Tī 捷克第二大城建城 mā 千外冬 mā 是 UNSECO 會員 ê Brno 拄好搪著翁減肥一日月 ê 結算
翁 uī-tio̍h 磅仔 ê 數字 tī 結算頭一日 mā 綴 Brno 捎帕仔妝娗伊 ê 光焱焱
M̄ 捌字 mā 無看告示 ê 我掠做 Praha 是捷克行政機構主要徛地，事實是 Brno
翁 mā 掠做伊 tī 秤磅落昨日綴 Brno 成做我 m̄ 知 ê 智慧，伊就 ē-tàng 按講
你看，我窮真是海翁 m̄-koh uī-tio̍h 大局我甘願成做厝鳥仔一隻 tī 三方戀情 ê Osla 開始噤喙
按呢 ê 偷食步確實 hōo 伊得著食秤頭 ê 媠 -- 74.8kg
這款臨時臨曜 ê 噤喙兼喙白敆進前無喙白無噤喙 ê 快樂豬仔人生 ê 二月日
(2021.12.19 下昏飯 馬鈴薯泥)
小馬兄是阿奧紹介伊來 gún 兜借蹛 ê 英國少年家。
伊 tī 英國請教蹛佇泰國 ê 阿奧，佇臺灣敢有當地人 ê 厝通借蹛幾日 hōo 伊 ē-tàng 閣加儉寡旅費。
阿奧就紹介伊來 gún 兜借蹛幾日，這久 ê 我 m̄-tsiah 有機會寫故事。
小馬兄按下港上北來到 gún 兜人已經著風邪，孤一人踮他鄉，地頭生疏 m̄ 敢行藥房就放風邪按淡薄仔拍咳啾到嗽 buē 離。
小馬兄本底想 bueh m̄ 捌字，看告示家己伊沓沓仔行到 gún 兜，因為風邪纏綴 hōo 伊上北進前寫張電子批 hōo gún 請教 gún 敢 ē-tàng 去公車牌仔遐接伊，這當然是 no problem at all，翁就順伊通知 ê 車幫綴 Bá-suh 出入站 APP oo-tóo-bái 騎 leh 去車牌仔遐 kā 伊接轉來。
彼陣 ê 臺灣節氣雖罔是大雪，不過溫度原仔若立夏(li̍p-hā)燒烙 ê 20 度 hōo 我隨 kā 紅面 ê 伊掠做是七月就紅絳絳 ê 林檎。
(2022.05.29 減肥下昏飯 橐袋仔麭 . Pita。中東口袋餅)
「話是風，字是蹤」佮人加話看 tsiâ 較𠢕一粒田螺煮九碗湯，不如揣答案。
因為翹頭查某我揣著掠做 phàng-kìnn ê 相片，因為 Muse 無 bueh 來泡茶，這久 ê 我捎無菜頭摠通挽就巡菜股翻田塗。
有 ê 菜股整甲媠噹噹，有 ê 菜股是稗(phuē)仔稻仔分 buē 清就據在𪜶生湠 --- 性命家己 ē 揣出路 tshan-tshiūnn 這菜股(麭.Brot.Bread)頂日仔 tsiah 整過，這久又閣踅翻頭整一擺，正經是食飽換枵，不過我愛我 ê 一尾蟲掠來尻川擽。
麭 tuì 我來講食無路，總是阿母有交代咱佮人牽手，咱愛入人門，順人意並尊存人 ê 一鄉一俗，sóo-tí 有一段時間我真骨力跟綴德國人食麭過日子，總是脾土這款物件就敢若離鄉，無離腔仝款，僫改。
豬屎籃仔 kā 提出來展一下 --- 進前做 ê 生鍋優格麭。
過了代 ê 食食歷史 m̄ 免咸豐三，講到今，不過我 tuì 華語講 ê『中東口袋餅』真有興趣，想 bueh 知影伊是按怎 hőng 翻譯做「餅」。
(2023.04.10 早起頓 牧羊人 Tshì-sù Pide + 卵包 + Bé-khòng + 兔仔耳紅菜頭生菜盤 + 檨仔優格/1021kcal)
那巡菜股那薅華稗(phuē)仔，我又閣成做一隻貓想 bueh 知影德文 ê Hirten，英文 ê Shepherd，華文 ê 牧羊人ㄇㄨˋㄧㄤˊㄖㄣˊ，Blog 跟綴線頂辭典寫 ê「看羊仔人」敢有新 ê 講法，起因「看羊仔人」這个辭目正經無敆喙斗。
教典自 2023-6-13 改版辭目新添 250 條到這久 ê 300 條，教典猶原若《倒風內海》沙喃 ê 族人 kā 人做犁翻田塗，自熟似教典就較罕得請教 ChhoeTaigi找台語 tī 這倚 bueh 2 冬 ê 這久閣 kā 伊請教一斗，當初這條「看羊仔人」辭目已經無法度再相見，換另外一个新朋友 hōo 我雙跤踏雙船，心頭亂紛紛，起因 tī 維基辭典 我 mā 揣著「牧夫/Bokufu」這个按日文來 ê 講法。
