亂皂𥴊仔店 ⓂⒺⒾⓃⓀⒾⓄⓈⓀ

(2022.12.17 早起頓 紅菜頭塗肉林檎雞摸烘 + Kam-má-tooh Mozzarella 番麥生菜盤 + 蒜頭優格搵醬 + 紅菜頭薑湯/771kcal)

樂暢食，快樂剾板膋行到今仔日拄拄好滿 6 月日。

照慣例寫落來做記錄，後日 tsiah 有資料通參考。

體重：保密

煏出來 ê 板膋： 1,9kg

1. 30日 1.9kg

2. 60日 2.2kg

3. 90日 2.4kg

(18.01.2023 早起頓 三文魚菜蔬烘 + ベーコン菜擴湯 + 雞肉卵サラダ + カレー I-tá-lih 麵/1162kcal)

肉鯽仔佮三文魚，論真講我較意愛肉鯽仔。

臺灣鯛佮三文魚，論真講若是猶未改良 ê 臺灣鯛，我愛三文魚，起因三文魚 ê 臭塗味較 buē 遐爾仔羶遐爾仔腥。

總是，這个經驗 kan-ta ē-tàng 箍 tī 臺灣我食過 ê 三文魚，起因這是我家己 ê 感想。

現此時按臺灣徙岫到德國，魚 m̄-nā 框金 hōo 愛食魚 ê 我無法度冇手，四常食魚又閣 kan-na 愛鰮仔魚罐頭 ê 翁見請教伊敢 bueh 食鮮魚，伊 kan-na ē 應「Bueh，bueh 食三文魚」hōo 我成做家己 ê The MilliganWar(華：比利戰爭)，三文魚 tī 遮無鞏金 mā 無到二束三文(Ni sokusan mon)，總是一想著三文魚 ê 羶佮腥我就佮家己相戰，起因我無法度敨放家己按徛家帶來 ê 慣勢。

不過，我 mā m̄ 是彼款無法度接受佮家己慣勢相觸 ê 事項，像羊肉有兩款，咱食 ê 山羊肉，歐洲人食 ê 是綿羊仔肉 mā 食山羊肉，咱食 ê 羊仔肉有羶味，歐洲人食 ê 山羊肉無羶味，彼佮飼 ê 方式佮料理手法攏有關係，sóo-tí 愛學習楦闊喙斗 m̄ 是限制喙斗，像 gún 翁𪜶兜按呢，一个人講食魚 ē 過敏，規家 mā 綴伊食魚 ē 過敏 ê buē-tàng 無相趁相喊。

近來無肺部 ê 三文魚 hōo 中國判決伊滓著肺炎，伊踮德國 ê 運命 mā tshan-tshiūnn 塗炭 á(你無聽--過ê格林童話) 相𫝛 uī 公主成做半天鳥仔(悲慘世界)，自百貨公司 hōo 媠媠緣投 ê 徛櫃人員照護徙來菜市場仔 hōo 人跳樓大拍賣。

今仔日翁 bueh 出門前再三交代我若是比伊較早轉來，我決定愛先踅去超市 bué 魚 m̄ 通閣踅轉來捾菜籃 tsiah 出門，起因今仔日 ê 三文魚是自伊這幾冬伊搪過上蓋俗 ê 一斗。

(2023.01.21 早起頓 Bé-khòng バター菜蔬 I-tá-lih 麵 + 番麥牛奶湯 + 洋刺波チョコレート優格/860kcal)

2021.6月24開始注第一針到12月26 ê 第三斗針，我 tuì 預防針 ê 反應 tshan-tshiūnn 媒體 ê 分張 ... 較有歲數 ê 人較 buē 各樣。

