(2023.05.06 早起頓 鱒魚敏豆冷盤 + 麭生菜碗 + 卵包 + 優格/942kcal)
讀網路推薦 ê 無料新聞，我 ê 態度大多數是秒看標題隨換逝。
起因，我無想 bueh 成做大數據其中一粒星。
雖罔，無揤落去原仔 ē 成做大數據一粒星，總是無揤心猶是較在。
這斗𫝻著這 pha 新聞，內容 tuì 我無吸引力，總是真久無見著俗諺語出現 tī 新聞標題 ê 我隨起心動念，做別人 ê 工課練家己 ê 工夫。
die Katze aus dem Sack lassen - Kā 貓按麻布袋仔挈出來
這句俗諺語佮 die Katze im Sack kaufe 有關係，tī 中世紀 bué 賣博覽會 ê 諞仙仔 ē 狸貓(lî-bâ)換太子 kā 兔仔、豬仔囡換做貓仔來賣。
另外一方面，kā 貓按麻布袋仔挈出來 mā 表示諞仙仔 ê 秘密煏空、黜破、掠包。
(2023.04.27 早起頓 雞肉林檎紫頭菜サラダ + 人参馬鈴薯烘 + 檨仔 Quark/931kcal)
坐輕鐵搪著幾个應當是國中年歲 ê 查埔囡仔，我 m̄ 是愛雜插兼鴨母喙愛叨(lo) ê 性地，總是這幾个囡仔 teh 破 ê 豆 hōo 我實在是無法得無 kā 耳仔覆過，起因實在是太有意思。
「Mein Wunsch in diesem Jahr ist eine Hautfarbe wie Bronze」(我今年 ê 向望是 kā 家己曝較成鐵牛運功散 ê 色緻)。
人自囡仔時攏是 teh 比賽這个歇熱愛按怎 hōo 家己成做白銀魚按呢白鑠鑠(siak)無曝烏，𪜶是拚勢 bueh 曝甲若一尾烏魚遐爾仔烏金誠實是無法得順手提著 ê 物件上珍貴。
總是，人𪜶愛曝烏 mā buē 嫌家己䆀 tsi-tsi 愛舞甲 buē-su 是按外國轉來 ê 人按呢乞食攑蠓捽仔，假仙假怪。
不過，彼驅烏是一種 m̄ 免喙講 ê 認證，gún 兜有夠額。
世間 ê 規定真正是隨較惡 ê 人喝。
我儘量保持規矩，我無偷聽 mā 無好玄𪜶 teh 做啥，總是當𪜶 kā 手骨伸出來互相比色水。
(2023.05.03 早起頓 菜蔬番薯盤 + 花飛 + 莓仔優格/1040kcal)
你敢 ē uī-tio̍h 一項你無動著 m̄-koh 伊煞自動消失 ê 代誌掠狂心悶？
向時 ê 我誠𠢕 uī-tio̍h 這款代誌哭呻規半晡閣 ē 餾 buē 離，這久 buē 閣哭呻 mā buē 餾 hōo 我暢甲決定 bueh kā 這件代誌記錄落來。
起因這表示，我有 teh 進步 buē 閣 tuì 家己情緒叨撚𫝛時 mā 表示過了代 ê 代誌 tuì 我來講猶原重要 m̄-koh buē 閣敢若這句俗諺語未食五日節粽，破裘 m̄ 甘放。
我知影按呢鬥句真龜怪，總是我 m̄ 是田螺 buē 一直循舊 tsuā，語言 mā buē 較講 mā kan-ta 這个意思。
今仔日 2023.05.07 m̄ 知我 ê 電腦出了啥物代誌，我囥食食攝相 ê 檔案偷走厝走甲 hōo 我揣 buē 著伊。
往過我 ē 想辦法揣出兇手，揣無 ē 投天告地 buē-su 規个金庫 hőng 挖了了按呢艱苦。
這久凡勢是理解在生 m̄ 樂，死了 kā 鬼捾包袱➁，我無想 bueh 吩咐欲落柴➂哭呻衰䆀➃(Sue-bái)。
夏目漱石(Natsume Sōseki) ê 人生3部曲總算讀煞。
講總算 buē-su 伊 ê 作品真僫讀，事實卻 m̄ 是按呢。
是我一直掠做這本猶未讀 ê 冊 mā hōo 我 tī 2018 kā 紮轉去臺灣。