當心頭亂慒慒 kā 字唸出喙是上好 ê 解決方式。
牧羊人 Bo̍k-iûnn-jîn，綴愛台語 ê 發音唸，真紲喙。
牧夫 Bo̍k-hu 礙虐兼咬舌。
教典是沙喃 ê 部落，Google 是自荷蘭人行踏倒風內海 ê 萬千百樣。
(2024.03.31 早起頓 漢堡煎魚盤 + 菜蔬烘 + 藍莓俗麭 + 優格/1100kcal)
一直有這个慣勢，看佮意抑是有興趣 ê 物就 kā 楔一張紙做記號。
這出菜自德國宣佈封城 hōo 我楔一張紙做有興趣料理 ê 提醒到今 m̄ 捌反過一斗，主要 ê 因端猶是網路太利便，利便甲準做食譜冊有媠媠 ê 相片 mā buē 起心動念 kā 翻一个仔身。
總是，網路猶是較攑香綴拜相趁相喊 ê 環境，一出菜準做美味しい無數字 kā 伊鬥讚聲，準做媠甲若玫瑰猶是比 buē 過圓仔花 ê 無較縒。
DAS GOLDENE KOCHBUCH 食譜冊是 tī 遮登記家甲市政府送 ê 伴手禮，菜譜百樣豐沛不過無啥相片就 hōo 我一直冷凍 tī 廚房 ê 冊櫃。
疫情進前猶有手面趁食通倚靠 ê 我，因為無法度閣自在冇手 tī 網路隔海款菜就開始綴廚房 ê 食譜冊行尞行跤花，這出菜就是按彼當時行出來 m̄-koh m̄ 捌綴 leh 栽 ê 一蕊花。
這站仔 tuì 三頓攏纏綴網路栽花栽欉感覺薄略仔𤺪就踅翻頭請教遮 ê 食譜冊，那讀遮 ê 食譜冊，我 mā 那發見家己 ê 紅龜 teh 生蟲，真龜怪。
我無法度斟酌甚至撥寡耐性 hōo 網路作者綴𪜶 ê 舌綴𪜶 ê 脾土成做一隻貓綴 leh 好玄行跤花，當遮 ê 舌遮 ê 喙斗成做厝瓦相扯 ê 食譜冊，我真享受佮𪜶敆一杯茶沓沓仔行尞，這个發現 mā hōo 我踅翻頭愖另外一个症頭，我無法度聊聊仔綴網路百樣信息行尞抑是勻勻仔讀一篇網路文章，m̄ 管啥物文體。
(2023.04.18 早起頓 小白銀卵燥𫝻 + 焦麵 + 敏豆炒/755kcal)
M̄ 知影遐 ê 經過無四序 ê 人敢 tsham 我相𫝛，過了代 ê 代誌窮實原仔記牢牢，只不過 buē 刁工 kā 伊記甲清清楚楚 tshin-tshiūnn 數字。
這个現象是刁故意佯戇抑是激怐怐(khòo-khòo)，我家己窮實 mā 㨨無一絲仔線。
四常五四三鏨好勢，準備 bueh 𫞼出門品並，彼隻 m̄ 知走去佗落 ê 鹿仔按我 ê 頂腹蓋大力挵落去 hōo 我 m̄ 知 bueh 按怎止疼，就順這个疼做 Yoga --- Inhale, Einatmen, Exhale, Ausatmen 來捊若 hōo 海風吹甲自動成做毛(mn̂g)尾仔 ê 情緒。
今仔日是 9.21，一目𥍉 mā 22 冬，二个失去老母 ê 1歲佮3歲 ê 囡仔 mā 已經轉大人，一个查埔人 tī 某綴大牛換肩換去塗州，保險金遮 ê 一領 mā 隨 phàng-kìnn 有緣佮伊再相見，伊 ê 身軀邊 mā 已經有一个 buē 曉講咱話敆一个紅嬰仔 kā 阿母講「這是我 ê 囡仔，恁 buē-tàng kā 顧，我 bueh kā 𪜶𤆬走。」
阿母講 hōo 我聽 ê 悲傷原仔活跳跳，總是我 tuì 彼个二姊家己選擇 ê 查埔人無咸豐三，講到今 ê 興趣。
起因，囡仔本底就 m̄ 是我 ê，我 mā 相信性命有伊家己 ê 安排 m̄ 免我插手，只不過這个心領(líng)神悟(gōo) m̄ 是莫捎就有，sóo-tí 這久 ê 我正經愛 kā 家己拍噗仔。
「當我情緒落崎，我攏想著你，想你按怎行過彼條路，你若鮕鮘 ê 性命力成做我現此時 ê 見本，提醒我家己世間無啥物迒 buē 過 ê 情緒」
(2024.03.29 早起頓 美國茄ひき肉雞心豆 Kari + 草莓鱷梨仔生菜盤 + 洋梨仔俗麭 + 優格/954kcal)