總是，我原仔想 bueh 記錄這斗第三斗按 BNT 換來 Moderna ê 反應。

記錄家己進前，我 mā 想 bueh 記錄 gún 翁 ê 狀況，gún 翁某攏是先接受 BNT 2斗 tsiah 紲第三斗 ê Morderna。

Gún 翁前二斗 ê BNT 伊 kan-na 感受手股淡薄仔痠敆𤺪 ê 人一屑仔攏 buē 忝 ê 無任何若臺灣媒體分張 ê ē 呼雞 buē 歕火。

我是手股痠、腹肚枵閣 hōo 人小可仔碰一下就隨哀爸叫母 hōo 對方聽佮睏 bueh 2瞑 tsiah 通較有精神繼續過本底 ê 四常。

第三斗 ê Morderna，gún 翁 kan-na 感覺手股微微仔痠賰 ê 攏大丈夫無問題，而且閣發生 hōo 伊暢甲 buē 顧 ê 代誌，四常食較腥臊隔轉日 ē hōo 伊面肉青恂恂 ê 磅仔 hōo 伊暢甲若花枝小管仔按呢暢 buē 離兼展風神「我著 kā 你講過，是咱 ê 磅仔有問題 m̄ 是我食過額，而且這久 ê 我閣瘦一公斤」。

人猶原 teh 佮姜子牙行棋 ê 我想 bueh kā 黜破伊上愛 ê 揣空想縫，總是人𤺪甲火燒到跤兜 mā 無感覺，就應一聲「這 mā 算是各樣」繼續佮姜子牙行棋。

第三斗 ê 疫苗

隨看隨注文mā 隨行跤到

疫苗送入身軀無感覺任何各樣

本底洘秫秫 ê 街頭這久成做洘塭地揣啥物魚

hōo 我情不自禁想 bueh LA LA LAND

3te Impfung

Wenn mein Mann ein Angebot gefunden hat, dann haben wir sie sofort gemacht

Die Impfung gemacht, wir fühlen nichts, auf der Straße sind wenig Leute

(5:2 減肥下昏飯。Tik-kok 草花馬鈴薯湯，甘藍馬鈴薯湯)

生活是藝術，m̄ 是商品。

前站仔讀「拋荒 ê 故事」，其中有一葩故事寫著 tse hōo 我感受 tsiânn 深，順紲引𤆬我踅 tńg--khì 看 hit 段，因為 bueh 結束過冬鳥 ê 日子湠出--來 ê 記持。

Hit-久 ná 做 ná mē 家己是惹蝨上頭扒➀。

離開了後 tsit 段時間 tsiânn 做一面鏡提醒我，m̄-thang tuè tsia--ê 䆀猴做陣龜叨鱉趖。

Tsit 久翻草看 hia--ê 日子，真心感謝 tsia--ê 藝術品，無計較任何代價𤆬我看藝術品、品藝術。

➀華：自找麻煩

(2023.01.22 早起頓 Maultaschen 德國酸菜湯 + カレー雞豆湯 + Pē-kng 王梨 Sa-la/756kcal)

Ài 看 koh 嫌飫。

M̄ 知 uì 佗落揤著雷公摃歹人 ê 頻道。

不而過，自揤著就牢 tī--hia。

Sui-bóng，我無讀「出師表」，m̄ 知頭尾。

猶原按呢菜頭 m̄ 知摠 tuè lih 逐。

Hōo 我想--著時間一到，定著 ài 看 Tagesschau iā sī Tatort ê 朋友。

起因，tsit 規日我 mā 是按呢，tiàm YouTube 看著有雷公摃歹人，決定 ài 揤入--去看，無看 ē 礙虐。

(減肥早起頓 塗肉林檎 Phián-khè-khò。馬鈴薯鬆餅)

收著通知火隨著，總是我家己 mā 清楚，仝牌子 ê 紅茶，我泡 ê 滋味是絕對 buē 敆對方 ê 喙斗，sóo-tí 現此時 ê 風火著是我家己做得來 m̄ 是對方，起因我 ē-tàng 選擇莫處理𪜶 ê 要求。

我清楚知影愛風神就愛食羹 ê 道理，另外食著羹 mā m̄ 免 uī-tio̍h 別人 ê 喙白隨 kā 家己流汗糝滴煮出來 ê 物件規桶倒 hōo 潘桶食，總是我就是迒 buē 過棚頂做甲流汗，棚跤嫌甲流瀾 ê 想法，不過年歲 ē 添，我 ê 性地 mā-ē 跟綴四常變化沓沓仔改變。