疫情進前，準做踮臺灣已經四邊無一倚，我原仔 ē 轉去臺灣行行看看。
轉去 ê 時 mā 真慣勢 kā tī 遮 bué ê 物件紮轉去臺灣，相𫝛 ê 態度我 mā 真慣勢 kā 按臺灣紮來遮 ê 冊閣紮轉去。
起因，我真清楚有一日我原仔愛轉去臺灣，sóo-tí 就真慣勢 kā 家己 ê 物件一項一項款轉去囥。
2019 疫情開始湠，我這野生紅鰱魚無法度繼續往擺 ê 回泅，總是日子原仔愛過 buē-tàng 因為看 buē 著 ê 敵人就來改變家己 ê 慣勢。
Sòo-pái 冊原仔照常 bué 照常讀，總是冊 buē-tàng 食入腹，一日看伊疊甲若燒好 ê 紅磚仔按呢烏白囥 tsiah 發覺家己 ê 貧惰又閣夯起來，隨緊 kā 四散 tī 紙箱仔佮膨椅 ê 冊緟(thōng)整理做緟冊囥冊櫥，《門》就是 tī 四散甲 buē-su 遮 ê 抾字紙清彩疊紙箱 ê 冊緟揣著。
(2023.04.30 早起頓 Feta 人参番薯 + 鱷梨仔木瓜雞肉 + 果子 Quark/903kcal)
(2023.04.23 早起頓 王梨紫頭菜サラダ + 青豆雞豆飯 + 花飛 + 果子 Quark/1111kcal)
自2019年起頭寫第一篇文章到今，一目𥍉 mā bueh 4冬。
這 4 冬有足 tsuē ê 變化，像擘腹別人讀無我寫 ê 物件隨閣掠外寫一逝華文，落尾手發見彼正經是無枷夯交椅隨放伊自由。
是講，彼陣 ē 按呢寫是攑香綴拜，起因讀著 ê 臺文作品就是按呢寫，一逝漢羅、一逝羅馬字閣一逝華文。
選字，彼陣 m̄ 知啥物字愛寫漢字啥物字愛寫羅馬字就綴台文出版品跤步 kā m̄(毋)、lán(咱)、tsit(這)、tse(這)...遮 ê 捷讀著 ê 羅字綴 le̍h 寫，總是沓沓仔發見有 ê 台文出版品有意見領袖 ê 態度佮堅持𪜶 ê 腔口 tsiah 正範 tsiah 準算，我就無閣綴 leh 做𪜶 ê 副本，行家己 ê 路像這个「親像」我是講「tshan-tshiūnn」m̄ 是「tshin-tshiūnn」我就以羅馬字來表示我 ê 腔口，其他 ê 就齊漢字，起因我正經無認為寫羅馬字有啥物特別。我講羅馬字無啥特別主要是我 ê 四箍圍仔攏是寫羅馬字 ê 族群，我逐日 mā teh 寫羅字，sòo-pái 羅馬字 tuì 我來講正經無特別，不過羅馬字真重要，伊是學習台語上讚 ê 工具，buē 曉讀寫日文五十音 ê 我，學習日語文 mā 是齊靠羅馬字來記和字佮漢字 ê 差別。
外來辭 ê 部份，一開始我 mā 是照呼音抑是愛台語氣口 ê 方式 teh 講，像 Waffel kā 伊號做格仔粿、格仔餅尾手我猶是佮意綴原音 Waffel 行，雖罔捷捷 kā 伊按英語講做德語，特別 tī Fel ê 部份，總是大多數 ê 人一聽攏知影我 bueh 愛啥物，至於(tsì-î)「鬆餅」我 kan-ta ē tuì kan-ta 捌這个語言 ê 人按呢講，聽起來真臭屁，是 m̄ 是?
總是我清楚知影，m̄ 是，m̄-koh 我清楚知影我非常尊重別人聽有 ê 講法，起因若是閣有其他 ê 講法我 mā-ē 綴 leh 講，是講現此時(2023.12.21)寫著 Waffel hōo 我 mā 好玄公視台語台 ê 新辭庫敢有收這个辭隨請教，有 neh 公視台語台有收，伊號做 uá-hòo，美國 ê Pancake 號做 Phián-khè-khò 誠有 14--neh，我 ē 綴 leh 講佮寫。
押尾猶原愛寫著是按怎無 bueh 寫白話字?
越南...