疫情期間 bué 著一月日食到飽 ê 連鎖飯店優惠票就隨出門四界蹛。
這本食譜冊就是疫情期間 tī 徛位踮萊茵河彼搭，一間四星飯店附近田庄紮轉來 ê 食譜冊之一。
講之一是因為我 m̄-nā 紮一本，是紮足 tsuē 本，只不過押尾留踮廚房冊櫥 kan-ta 賰伊一本，賰 ê 又閣 kā 伊送轉去 gún 遮 ê 公共冊櫥 hōo 伊有較 tsuē 機會 tsham 人結緣。
我 bué ê 冊習慣，除了無愛 bué 有一仙人成做冊皮掠外，食譜冊 mā 是其中一項，這个慣勢凡勢是按 gún 老爸遐來。
囡仔時老爸𤆬我去冊局 bué 冊，伊攏會講「bué 你讀了 ē 閣繼續反 ê 冊」。
囡仔時 m̄ 捌伊 ê 14 kan-ta ē 曉認為伊是柝(kho̍k)仔頭，大漢 bué 一堆穿插雜誌，bué 讀 kan-na 反反 suah 就隨送伊去糞埽桶 tsiah 理解伊 ê 14。
冊是一項無形抑是有形 ê 投資 m̄ 是虛華佮時行 ê 品並。
(2024.04.25 早起頓 韭蔥荷蘭豆雞肉滷 + 糙米飯 + 俗麭 + 優格/1042kcal)
我愛食德文 uī-tio̍h bueh 區別蔥仔佮大蔥(我囡仔時攏聽序大按呢講) Porree，m̄-koh 翁嫌伊䆀味一直 m̄ 食 ê 韭蔥。
近來，凡勢真心接受食食是藥，灶跤是藥房伊開始接受這項 hōo 伊嫌甲臭頭 ê 韭蔥講「伊正經蓋好滋味，著時咱愛捷捷款轉來料理」。
往過聽伊按呢講我無講寡食甜食鹹，臭跤鼻臁(liâm) ê 話，我 ē 著蛆，這久我 buē 閣按呢做，起因我一想著家己 mā 愈來愈像𪜶兜 ê 副本，我就交懍恂。
Sóo-tí 自頂回好好仔佮伊斟甌仔茶講古，我就決定 buaih 閣纏綴過了代佮成做我家己 mā 無想 bueh 反 ê 天公伯 ê 數簿，大冊(慼)。
我 mā 確實無閣行這條路，像拜四伊家己 bueh 來車站接我去 bué 菜，轉來看著厝門口 ê 車位 hőng 停去隨講「後擺你愛較早寡」。
往過聽著這句話我 ē 一間貨賣了了佮伊冤甲通霄 m̄ 放伊煞，因為無想 bueh 成做𪜶兜 ê 副本，我恬靜無應話 kā 物件一項一項捾落車 mā 捾入厝排好勢，斟一甌茶等伊轉來。
伊門一拍開我知影伊 mā 發現問題想 bueh 會失禮，總是伊猶原愛纏綴爸母 ê 神魂承爸母 ê 瀾「後禮拜仝款落雨，咱駛車去 bué 菜」。
(2021.11.01 減肥早起頓 Scottish Tattie Scones。蘇格蘭司康餅)
到今猶原 m̄ 捌行踏日不斜西，m̄ 捌去遐行跤花 ê 起因，我想應當是英鎊蓋貴。
總是，日不斜西猶原 ē 落山，現此時 ê 英鎊越來越細圓我原仔無出發是啥物因由？
窮實講我家己 mā 無啥清楚是按怎 ē 按呢生，總是我自囡仔時 tuì 𫝛款攏是講英語 ê 角勢就 kan-ta tuì 美國較有興趣，其他 ê 正經是鼻無佗一間厝有人放火 teh 燒。
是講，人生總有 hōo 你 buē 節 ê 意外，像 m̄ 捌 Malta(馬爾他) mā m̄ 捌認真研究英國文化 ê 我，人一行跤到 Malta 若 m̄ 是耳空猶閣利無重聽，我 ē kā Malta 準做是英國，是講，Malta 確實是英國 ê 楦闊，m̄ 管伊自本就情願抑是 m̄ 情願 tshan-tshiūnn 咱番薯島臺灣按呢，捷捷 hőng 當做是別人，總是 Malta 人若較成較愛家己，伊知影按怎順別人 ê 影湠家己 ê 實力，咱若較成 kan-ta 想 bueh 放捒家己隨成做心目中 ê 彼个人。
我 m̄ 知影 Malta 真實 ê 狀況敢是按呢，總是我搪著 ê Malta 人準做 ē 曉講英語 mā 是 kā 伊當做是外來語，顧腹肚需要 ê 語言無 tshan-tshiūnn 咱 buē-su ē 曉講這个語言就加足有氣質按呢。