是，早前我 mā 是彼款 kan-ta 有喙講別人，無喙講家己 ê 性地，總是紅塵教我太 tsuē 智慧，起性搦地抑是弄喙水盤喙錦攏 buē 解決問題，想 bueh 解決問題家己就愛較有耐性，有耐性 tsiah 有法度 kā 挐氅氅 ê 膨紗閣紡做一丸，紲落來 m̄-tsiah 有法度繼續刺膨紗，曷無 m̄ 管我按怎喝咻，膨紗猶是揣無摠通刺膨紗 ê 物。

欶一口氣 mā 吐一口氣 kā 文件拍開，我寫 ê 物窮真 buē 䆀，只不過行 m̄ 著所在。

通篇讀煞笑家己眵目 mā 想著囡仔時 ê 願望，我 bueh 家己開一間學校。

現此時搪著 ê 行 m̄ 著所在敢 m̄ 是 mā 按呢生？

一想著「權利」ē-tàng 成做偌 tsuē 種生張，彼軀已經刺好 ê 膨紗又閣隨放裒。

(減肥下昏飯  麥片卵餅𩛩。麥片煎餅)

一个人食早起頓，想著鳳飛飛小姐講過 ê 這段話。

食飯配鹹，m̄ 是鹹是淚珠

Mā 想著往過，按外頭做穡轉來攏 ē 睏甲日頭曝尻川 tsiah 起床。

彼久 gún 媽媽攏 ē 講我來款咱 ê 早起頓。

早前無法得感受鳳飛飛小姐佮 gún 媽媽講 ê 話。

今仔日綴愛早早出門 ê 翁起床精神款伊 ê 早頓。

款好伊隨出門，我一人坐踮客廳愖早起頓 bueh 款啥來食。

(2023.02.25 早起頓 Bé-khòng 菜蔬炒麵 + 紅菜頭寮仔チーズサラダ + Tsioo-kóo-lè-tòo 優格/988kcal)

「咱敢 ē-tàng 莫閣講著 gún 父母」翁 ê 氣口沓沓仔 teh 著火。

「你掠做我愛講是 m̄？」風火己經著 ê 我 mā 已經放棄冷靜莫跟綴伊柴樠點火較光油。

「敢 m̄ 是按呢生」伊喙根咬絚 buē-su bueh tsham 我相輸贏應。

這是我第一斗看著伊按呢，mā 凡勢是第一斗看著伊按呢生 hōo 本底走去啉 Ka-pi 等 bueh 看好戲 ê 理智隨傱轉來佮我合體成做聖戰士(百獣王ゴライオン)。

「你知影我這个癖性，講出去 ê 話就是潑出去 ê 水，sóo-tí 講話進前我 ē 提醒家己 m̄ 通 hōo 人抑是家己情緒叨撚就烏白 tuì 人潑水，總是按呢 ê 好鬥陣 mā 無表示我 ē-tàng 無條件一直接受別人按我遮潑垃圾水水」想 bueh 繼續講遐 ê 生菇代，因為喙瀾㧎 tī 嚨喉隨成做 m̄ 通繼續纏綴別人成做六月蚶，開喙臭 ê 點拄。

翁看我步頻 m̄ 開喙，伊知影 m̄ 是伊𠢕廕火是某發現一粒田螺煮九碗 ê 白汫無味，無興閣喋兼代誌是愈來愈八仙桌欠一支跤，愈來愈僫擺撥隨緊紲喙講「相信我，我真正無想 bueh kā 咱 ê 感情 tsham 𪜶拍相參，總是我家己 mā 捎無摠是按怎我 ē 遮爾仔承𪜶 ê 歹癖」伊那講目箍那紅，手 mā 那趖過來 bueh 佮我疊(thia̍p)十指。