是按底時 tuì 越南興趣趣?
我想應當是準備按臺灣徙岫到德國 ê 2017年閬縫。
Tī leh 等待出發到 tuì 我來講並 buē 生份 ê 德國 ê 彼段期間，我 ê 心情一直浮浮 buē 定致到本底掠做 ē 讀 ê 冊成做冊桌 ê 妝娗。
心浮浮 buē 定又閣捎無浮 ê 寮仔門，上網踅旅行社是我上佮意 ê 事項。
就按呢自從到今 m̄ 捌想過行踏越南 ê 我就綴「跳樓大拍賣」起行。
出發前清楚知影家己是參加佗一類型 ê 旅行團，sóo-tí 我 m̄ 捌 uī-tio̍h 這逝 ê 行踏特別上冊店或是網路搜揣資料補腦。
起因，我清楚知影家己參加 ê 因端佮需求。
徙岫 tsuē-tsuē 冬
遮 ê 重要節日除了兩德統一日(Der Tag der Deutschen Einheit)10月初3佮聖誕節到新正 ê 歇假日 hōo 我捎有摠頭掠外
其他 ê 歇假日 tuì 我來講是 m̄ 捌字看告示
人講歇睏我就綴 leh 歇，一霎(sap)仔攏 buē 哭呻 uī-hô 猶愛顧腹腸
Buē 哭呻凡勢佮遮 ê 禮拜有 kan-gāi
按怎講？
若 m̄ 是徛大都市 ê 所在
M̄ 知影 uī-hô 一直無 tuì《Thá-kheh》佯青，凡勢是伊深深蹛 tī 心肝穎，自然就 buē 有啥物特別 ê 想法。
因為伊是 Thá-kheh mā 是我，雖罔 gún-ê 年間無相𫝛，總是故事內底 ê 人物 hōo 我想著往過，特別是族群佮我是 tsiâ ê 部份。
另外，因為家己 mā 是中部囡仔 tuì 作者筆尾 ê 環境，不論是美軍俱樂部(家己有親情捌 tī 遐食頭路) 抑是中華路夜市等等攏誠有畫面。
因為讀甲心肝穎，自然就 buē 想 bueh 寫寡啥。
這久踮遮寫遮 ê 543 kan-na 想 bueh 講 hó-lí-ka-tsài 無放捒這本冊。
是--lah，tī Books 見過伊幾仔擺從來 m̄ 捌起心動念抉落去，起因冊皮無合味。
讀甲心肝穎 m̄ 知愛寫啥就引述作者 ê 話頭「作者娶外省某，三十七年參悟看徹新住民 ê 文化意識；文中男主角生一位金紅色頭毛 ê 查某囝，作者 ê 查某囝兩个攏是烏頭毛，m̄-koh，文中 Thá-kheh 佮作者 ê 大姊、小弟，真實是一出世就是金紅色 ê 頭毛、目眉毛、皮膚毛。」
囡仔時我真討厭「外省囝仔」這个名 mā 無佮意「臺灣人」這个名，起因我兩个攏 m̄ 是。
論真講 tuì 這本冊 ê 興趣 tshan-tshiūnn 鳥鼠伊到底有洗身軀抑是無，攏 tsham 我無底代𫝛款。
起因，我 tuì 詩 ê 理解 tshan-tshiūnn 綴人參觀 Galleria degli Uffizi 相𫝛，逐家 tuì 作品 ê 討論宛然 Vesuvio bueh 來 Pompeii 行踏按呢 遐爾仔熱情，我煞敢若一个無腦 ê Seescheiden tī 遐四界沐沐泅四界生湠。
理解這个部份自然就 buē 閣受著感情 ê 束縛看著台文冊隨相楗(kīng)，總是無興趣又閣 bué 來讀，按呢敢 buē 傷過紅龜生蟲 -- 龜怪。
Buē--neh，自無要意鳥鼠有洗身軀無到要意鳥鼠無洗身軀--有鼠味(趣味) ê 興趣趣，是 m̄ 知影 tī 佗落讀著紹介講伊有「散文」。
我愛讀「散文」無愛讀「詩」，我想這也反應我 ê 個性，我有阿婆癖性無仙界氣質。
Tī 遮我 m̄ 是講寫散文 ê 人無氣質，我 kan-na 針對家己 ê 喙斗說出「散文」佮「詩」吸引我 ê 所在。