我知影，我按呢講較無公正，總是這 mā 是事實，起因咱真比並語言 ê 懸低，敢 m̄ 是。
M̄ 捌行踏英國現此時綴 leh 做 ê 英國料理攏是按行踏 Malta 來，大部份 ê 英國料理佮我印象中 ê 記持無宛 2 體 ê buē 敆喙，準做是人人呵咾 ê 英國早起頓(Full English)我 mā 佮伊是門扇枋鬥 buē 峇 ê 食頭一日後尾 ê 早頓錢就 kā 伊當做寄付按呢安搭家己 ê m̄ 甘。
(2024.04.22 早起頓 Khu-lì-mù 蘑菇雞肉 + 秮仔飯 + 洋刺波俗麭 + 優格/1004kcal)
提早歇睏無想 bueh 綴四常隨轉來厝祀佛公，就盤 Bá-suh 到 Marktkauf 揣寶。
近來 m̄ 知是天氣 teh 張掇抑是超市 teh 張掇，架頂捷捷闊閬閬 hōo 我手一伸隨摸到底，這款狀況若是猶蹛 tī 全庄 kan-ta 一間 Lidl ê Greffern 我應當驚甲「吃手手」擘腹家己瘦過頭。
這久徙位到猶是庄跤 ê 大庄，搪著這款狀況我 kan-ta 這个狀態心安草厝穩，因為超市若荔枝一大捾，路邊無人看顧 ê 良心菜蔬舖 mā 是三跤一坎攤，不過我猶是意愛踅超市，愛踅超市 m̄ 是 uī-tio̍h 吹冷氣享受優美 ê 環境，是超市 ê 菜蔬比遮 ê 攤抑是舖大碗閣滿墘兼 ē-tàng 自在手賤 buē hőng tshînn。
Marktkauf 交 Lidl、 Aldi、Netto 遮 ê 平價超市比並伊 ê 價數 buē 講真吸消費者 ê 目睭仁，Marktkauf mā 知影這个問題，所以當𪜶落價，價數是媠甲連平價超市攏喝 buaih 綴，而且閣有 tsuē-tsuē 新奇好物，像 gún 捌 bué 著無到 0.4€ ê BIO 牛奶佮無到 1€ 好食甲到今我猶流喙瀾 ê 阿拉伯甜路。
Marktkauf mā 是我想 bueh 探德國有啥新冊 ê 好角勢。
我愛踅德國冊店，總是 bueh 搪著中央車頭彼款據在你反、隨在你紮弓蕉入來閣 kā 紮出去 ê 店真少，特別是田庄所在，sóo-tí Marktkauf 就成做我探德國文學 ê 自在區。
是，我無法度一仙人行入去獨立冊店祀佛公，紲落來一屑仔攏無寄付。
(2024.03.29 早起頓 美國茄ひき肉雞心豆 Kari + 草莓鱷梨仔生菜盤 + 洋梨仔俗麭 + 優格/954kcal)
„Die Angst davor, dass das Leben unvollständig bliebe, ein Torso; das Bewusstsein nicht mehr der werden zu können, auf den hin man sich angelegt hatte. So hatten wir die Angst vor dem Tode schließlich gedeutet. Doch wie kann man sich, fragte ich, vor der fehlenden Ganzheit und Stimmigkeit des Lebens fürchten, wo man sie doch, wenn sie einmal zur unwiderruflichen Tatsache geworden ist, gar nicht mehr erlebt? … Unser Leben, das sind flüchtige Formationen aus Treibsand, von einem Windstoß gebildet, vom nächsten zerstört. Gebilde aus Vergeblichkeit, die verwehen, noch bevor sie sich richtig gebildet haben.“
