」翁隨紲喙講。

Bueh 去地下室 ê 洗衫間挈洗好 ê 衫褲 tī 一檈 ê 樓梯間搪著二樓按羅馬尼亞來德國做穡 ê 厝邊 A-Lô。

「Gún 阿母這幾工已經注著肺炎 ê 預防射--ah」伊本底圓甲若15 ê 目愈圓愈透光，本底就若彌勒佛 ê 好笑神 hōo 我這个已經無父無母 ê 外埠人 mā 感受厚厚 ê 幸福佮快樂。

「實在是足讚 ê 消息」我講。

「著--ah，心肝頭 ê 彼粒大石頭總算 ē-tàng 擲挕捒」A-Lô 那講那比十字感謝上帝賜 hōo 伊好字運。

非教徒 ê 我恬靜徛在原位，微微仔笑靜候「Bis gleich」。

我相信鉛粉決定掖有夠深 m̄-tsiah 有法得 hōo 我 tī 網海 tsham 伊相拄搪。

我 mā 相信四常是食食 ê 挵險是四常記持 ê 引𤆬者。

因為伊，gún 翁某做伙牽手踅轉去家己 ê 美國時間。

翁想著彼久伊佮女朋友做伙 tī Las  Vegas 旅行記持，我想著一个人 tī Boston 敨放齷齪 ê 無半隻胡蠅跋落鼎，炒死(吵)死 ê 恬靜。

無𫝛時，無相𫝛所在，𫝛款記持。

Freiheit ist ein Luxus den sich nicht jedermann leisten kann.

自由是麗倒 ê 物件，伊 m̄ 是每一个人攏 ē 提供

--- Karl Max

千年根 萬年藤