亂皂𥴊仔店 ⓂⒺⒾⓃⓀⒾⓄⓈⓀ

昨昏坐踮膨椅食四秀仔，那食那看桌頂彼堆冊緟，步頻感覺家己已經行到三日無讀冊，青面獠牙，生毛帶角。

徛起身，行去灶跤斟一杯茶聊聊仔啉，目睭勻勻仔綴河溪行涼，心沓沓仔熥今仔日 ê 筆力。

俗語講，一晃過三冬，三晃一世人，近來雖罔無摸著半本冊，不而過我 m̄ 是一工貼貼宮本英英美代子抑是做寡差牛逐馬 ê 代。

那寫網誌那搜揣台語文資料，那寫客家語食譜文那搜揣客家語資料，遮 ê 過程 mā 是讀冊。

踅轉來客廳繼續食啖糝，我 m̄ 是一冬換二十个頭家 ê 一箍散散，我是鳥鼠趖竹篙，一目過一目，有目標有條理 tī 做家己意愛 ê 代。

2019大暑 tī 網路無意中揣著「iTaigi 愛台語」規个人敢若 tī 罩霧看著日花仔按呢清楚著頭並纏綴「愛台語」ê 文句寫台文。

仝年年兜按中央社《做伙走台步》讀著姚榮松教授 ê 故事，我 kan-ta ē-tang 用這个辭來形容我 ê 心情。

若講「愛台語」是引𤆬我按台文罩霧行出來 ê 引𤆬者，姚教授 ê 故事是 hōo 猶原憢疑(Giâu-gî)躊躇 ê 我直透敨開束縛。 

起因，面對「愛台語」ê 多元選擇，我捷捷 ē 選擇莫選莫選 ê 後果就是 buē 起手寫台文。

不過猶原愛講 kā 遮 ê 問題敨放，我猶原 ē 閣踅轉去罩霧。

„Freiheit ist immer die Freiheit der Andersdenkenden“

咱認為 ê 自由佮關心總是 tsham 別人坐無𫝛條船

--- Rosa Luxemburg

你是啥物色？

Tī 我猶原猶未寫台語文進前，因為 gún 爸爸 ê 關係大部份 ê 朋友掠準我自本就是藍色。

昨昏請翁 kā 我鬥熥，我翻譯 ê 詩句。

凡勢一回愛熥兩塊詩，致使伊聽甲淡薄霧嘎嘎就直接行過來讀我寫 ê 文章。

讀了，伊講一段「Eine Runde spielen」佮「Eine Runde um's Haus gehen」ê 差別。

這段差別 hōo 我想著台語 ê「千金」。

伊 ē-sái 是「好額人兜 ê 千金小姐」mā ē-tàng 是尊稱人兜 ê 姑娘掠外，也 ē-sái 講時間。

踮廚房款翕早起頓，伊翁倚過來講「angeben(展風神)」。

「Heh-me! So angeberisch(足愛展風神)」我應。

「自底就是愛 kā 展」翁知影我 tī 講啥 mā 綴 leh 造句。

正經是按呢，我寫 Blog ê 目的是 bueh 訓練家己 ê 筆尾 m̄ 是 uī-tio̍h 成做網衝，sòo-pái 我 buē 受著連蠓仔攏 buaih 來行踏 teh 鬱，起因我家己 mā 知影家己無彼號才調做網衝。

清楚知影家己 ê 問題，總是搪著相片我猶原無法度圓仔花 m̄ 知䆀，大紅花䆀 m̄ 知按呢賣茶講茶芳，賣花講花紅。

#記錄往時寫 tī 面冊 ê 文字

Ich kenn's

我捌

Ich kann's

我 ē-tàng 做

喙講減肥，手捾甜路，你誠實是減肥，減肥，減到肚臍為界。

我 tshan-tshiūnn 頭毛菜𫝛款誠輕秤，gún 翁那窒冰淇淋那應。

著--lah，著--lah，你 tsham Chow-chow(鬖毛狗) 𫝛款攏 hőng 誤會，我講。

林檎麥片 overnight

I'm feeling angry.

有 ê 人 ê 興趣凡勢是自七早八早起毛䆀，理解這个問題我就 buē 閣了工 tsham 𪜶盤撋。

畢竟，氣死驗無傷。

Tshan-tshiūnn V 遐 ê 人按呢，我 m̄ 免 uī-tio̍h 𪜶是朋友我就愛 kā 𪜶關心到到。

起因，佮遮 ê m̄ 驚火燒厝，kan-ta 驚跋落屎礐萬事 kan-ta 要意家己 ê 人認真是蜈蚣趖入狗蟻岫自揣死路。

Tī Malta 馬爾他行跤花，我一直想 bueh 試英國印度咖哩 ê 鹹汫，總是搪著 tuì 印度料理有大細心 ê 翁 m̄ 管我有喙講甲無瀾伊就是無意神。

霆某螺佮成做三斑一尾是解決問題上緊 ê 方式，總是這款拗蠻鬚聳目降已經無合我意，另外一想著石獅賣甲爛肚 mā 是 m̄ 是今仔日 tsiah 出現。

「窮實我 mā 無確定印度料理敢敆喙，不過我 tuì 𪜶 ê 菜單誠有興趣」換一个方式講話，gún 翁 mā 隨按六月蛤，開喙臭換做捧糖無洗手，糖甘甜 --- 某行翁綴，綴我研究菜單。

因為 m̄ 捌食過英國料理，準做食過 mā 應當攏是無敆喙 ê 放風吹。

一間一間看 mā 一間一間講「我想，我應當無法度發揮外媽冬外孫，雞母孵鵪鶉，惜花蓮盆支持遮 ê 印度餐廳。」

Tī 臺灣話 ê 簿仔紙讀著這段分張感受誠深 mā hōo 我想著家己寫過 ê 話；

Haben Sie noch Fragen?