驚惶，生活停跤 tī 缺角，成做枝骨，意識著無法度閣創造想 bueh 成做 ê 人。
這成做咱 tuì 死亡驚惶最後 ê 解釋。
不過，呔 ē 按呢生，我問，無加圇 ê 整體佮 buē 敆榫 ê 驚惶人生，伊在那裏(ná-lí)，當伊成做一件無法度撤銷(thiat-siau) ê 事實，敢 m̄ 免閣體會？
咱 ê 生活，是海沙排出來 ê 瓊花，媠䆀攏倚一陣風。
擔沙填海無彩工 ê 結構，tī 你猶未定形進前伊已經成做一片海。
(2024.03.27 早起頓 美國茄雞肉 Kari + 草莓俗麭 + 優格/1098kcal)
總算 tī Google Podcast 停止服務進前，我學 ē 曉按怎掠 tsuē-tsuē Podcast 其中一个 --- Spotify。
按無耐性轉做有耐心 ê 人，這愛感謝 YouTube，準做 tsuē-tsuē 人慣勢 tī YouTube 聽 Podcast，我猶是佮意無「臆你佮意」佮若豬母牽去牛墟 ê「推薦」ê kan-ta 聲音 ê Podcast 。
感謝 Google 感謝 YouTube，因為恁我 tsiah 有這个機會發現家己 ê 潛力(Tsiâm-li̍k)闊閬閬。🤣
是講 uī-tio̍h bueh 收聽 Podcast 我 mā 申請 tsuē-tsuē 佮我無底代 ê 口座，像「SoundOn」、「Firstory」遮 ê 我 kan-ta bueh 成做聽眾 m̄-koh m̄ 知影佗一節脫(thut)箠，我 kan-ta ē-tàng 開節目 buē-tàng 收聽。
這个問題 hōo 我齷齪，起因我有這个癖，我無佮意抑是無 bueh 使用 ê 物就愛隨清掉 buē-tàng「收藏」來鎮地。
這个癖有好 mā 有䆀，總是好 ê 部份大過䆀，像露營車 Caddy，自我接手內底 ê 空間按一米闊變做十米闊 ê hōo 翁講家己講「我真正發覺我種著 gún 爸母 ê 譀想症。」
德國人 ê 露營車生做啥物款，Der Camping-Check 有真詳細 ê 分張。
(2022.03.14 減肥下昏飯 雞心豆餅生菜碗。油炸鷹嘴豆餅沙拉)
我足愛食雞心豆做 ê 料理像雞心豆沙(Hummus)、雞心豆餅(Falafel)遮 ê 物食，總是若是 bueh 講我佮雞心豆料理 ê 第一回接觸，應當是按人 tī 印度 tsiah 開始。
不而過，彼陣 ê 我 tuì 世界 ê 認捌是十八港跤行透透，月光下看人影 ê 水仙(Narcissus)，看印度食物 kan-ta Kari niā-tiānn ê 無，後尾綴著《田蛤 á 王子》ê 跤步是人 tī 非洲佮中東行跤花。
總是彼陣頭殼 kan-ta「華腦」、「英目」，準做雞心豆 hōo 我煞心 hōo 我挵著頂腹蓋，見佮伊見面我猶是「借問咱啥人？」
我愛食雞心豆餅 tī 臺灣 m̄ 捌見過伊，行踏德國 mā 慣勢攢超市版本來食，sóo-tí tī 我猶未行踏東非 Äthiopien/Ethiopia/衣索比亞(I-sik-pí-á)餐廳進前，伊 ê 名佮講法 m̄ 捌鏨 tī 我 ê 心肝穎。
「請問你敢 bueh 開始點菜？」店東問。
「Bueh，我 bueh....」喙講 buē 出伊 ê 名，目 mā 讀無伊 ê 名，越頭指隔壁桌 ê 食物「我 bueh 一盤彼」，店東文文仔笑講「Falafelsalat」成做一面鏡 hōo 我照家己 ê 四書捷甪甪,十句九句不，掠做家己𠢕甲 ē-sái 上西天，窮實是猴穿衫掛目鏡假紳士 ê 假仙假觸兼冇腹，真正感謝這个經驗引𤆬我認捌家己 ê 不足 mā 感謝店東無料分張 hōo 我揣著人 tī 非洲抑是中東食著 ê 味素 --- 無油臊味。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
