亂皂𥴊仔店 ⓂⒺⒾⓃⓀⒾⓄⓈⓀ

虎來，虎去，虎心情

新 ê 一年想 bueh 做 ê 代誌，猶原 tshan-tshiūnn 頂年挲好猶末落鼎烰 ê 圓仔相𫝛。

Hōo 家己感覺誠有活力。

M̄-koh，今年我學著凡事愛節力，萬項 tsiah-ē 好來好去 buē 磕 buē 著就齪心。

另外，有節力烰出來 ê 圓仔 m̄-tsiah ē hōo 家己 tuì 家己褒唆講 m̄ 是我賣茶講茶芳，賣花講花媠。

Der Weg stellt jedem nur eine Frage:

這條道路 kan-na ē 問這个問題: 

" Wer bist du? "

你是 tsiâ？

虎年，好字運

虎咬豬，虎你幸福。

二九暝，食譜寫煞準備 bueh 揤計算機。

The Piano(鋼琴師，華：鋼琴師與她的情人，1993) 樂音佮 Ada 綴鋼琴做陣摔落海底 ê 畫面浮在眼前。

圇出去 ê 手伴頂月眉 ê 峇微笑圇轉來。

我 ê 意志選擇我 ê 生活，

Mein Leben ist so schön, weil meine Frau weiß wie man das deutsches und französisches Essen kocht.

Poulet à la Basquaise, mann!

Super lecker, besonders Paprika ist nicht mehr der Feind！

我 ê 四常有夠幸福，gún 媠某 m̄-nā 𠢕煮德國料理，連法國料理 mā 是煮甲一粒一。

--- Mayo

翁有一个朋友願意行踏東爿就是 m̄ 願行踏𪜶家己厝內 ê 東爿。

一回翁某做陣去𪜶兜做客，聽伊分張伊佮男朋友行踏柏林 ê 感受 hōo 我一直想 bueh 開喙，總是我清楚知影我講出去 ê 話 tuì 伊是六月蚶 ê 臭，就綴東柏林成做伊 ê 新婦仔恬靜按呢聽伊講故事。

「M̄ 管是 DDR、BRD、Preußen 攏已經成做是歷史名辭，恁朋友煞猶原 teh 佮遮 ê 歷史計較，車到遐是 DDR 愛翻頭轉來 BRD 是有遐爾仔痴迷 Deutschland 83~89 是 m̄」我講。

翁無應話起因早前 ê 伊 mā 是𫝛款 ê 態度「Wir sind das Volk」kan-ta tī BRD，總是我 ē-tàng 理解翁彼久 ê 想法，畢竟伊成長 ê 環境是冷戰年間 mā 無親人 tī 東爿，伊 tuì 德國 ê 想法就 tshan-tshiūnn 我囡仔時搪著 tsuē-tsuē 排斥按中國來抑是芋仔番薯 ê 人相仝，有伊固定按教育來 ê 想法。

是講，呔 ē 無事寫翁朋友 ê 代誌？

舊年寫踮面冊 ê 文章，今年 tsiah 踮遮揣著伊。

這久破這粒豆，gún 已經 mā 按 Danzig 轉來德國 bueh 半冬，時間正經是，一晃過三冬，一晃過一世人。

頂幾日踮線頂踅 Danzig，我 tuì 翁講「按呢講誠無禮貌，總是恁柏林 ê 䆀有伊 ê 因端，猶 m̄ 過柏林就 tshan-tshiūnn 恁家己講--ê，伊誠無德國。」

奧地利 ê 維也納真猶 thài。

有德國味 iū-koh 大部份 tī 外埠，tshan-tshiūnn 但澤(Danzig，德文)。

翁無 tī 厝 ê 早起頓竟然比伊踮厝閣較僫款，不過 m̄ 管僫款抑是好攢，我猶原意愛食燒唿唿、熱 phut-phut 又閣 ē 哽胿 ê 早起頓，抑無規日 ē 成做鴨母喙叨仔叨。

總是這斗 mā 笑詼，翁 ê 便當攢好勢煞換我踅神 m̄ 知愛 uī 家己款啥物款 ê 早起頓隨反紙條揣記持 tsiah 發見，我 mā 得著阿母症凡事 uī 囝兒設想煞 buē 記持家己 ê 需求。

 這 buē 挃--leh，照顧伊 ê 需求 mā 愛照顧家己 ê 需求，特別是食食這項，我若繼續按呢 uī 伊設想無戰車基因 ê 我 m̄ 免三冬，一冬就隨做半丁。 

煠越南米粉?