現此時若大士爺厚火氣鬼王 ê 我呔有興趣佮伊耍指頭仔相褒歌，隨 kā 手插胸坎「你知影我足寶惜咱兩人 ê 姻緣，總是我 m̄ 是恁兜教出來 ê 囡仔有法度 kā 情緒叨撚當做鹹酸甜來食 mā 無法度成做你老爸 ê 性地 kā 三斑當做三文魚 teh 惜命命，另外你家己 mā 清楚恁 ê 家和萬事興窮實是塑膠花，假甲姼目 ê 人一看 mā 隨知彼是漚梨仔想 bueh 假蘋果 ê 假包，我是有血有目屎 ê 人 m̄ 是塑膠料，另外我非常確定我 ê 心智無走縒 buē kā 別人 ê 拍拚捎來剾洗做 m̄ 知 teh 展啥物風神」我講。

(2023.10.07 紅菜頭烘 + 瓜仔哖雞排 + 番薯條 + 杏桃麥片優格/1088kcal)

踮 YouTube《Lions University 台語課》學著這句 hōo 我笑甲 kiōng bueh buē 喘氣。

起因我想著佮我門扇枋鬥 buē 峇 ê gún 翁𪜶老母。

總是，講別人䆀話進前，我愛講 m̄ 是我𠢕褒家己是我正經好鬥陣。

我佮 gún 翁𪜶老母門扇枋鬥 buē 峇 kan-tann 這个因端，gún 翁𪜶老母認為伊是世界上上𠢕扞鼎灶上𠢕款厝 ê 人。

簡單一句就是，我𠢕甲無人通佮我比並。

我是腹內開軍艦(lām)，自我第一斗見著伊 kā 我洗好 mā 拭焦 ê 碗箸重洗一斗，kā 我款 ê 食食換掉講 gún 翁佮 gún 囝攏愛食我款 ê 物食，日後 m̄ 管 gún 翁按怎想辦法請我 uī 𪜶老爸款頓，我攏講「我頇顢款食，無法度 kā 恁鬥相共」，m̄ 管是上北拜訪𪜶爸母抑是𪜶爸母落南來行踏。

不過，若是搪著𪜶老母客氣請我綴𪜶一日食六頓，我 mā-ē 客氣 tuì 伊講鮸蝦魴鱸鰮/免下烘爐溫這款話，只是無遮爾仔藝術。

(2022.12.21 早起頓 鱷梨仔番薯烘 + Bombay 醬 + 林檎兔仔耳サラダ + 青豆仁湯/1021kcal)

當初參加 Medium 是踮鄭順聰先生 ê 面冊讀著伊 ê 台語文，sóo-pái 我就跟綴伊 ê 跤步加入這个生份甲㨨無線 ê 環境。

不而過，Medium ê APP 佮我一直是門扇枋鬥 buē 峇，致使我到前幾日 tsiah 有機會沓沓仔讀鄭順聰先生 ê 文章。

Tsa̋ng 讀著一篇「書」ê 文章 hōo 我感觸真 tsuē，因為我 mā 是一本冊 ē 讀幾仔个版本 ê 人。

不而過，現此時 ê 我 buē 閣 tshan-tshiūnn 往過按呢，一本冊 bué 幾仔个版本，起因國際運費足傷重。

Tshan-tshiūnn 這幾日想 bueh 注文寡冊來遮讀，冊費 buē hōo 我躊躇，運費 hōo 我想空想縫洗柝仔頭，像遮 ê 冊無 bué 真無彩，所以運費無算啥物。

我知，uī-tio̍h 運費 teh 艱苦罪過是 bueh 按怎佮人成做「文青」，總是祖先有交代凡事著愛先顧腹肚，才顧佛祖，我是乖囡仔一直遵守這个規則，準做冊錢 m̄ 是我出，我 mā buē 做阿舍冇手。

Kā 冊籃 ê 冊閣一斗排轉去冊櫥隨 tuì 出資者翁講「文青 buē-tàng 做飯食，準做錢 m̄ 是按我褲袋仔撏出去。」

(2022.12.28 早起頓 菜擴烘 + 馬鈴薯紅菜頭湯 + Quark 搵醬 + 菜蔬圓茄烘 + 鱷梨仔木瓜 Sa-la + 藍莓仔番麥麥片 Yogur/739kcal)

