亂皂𥴊仔店 ⓂⒺⒾⓃⓀⒾⓄⓈⓀ

(2022.12.25 早起頓 番薯兔仔耳卵生菜盤 + ひき肉白菜焗 + 藍莓檨仔優格/952kcal)

這个世界蓋有意思，假--ê 成做真--ê 四界賴賴趖，真--ê 煞成做墓壙內底喝 buē 出聲 ê 蔭屍，總是成做蔭屍又閣 hőng 割舌 ê 印何闐 ē uì 墓壙行出來，咱人 mā 是。

早前踅唸看無家己 ê Blog，這久 m̄ 知啥物因端 hōo 我一𫝻隨看著家己，只不過活到這个歲數我真好玄 gún 阿母當時「抱」兩个我出來？

總是，我真清楚阿母無雙生仔我 mā 是 sóo-tí m̄ 免夯枷去考究。

Tshan-tshiūnn tī 希臘 bué 鉸刀，我看著 tsham 德國一模一樣 ê 雙生仔我 mā 知影彼 m̄ 是按德國 Solingen 來 ê 彼對雙生仔。

起因，一般無啥病痛 tshan-tshiūnn 老倒退 ê 人，無人 ē kā 家己 ê 名寫 m̄ 著掠外 mā buē 烏白寫家己 ê 家甲。

感謝 tsa̋ng ê 無張持，因為伊引𤆬我按罩霧行出來。

雖罔我看伊看甲足扴目，我 mā buē 閣綿精往過那看喙那詬唸「呔有人 ē 遮爾仔 buē 見 buē 笑」，這久 ê 我 kan-na ē 徛踮門口埕瞭就隨斡頭去別搭行踏。

(2023.10.31 早起頓 Hello, AMERIKA + 圓茄烘+ 莓仔 Quark/1030kcal)

捌字 ê 人笑 m̄ 捌字 ê 人講，你 ê 話是舊漚舊臭又閣兼無衛生 ê 物仔 m̄ 是文化。

早起頓攢好勢喝猶原 黏 teh 眠床頂 ê 翁「你 ê AMERIKA 已經款好--ah」，話一落塗我隨感覺佗落 m̄ 著。

那食早起頓那搜揣問題猶原揣無隨 kā 問題擲 hōo 翁「AMERIKA 是英語抑是德語？」

「德語」伊講。

「你確定」

「Tsiâ 是德國人」

聽著這句話隨笑出來「我雄雄感覺 AMERIKA tshan-tshiūnn 火燒豬頭遮爾仔面熟」。

（2023.03.19  早起頓  菠薐仔塗肉林檎 + 魚指 + 果子優格/955kcal)

龜山誠實 ē 越頭，雖罔我 m̄ 是素食者。

M̄-koh，自囡仔時我就無啥 teh 食肉，無啥 teh 食肉 m̄ 是 gún 兜散赤無錢通 bué 肉來食，是我個人自細漢就愛食豆腐做 ê 物食。

因為這个意愛致到見若 tsham 朋友做陣去自助餐買晝抑是 bué 糋路佮我較無遐爾仔熟 ê 朋友攏 ē 掠做我是歹勢 tuì 𪜶講我食素，sóo-tí 綴𪜶食鼎邊素。

我 ê 頭家，gún 翁。

伊是無肉、無パン、無馬鈴薯、無チーズ就 ē 感覺腹肚空空生活無味無素 ê 人。

我是無肉無要緊，食パン ē-tàng m̄-koh 無法度逐日食 3 頓閣兼 Ka-pi 時間(Kaffeezeit，下晡茶，Tea time) tshan-tshiūnn 𪜶老母按呢，tuì チーズ mā buē tshan-tshiūnn gún 翁見著豆腐隨著猴詬詬唸，總是チーズ m̄ 是我自細漢食甲大漢 ê 物食 sòo-pái 愛看款，若是馬鈴薯我就 tuì 伊一點仔意見攏無。