食甲淡薄仔𤺪。

新 ê 一年，心 ê 過火除了敨掉遐 ê m̄ 知愛按怎講 ê 龜怪掠外，我 mā 有氣力面對家己 ê 驚惶，孤單一个人。

我 m̄ 知影我是按怎步頻有氣力面對這个問題，總是我一直相信困擾 ê 世間事，只要家己願意面對這時 ê 捎無摠，無代表永遠捎無彼个寮仔門。

我 m̄ 知影 gún 翁敢誠實理解 gún-ê 問題，畢竟我 buē 慣勢 ê 問題無表示伊 buē 慣勢抑是感覺𪜶，𪜶爸母徛 m̄ 著位。

新 ê 一年閣熥遮 ê 清飯實在足厭(ià)𤺪，不過我清楚家己 ê 想法好過成做𪜶老母 ê 副本，掠做天霸王逐家攏 ē 寶惜伊 ê 無見一人 bueh 佮伊徛較倚 ê 一日到暗若茶鈷按呢四界呻 hőng 聽閣無應效。

翁猶是人徛倚 m̄-koh 心 m̄ 知飛去佗落去，兩个囡仔有法度莫佮𪜶見面就莫見面。

2021年兜發見定期 ē 過數 ê 健保費無閣過數想 bueh 敲一通電話轉去健保局請教，總是我這个真愛看範來決定一个錢愛拍幾个結 ê 人一想著 uī-tio̍h 健保敲一通國際電話就隨放棄。

M̄ 是講我無照規矩來行抑是無尊存臺灣法律，是我真清楚我 ê 國健兩保是按怎納數，sóo-tí 無過數 ê 半冬猶原無收著銀行佮國健兩保 ê 通知，這表示我無問題。

自交往到成做龍鳳，猶未行到有翁某名無翁某行，總是 mā 行到內心親家，無話講松柏瘤 ê 坎站「真久無看數，今仔日上網路看數 tsiah 發現我 ê 國健兩保真久無人來收」我講。

「你呔 ē kā 遮爾仔重要 ê 保險停掉」講著錢比我閣較𠢕拍結 ê 翁講。

出喙進前我已經知影伊決定 ē 按呢講，總是人喙上毒，比刀較利，你曷 m̄ 是 m̄ 捌𪜶某做代誌 ê 態度就按呢含血霧天驚我 kā 食倒擔「我無遐爾仔 Àu-tah，放心」我應。

2022.01.23 是我第一斗將白話字(POJ)文章讀透透。

雖罔，讀讀 ê 過程猶原是比讀讀德、英文較食力閣較慢，總是有法度通篇讀完，這个改變 hōo 我規仙人歡喜甲 m̄ 知 bueh 按怎形容。

不而過，我清楚知影我做到我口、我寫、我讀。

這款感覺實在是比得著頭獎閣較歡喜。

台灣教會公報 Thàu-chá sî ê Sin-gán-kong

近來有朋友 iōng 語源 tuì 我講，我 buē-tàng 使用這段話來表示，我面對「五四三」ê 態度。

我 m̄ 是語言專家 tuì 語法無了解，我 kan-na 有法度恬恬 kā 教典 ê 網鍊分享 hōo 伊罔做參考。

我 m̄ 知伊敢有參考，總是 kā 伊寫甲 buē-su 我專長 ê 臭跤帛讀煞，我想著 gún 媽媽蹛院佮入塔彼日 ê 故事。

有醫護人員若藥店甘草，逐項攏摻著 ê 雜插，醫生話猶未講 hōo 齊伊若鼎頂 ê 狗蟻 - 趕出喙「恁媽媽是神仙行跤到 mā 無應效 ê 無效，你 m̄ 通閣按呢浪費醫療資源」。