Tha̍k 著王力宏離緣 ê 消息，寫著大家 hām 新婦 ê 問題。

Sui-bóng，媒體 phīng 無寫著大家 kap 新婦之間搪著 siánn-mih 問題。

不而過，tha̍k 著 uī-tio̍h 序大人離緣，感受 tsiânn 深。

起因，我 mā 是 uī-tio̍h gún 翁𪜶娘彌 tsham 伊談離緣。

只不過，我凡勢 khah 好字運。

Tī 我按算 bueh suî 人付米 suî 人落鼎前，gún 翁家己先筅黗。

抑無，gún ê 翁某情 mā 是 ē uī-tio̍h 𪜶兜 ê 三斑魚舞 kah 離經。

(2023.02.21 早起頓 兔仔耳馬鈴薯サラダ + 幔チーズ ê 雞肉 + Yogur 搵醬 + Ayran 林檎/1044kcal)

Nikolaus 來相揣 ê 彼日(註1) gún 翁𤆬養老院 ê 序大人去齒科報到，早前 m̄-bat 驗出肺炎 ê 伊。

Tsit 斗，二測陰性，一測陽性。

伊 sûi 連絡養老院 mā 寫 Telegram hō͘  我知影伊搪著 ê 問題 hām 定著 ài 做 ê 代誌。

揣 Detailtest/PCR-Test(政府規定 ê 檢驗所)做檢查，若是確定 tái 著肺炎，我 mā ài 檢查等等。

讀完伊寫 ê 信息，我 sûi 看厝內 ê 食食等等 kám 有夠 gún tòng 隔離 ê 兩禮拜。

一項一項檢查，一項一項確定，回信息 hō͘  gún 翁 kóng「lán-ê 戰備糧草飽足」sûi 家己笑 kah 歪腰。

笑 kah 歪腰 m̄ 是好耍是料想 buē 到，ūi-tio̍h 寒--人所做 ê 未行軍先攢糧 tiàm tsit 時 tsiâⁿ 做九--月颱無人知 ê 救命丹。

(2023.10.31 早起頓 圓茄夏金瓜ひき肉滷 + 清飯 + Ayran/920kcal)

參加 ê 徵文比賽，成績已經出來。

答案 tshan-tshiūnn 咱設定 ê 按呢，無著獎。

我 kā 這个信息分享 hōo 翁。

伊 ê 失望感煞比我較大欉。

「你寫甲遮爾仔好」伊目箍紅紅講。

「你敢讀有」我笑問。

「無」伊應。

(2022.05.07 減肥早起頓 白花仔菜煙腸焗。焗烤德國香腸白花菜)

若是有人開始 tī 指教我 ê 穿插。

我 kan-na ē 按呢回答：曷無你是想 bueh 按怎？

我已經 uī 彼條牛仔褲換到這條牛仔褲。

原文 --SWR3

對譯這段文章，除了確定我並無 kā「穿插/tshīng-tshah」記 m̄ 著掠外 ，對譯 ê 過程 mā hōo 我發見家己 ê 問題。

我 ê 重點囥踮「Was wollt ihr denn？」(tsham 你有啥物底代) m̄ 是「Kritisieren」(批評)。

(2022.12.28 早起頓 菜擴烘 + 馬鈴薯紅菜頭湯 + Quark 搵醬 + 菜蔬圓茄烘 + 鱷梨仔木瓜生菜盤 + 藍莓優格/739kcal)

透早讀著這條新聞 Ende der Katzbuckelei。

想著華語 ê 意思是『蕭規曹不隨』。

台語愛按怎講?

請教網路，捎無摠。

我想著這句 tī 《奪人 ê 愛》學著 ê 句 -- 隨人落米，隨人付鼎。

起因，𪜶是兩个完完全全無相𫝛理念 ê 政黨。

『蕭規曹不隨』佮「隨人落米，隨人付鼎「有像，鐵仔猶縛 tī 遐，只是設計改變。