兩个淡薄仔 bueh 相𫝛又閣無相仝 ê 脾土 bueh 按怎調整 tsiah 有法得互相平和做陣行仝條線，因由愛我調整家己 ê 脾土成做 gún 翁𪜶爸母 ê 方式，一個逐日起童來得著權利，一個逐日 kā 目屎按腹內食來保持 gún 是幸福翁某 ê 假影過日子，愛我按呢過姻緣也是 kā 伊放水流較自在，畢竟爸母無法度家己選擇，總是牽手是咱家己選，這个 buē 合猶閣有其他 ê 選擇 m̄ 免纏綴紅色高棉「卵臭臊照食」。

(2022.10.31 早起頓 洋刺波優格/199kcal)

Tī Balkans 看著一四界 ê Pan con manteca y azúcar gún 翁遙念 ES 日子，我想著囡仔時上無敆脾土 ê 麭。

伊想 bueh hōo 某感受 Pan ê 好滋味骨力揣資料原仔是火燒罟寮，無網(望) ，不而過彼久踅網路 ê 跤跡成做番薯 kah 月桃掖落塗 ê Pan 引𤆬 gún 行向閣較豐沛 ê 生活。

這原仔是按 Pinterest 看來 ê 圖原仔 m̄ 知伊誠實 ê 滋味，總--是家己照圖變一份來食有一種 buē-su 家己是 Sherlock Holmes 佮 Arsène Lupin ê 膨風。

另外，見寫著「刺莓仔」就 ē 想著讀過 ê 這段話「較無法度成做大貨色 ê 青瓦厝 ê 安妮」。

我 m̄ 是文青高智識份子，我 tuì 啥物款 ê 書(文青愛講書 buē-tàng 講冊)佮作品 tsiah 有法度成做大貨色無彼个才調指指揬揬講東講西，總是我誠愛《青瓦厝 ê 安妮》。

《青瓦厝 ê 安妮》

(2022.10.26 早起頓 酸 Khu-lì-mù 搵醬/172kcal)

一直掠做我 ê Blog 有鬼。

按呢講家己是較龜怪，總是我又閣揣無一絲線頭通解釋我這 hőng 投講 m̄ 知 tī 寫啥物碗糕 ê Blog 三不五時猶原有人來踅 hōo 我好玄甲一直按磅空行。

不過，m̄ 管我按怎行按怎走我猶原 tī 磅空底 m̄ 捌行出來。

總是，一粒石頭(Einstein)有講過，時間是品質上讚 ê 篩斗，伊 ē uī 咱篩選㧎牢 ê 問題。

Tshan-tshiūnn 這久 m̄ 知 uī-hô 又閣雄雄感覺家己閒甲 ē-tàng 掠蝨母就隨請教 Google 這个問題。

Google hōo 我足詳細 ê 答案，總是我頇顢讀無。

不過，我有搝著線頭。

(2022.10.28 早起頓 洋刺波早起頓 + 青花仔菜雞肉麵/855kcal)

青盲 牛 m̄ 驚生驚

Tī 愛料理寫這篇食譜想著這篇隨捎出來改，起因車日子 ê 彼段時間 kan-ta tī 奧地利讀較有目睭看著 ê 文字賰 ê 齊齊是 m̄ 捌字看告示，總是我 mā buē uī-tio̍h 這款代誌 tī 遐 m̄ 捌戲文，大氣捎咧歕，起因 Google 窒倒街，靜候我去踅。

2020.05.22

這久越頭轉去看彼久 īng 青盲牛 m̄ 驚生驚 ê 態度讀作者分享 ê 食譜正經愛 kā 家己拍噗仔，因由看無字就請教字典教咱字 buē m̄ 捌字，看告示，我想這佮我無想 bueh 迵過寫食譜得著啥物蓋有關係。

 雖罔，我確實捷捷 hōo 生份人講甲憢疑家己寫字正經是有目的，不而過，m̄ 管我按怎綿精綴𪜶踅金龜磨我猶是 A-ta-mah-khòng-ku-lì、頇顢閣小面神 ê 性地 m̄-koh 知影愛按怎敨繚索，sòo-pái 時間一過我就 buē 閣繼續佮遮 ê 五四三膏膏纏。

雖罔，我 ê 德語到今猶原 tī 路頭 hōo 做出來 ê パン抑是食物捷捷出箠，Iáu-m̄-koh 遮 ê 一切猶原比硬 bueh 成做十个臭頭，九個破豆 m̄ 捌假捌閣較好。