聽伊按呢講，我若啉滾水囥茶米茶仝款 ê 火大 mā 想 bueh 提醒成做六月蚶，開喙臭，總是這款小管仔花枝無血無目屎搪 tsuē 我 mā 清楚知影 gún 老母佮我無一个人浪費醫療資源，gún 完全照醫生 ê 專業治療病症，隨 kā 這六月無洗身軀臭死人 ê 護理師擲一爿，恬靜等待醫生𫝺消毒水。

德文 ê 搬厝有 tsuē 種講法。

頂站仔收著按《聚珍臺灣》佮《臺灣 ê 店》寄來德國 ê 包裹，那簽收包裹 mā 那讀郵差手指 ê 批囊「𪜶已經 Umbringen(自殺)--ah」我講。

郵差究竟是搪過 tsuē-tsuē 龜叨鱉趖 buē 清彩就 hōo 我驚著，伊繼續繩(tsîn)批桶字姓講「這馬綴 ê 人是這个姓？」

別人 ê Iphone 是 15 我 ê Iphone 猶是若1 teh 寶惜佮使用，這久 ê 我總算想著我 ka̋ng 講做「𪜶自殺」隨 bueh 解釋，總是 lú bueh 解釋 lú 想 bueh 出彼句「搬厝」愛按怎講，吐一氣大氣換上簡單 ê 方式「Nachhause」。

郵差先生聽我按呢回答隨知影意思，微微仔笑講「Danke」tī 批囊寫字紲落來 tìm 一下子頭說相辭。

翁問我「你呔 ē 無想 bueh 領稿費？」

「捐 hōo 基金會做肥底，雖罔無 tsuē」我講。

「德國有一个水上救難隊，𪜶足好額 mā 四界募款」翁講。

「民間救難隊本底就足燒錢，需要資金」我講。

「按呢講是無 m̄ 著，m̄-koh 𪜶講 ê 故事並 m̄ 是𪜶講 ê 按呢」翁講。

凡勢是 tsham 德國人盤撋久，往過 buē 掛心 ê 代誌，這久 m̄ 免家己拍招呼，伊家己 mā-ē 成做面冊 ê 臆你有興趣家己自動出現 tī 腦海。

戇猴搬石頭煞 tsiah 知影愛愖這件代誌，攏是代誌 tsham 人講定 tsiah-ē 請人寫基本資料.....

一愖著這件代誌，我隨交懍恂 mā 搭家己 ê 胸坎閣伸手請雞𧉟神轉去食家己，起因我 m̄ 免 uī-tio̍h 這件代誌擘腹。

我無照對方 ê 要求寫誠實 ê 家甲 hōo 𪜶，這久正經愛講，慣勢寫德國地址誠實有幫贊。

是講，這件代誌 mā hōo 我學著，準做別人無 tuì 咱情緒叨撚，咱家己 mā m̄ 通 tuì 家己情緒叨撚。

這幾日因為預防射規仙人𤺪 tú-tú，m̄ 是䖙 tī 眠床就是佮往過無啥交插 ê 電視膏膏纏。

Mā 凡勢是這斗有較纓纏，sòo-pái 我有較斟酌繩(tsîn)變化，這久 m̄-tsiah 有物仔 thang 寫。

越頭看往過 m̄ 知是德國人 ê 本性或是前兩斗 ê 教示有教入心，sòo-pái 現此時 ê 德國人誠愛翻頭揣向時。

這幾日看講笑詼 ê 節目，有一段 hōo 我笑甲軟骨 mā 想著德文老師 ê 分享佮 Hesse 寫 tī Demian ê 故事。

笑詼第一斗放送時間是 1970年彼跤兜，內容是神父 tī 街仔路搪著 bueh 去學校 ê 囝仔。

Das ist zum reinsetzen

好食甲喙舌觸 buē 離

拜六，歇睏日。

翁某做伙食早起頓，翁雄雄發出這句話 hōo 我心花開。

不而過，我六月蚶，開喙臭，無成做日本剾刀規身軀 ē 起清瘼。