請教咱敢閣有其他事項需要我 kā 你鬥相共？

Ich helfe sehr gerne.

我非常願意 kā 你鬥幫贊

翁見著我猶 tī 「愛料理」buē-su 掠著翻天割角 ê 賊「你 m̄ 是講，我 buaih 交伊大麵炒圓仔，膏膏纏。」

「無剉(錯)，規欉好好」我應。

伊無紲話踅愛料理，不過伊成做我 ê 副本講「我 ê 鼻仔 buē 變長 buē 疼。」

「我 ê 鼻仔交你相比並是狗蟻比大象」我講。

「我講 buē 贏你，不過我好奇你 m̄ 是講 bueh 佮伊賣囝無叫囝名，當田無從田頭行？」

羅馬尼亞厝邊 tī 復活節分張伊踮果菜合作社 ê 福利 --- 王梨、鱷梨仔、時計果。

收著遮 ê 福利，伊笑微微 tuì 我講 ê 話 mā hōo 我想 bueh kā 伊寫踮遮做記錄並寶惜，起因，我這个外來囡仔並無燒好香。

只不過...記錄進前我想著這件代誌隨笑甲 kiōng-bueh buē 轉氣。

一想著 Pe̍h-ōe-jī Chuùi-chhiⁿ Bāng(白話字翠青夢) 這本漫画(まんが/manga) ê 這段歷史，楊水心女仕寫 ê 日誌，遮 ê 日誌收藏 tī 臺灣日記知識庫。

我無褒嗦家己 buē-su 楊水心女士按呢，總是，Blog tuì 我來講 mā 是我 ê 日誌。

希臘佮土呂其 ê 冤家量債按領土湠到食飯桌，tī YouTube 見著土呂其人去希臘人 ê 影片講「這是 gún 土呂其人傳統食食 m̄ 是恁希臘人。」

窮實講，土呂其烘肉交希臘烘肉我個人分 buē 出 Tsiâ 是 Tsiâ，像若豬肉砧摃甲大大塊 ê 烘肉片大細 ê 薄麭 mā 是，分 buē 清就莫 buê 博假仙做博士博，揣著 ê 食譜按怎寫我就按怎跟綴，像這份食譜。總是我 m̄ 捌想過別人兜 ê 冤家量債押尾成做我個人 ê 無枷夯交椅，自揣麻煩。是講遐 ê 食飽換枵交我已經無底代，起因我無興歹查埔厚同年，歹查某厚姑姨。寫著這件代誌，這敢是德國 ê Line 無社群功能 ê 因端？

我 m̄ 知影呔討 Line 無這个功能，總是我愛這个設定，起因人生 ê 五月十三迎城隍，無旗(奇)不有愛跟綴著團 m̄ 通一日到暗交五錢豬仔，掛一支喙兼歹瓜厚子，歹人厚語米糕𣻸。

翁講愛食 Naan，我講我有歹肉無割，好肉未生 ê 歹癖，做過交成功 ê 食物無愛閣翻頭，按呢我來網海泅水泅看有啥物相𫝛 ê 料理通出 Naan hōo 伊補數念。

Fladenbrot 一拍出去，眼前 ê 相片成做鰮仔魚按我泅過來。 這手路有意思，捲做露螺 tsiah 研做薄片，就這味。

6月15日，德國佮法國做伙比賽。

我問翁你敢需要啖糝配球？ 

當然 mā 是愛，這場蓋重要。

我喙賤，刁意故 tuì 伊講德國隊 tī 比賽進前接受𪜶跤球雜誌採訪 ê 內容「Ich will den Titel, wir sind da」(我想 bueh 著名)。

「Ich hoffe wir haben Glück, das erste Spiel gegen Frankreich.」（我向望好運 ē 徛踮 gún 遮，第一場著愛佮法國比賽)，gún 翁吐一喙大氣紲喙講。

面冊刣掉有一段時間 m̄ 知 ē-tàng tī 佗落收看公視台語台 ê 節目。

M̄ 是我 buē 曉請教 YouTube 是離開面冊我 tsiah 發覺家己已經成做果子貓。

囝仔時聽過這个故事，一个好額人逐日攏 hőng 奉待甲足四序，四序甲連飯攏愛人飼。

有一日厝內 ê 人 bueh 出門 kā 伊款寡物食 tī 眠床頭閣交代伊講遮 ê 物食食了 ē-tàng 去灶跤揣物食來食，厝內人離開無 luā 久這个人就徙去地府拜見閻王。

閰王問伊「來者，你 uī-tio̍h 何等因端來此」。

「料理無困難，因為你 ê 腹肚 ē kā 你講伊 ê 感想。」

這是按德國西南廣播電台 SWR3 讀著 ê 一段話，真佮意寫落來做記錄。

翁下願伊 bueh 食西班牙 Tortillas，我理解做伊 bueh 食墨西哥 Tortillas，竹篙鬥菜刀 ê 結果是兩个人攏揣著家己 ê 滋味。

雖罔，寢頭仔聽翁踅念我決定是刁意故 kā 伊聽做墨西哥版本起淡薄仔清瘼，不過，我清楚知影我 m̄ 是，sóo-tí m̄ 免 tsham 伊 ti 遐花這件代，我 kan-na 需要分張這件代「我 ê 西語若是遐爾仔勥，而且是勥甲 聽 ē 出腔口差，你敢著需要忍受情緒叨撚來成做翻譯，畢竟踮德國無啥物代誌是無料。」

伊聽我按呢講隨恬恬，無繼續剾烏枋 hōo 我慼。