 (2022.10.28 早起頓，青花仔菜雞肉麵佮甜路/855kcal)

踅 Bosch ê Simply Cookit 看著這篇材料攏齊全 m̄-koh 無鼻著火燒過 ê 厝(味)想 bueh 換位搜揣靈感無張持𫝻著四常 buē 讀 ê 部份 -- 評價隨揣著火燒過 ê 厝(趣)味 mā 決定隔轉日 ê 早起頓就是這味。

只是我誠好玄，我是受著啥物因端 ê 影響雄雄 tuì 伊產生遮爾仔大 ê 趣味，總是黛安娜已經拍獵拍甲深山無見光，我 ê 目睭 mā 揣無光，時到阿波羅就會來炤(tshiō)光，隨 kā 資料收好纏綴日本電影ゆめ揣夢。

我 ê 作品無照起工行，不過滋味 hōo gún 翁呵咾甲我掠做家己是總舖師又閣 buē 記得愛搜揣好玄。

不過，記持 tshan-tshiūnn 胃 teh 拍鼓 ê 貓，時間一到 m̄ 免我發聲自動行跤到。

Tsham gún 翁做陣去 Česko 行跤花攏 ē 先買這粒パン 來補數念，紲落來 tuì 家己講轉來德國決定愛家己烘一粒來食。

只不過，見若離開  Česko 轉來德國伊隨成做囥踮博物館 ê 恐龍，緣到 tsiah 閣相見。

這回面冊 ê 生份人青磅白磅捎德國新婦分張 ê 「德國麭」食譜愛我回答伊 ê 問題。

(2022.10.26 早起頓 洋刺波寮仔 Tshì-sù)

本底無想 bueh 閣踮愛料理(I-cook)寫寡啥，起因我又閣想著我無納錢 hōo 人。

我知影 bueh 解決這个問題真簡單 --- 納錢成做 V.I.P 問題著 ē 解決，總是我就是迒 buē 過這个崁 --- 我啥物冊攏想 bueh bué kan-ta 菜譜冊抉 buē 落手，簡單一句，隨人有隨人 ê 脾土佮問題，清楚家己 ê 問題並解決問題比綿精綴問題踅金龜磨閣較重要，雖罔到今我猶未揣著合家己 ê 解決方法，總是我 mā tī 挐氅氅閣拍規毬 ê 膨紗球內底揣著摠。

現此時 ê 我是按怎愖家己 ê 問題，愛料理是無感情 ê 文字記錄，遮是有家己認真揣問題、愖問題、討論問題 ê 文字記錄，這久就先按呢，未來 ê 毋知就交 hōo 未來去處理。

𫝛款，紫色 ê 字辭攏是按公視台語台辭庫網讀著 ê 新辭。

(2023.01.17 早起頓 Bé-khòng 梨仔金瓜サラダ + 雞肉サラダ + 青豆仁湯 + Stippmilch/933kcal)

後台原仔有 tsuē-tsuē 食譜，總是這久 ê 心情 tsham 彼久 ê 心情已經無相𫝛，sóo-tí buē 閣想 bueh 繼續寫食譜。

不過，食食 ê 相片猶原愛翕。

我想愛翕 ê 緣故應當是迵過相片 ē-tàng 發見家己 ê 食食變化 mā ē-tàng 發見家己自寫 Blog 以來 ê 改變。

清彩到計較，計較甲學習按怎搝絚佮放冗。

青豆仁湯

...... 材料 ......

(2023.04.01 早起頓 魚指金瓜菜蔬盤 + 圓茄烘 + 草莓杏桃 Yogur/1005kcal)

行跤花期間我認捌著這件代誌，我哭呻別人 ê 華語有問題窮實是我家己有問題。

起因，我讀無這本 tsuē-tsuē 人講「如此文筆可驚天」 ê 華語小說.......

《殺鬼》

㊔ 甘耀明

㊓ 寶瓶

一日讀《台文通訊Bong報》〈 看無台文 ê 人看台文 khah 無〉，其中一段寫著華語作家王文興kā《背海的人》敨放我 ê 鬱卒。

Graz 重要地標 Schloßberg(城堡山) ê 鐘塔

凡勢是厝邊歷史文化又閣厝瓦相扯，所以翁 tuì 奧地利是鼻無鳥鼠味

Vielleicht weil sie eine Nachbarin war, war mein Mann weniger an Österreich interessiert.

Mur 河 ê 出名地標 --- Murinsel(Mur 島)

我 mā tuì 這个佮德國文化、食食、建築 bueh 相𫝛 ê 角勢 mā 看甲𤺪 tàu-tàu

Und ich interessiere mich nicht für die Kultur und Architektur, die Deutschland ähnlich ist.

(2023.01.15 早起頓 敏豆雞肉炒 + Kam-má-tooh Pesto I-tá-lih 麵 + 檨仔瓜仔哖生菜盤 + 檨仔時計果優格/854kcal)

有 ê 物件斷 buē 掉，像清飯 ê 滋味。

有 ê 物件離 buē 開，像這篇舊文 ê 數字。

有 ê 物件擲 ē 掉，像這篇舊文 ê 食譜 m̄ 管我按怎放火燒厝 hōo 伊較有厝(趣)味一寡，總是我猶是見看見𤺪。

換食譜，食譜果真 mā 是愛情。

雞肉敏豆炒

...... 材料 ......

(2022.10.23 早起頓 魚指馬鈴薯サラダ/676kcal)

出門行跤花前幾日，m̄ 知啥物因端我 kā gún 翁借我讀資訊 ê 面冊口座刣掉。

這久搜揣彼久 ê 心情猶原 m̄ 知為何刣掉，sóo-tí 這久 ê 我 mā-buē 閣想 bueh 繼續探討。

總是，這件代誌影響著我。

出門前，我佮電腦差不多是一日貼貼，特別是為著 Blog。

雖罔我非常清楚我寫 Blog ê 目的是為著啥物，iáu-m̄-koh 我猶原 ē 對家己情緒叨撚認為逐日無寫一篇誠對不住家己。

出門後，tsuē-tsuē 所在攏有網路，我煞 m̄ 捌 uī-tio̍h 無寫 Blog 感覺對不住家己，是啥物因端致使我有這个改變我誠好玄。

我認真愖認真稽考，最後得著這个答案。

(2022.10.22 早起頓/783kcal  番薯簽佮酸 Khu-lì-mù 搵醬)

我相信性命家己 ē 揣出路體重 mā 是。

自2月28磅仔 ê 數字出現51.9 to m̄ 捌閣出現低過 52 ê 數字。

這个過程 hōo 我誠齷齪，總是我 mā 誠清楚身體有伊家己 ê 決定我就隨緣。

10月21日出門三個月轉來 ê 第二工，gún 翁講三個月 kan-na tī 匈牙利磅過一改體重 m̄ 知影現此時 ê 冗剩(牛仔褲)敢是真 ê 冗隨磅體重喝講比出門前閣較減 2kg 左右。

聽伊按呢喝我 mā 足想 bueh 知影家己體重 ê 變化，因為本底囊 buē 落去 ê Tom Tailor tī 行跤花 ê 第三月日左右步頻囊入去而且閣冗冗一屑仔攏 buē penn-penn 隨綴 leh 徛起去磅仔頂。

夭壽骨，我 mā 減 2kg 外。

我 m̄ 知影這 2kg 敢是我 kā 體重放外外 ê 關係，總是我足清楚 tī 這段時間我 buē 因為一頓食甲傷 tsuē 隨禁嘴兩工 tshan-tshiūnn 少年時按呢苦毒家己，我猶原照起工來食逐日食2000kcal 左右。

IG 出名貓

踮遮搪著這隻貓，想著烏山彼隻 buē 記得 kā 翕相 ê 古錐貓

隨撨位揣角度 kā 翕相來滿足我 tùi 烏山 hit 隻貓 ê 數念

Tī 我猶原 tī 搜揣手機仔，一聲伊有 IG 佮其它社群媒體通 hōo 你欣賞按耳空鬼仔飛到烏目仁

步頻想著，Heh--ho͘h！自阿爾巴尼亞我若成無閣見著一堆雙生仔

這个想法 tsiah 敢若圓仔拄 bueh 烰按呢，雙生仔若鰮仔魚開始出現

「你 tùi 你 ê 迷眾人數敢有滿意」我問貓

貓無回答