詩，文言需要開時間理解。
散文，白話掛文言，雖罔猶原定定讀甲相拍電，散文猶原比詩較好理解，而且讀煞 buē buē 記得了了，這是我 ê 感受。
我 m̄ 是基督徒或是天主教徒，總--是當初踅「李江却台語文教基金會」ê 面冊看著這本冊 ê 分張，無想過 tsuē 問題隨請教「聚珍台灣」敢有這本冊，得著回覆 mā 隨注文紲落來等冊坐 Pue-lîng-ki 來遮佮我破豆。
冊收著，猶未讀翁隨問「這敢是寫宗教 ê 冊？」
伊講甲蓋保守，我聽甲明明「伊講 ê 宗教是 tuì 歐洲人來講 m̄ 管天主教或是新教等等攏是按基督教湠出去基督教。」
「M̄ 知，我 bué 這本冊 kan-ta uī-tio̍h 伊 m̄ 是台語詩，m̄ 是...」那講那反冊皮 ê「導讀」紲落來微微仔笑 tuì 伊講「好眼力，看冊皮就隨知影伊是佗一類 ê 文學作品。」
「我雖罔已經離開『教會』總是教會 ê 一切就敢若你 tuì 佛教 ê 認捌度按呢猶有捌幾撇」伊講。
「我 tuì 我 ê 土地敢有認捌甲遐爾仔深，這我就 m̄ 知--looh，總是踅基金會 ê 面冊搪著伊就隨想 bueh bué 轉來讀，起因伊看起來是一本 buē hőng 讀甲心情沈重 ê『台語冊』」我講。
台語冊凡勢有 tsuē-tsuē 選擇，只是我 m̄ 知愛去佗位揣冊來讀。
Sóo-tí tī 冊櫃彼本台語冊(除了 hit 2 本文青紹介 ê 台語冊無讀掠外...目前讀 buē 落去)讀煞猶有機會繼續讀我有興趣 ê 台語文學，這正經是歡喜是 hōo 我歡喜甲 buē 顧得。
我 tuì Heilbronn ê 記持 tshan-tshiūnn 兔仔 ê 魚釣仔
Kan-ta 一尾魚
我是藝術青盲牛 m̄ 知兔仔 bueh 表示啥物
𫝛款 ê 道理
我 mā m̄ 知影這 2 粒金柑仔球 ê 意思
總--是彼日 tī 葡萄園靜候晏到 ê 人
有當時我會按呢想，德國 ê 自省教育敢正經有應效?
起因，搪著 ê 人無分年歲抑是階級，𪜶若是認為你是低路人，就使𪜶 mā 無幾支毛通品並，𪜶 mā 猶是有法度 kā 豬屎籃仔提出來品並。
Tshan-tshiūnn 彼日按呢，一个德國人大大典典 tī gún 遮 ê 人客目頭前 īng 懸目看 tsham 伊相𫝛攏是仝階級 ê 義大利人殕殕。
我 ê 語言無分佗一路攏低路，我無法度 kā 義大利朋友鬥贊聲，其他 tsham 我相𫝛攏 m̄ 捌 tī 遮食過頓➀ ê 朋友，gún 逐家攏成做無氣味無色水 ê Bach➁ 按眼前 ê 溪划過，不而過我知影 Bach ē 揣--著 ê 溪流 ê 出口。
起因，逐家攏知影按怎引𤆬脹膿 ê 人去看醫生，在水 buē hōo 家己穢著 tshan-tshiūnn 翁公司 ê 少年查某囡仔，無佮意 D ê 大嚨空隨投去總公司，總公司隨派人來調查頭尾。
論真講，我家己 mā 真無佮意這个德國人，總是四常 buē 佮伊接接 kan-ta tī 櫃檯算數 tsiah-ē 搪著伊，而且機會 mā 無 tsuē。
若誠實無拄好 hōo 我搪著，只要伊莫目睭囥到天頂，喙閣呸臭溝仔水我攏 buē 要意，起因每一个人攏有家己專屬 ê 紅蟲 ê 紅龜➂，這塊生蟲 ê 紅龜 m̄ 管生偌 tsuē 蟲，攏愛接受上帝公 ê 賞罰，sòo-pái 我這个平凡老百姓搪著 tsham 我無仝型 ê 龜怪，只要伊莫刁工來相觸抑是為非糝做，m̄ 管伊人偌臭攏大丈夫。
起因德國就有法度接受 AFD，我這款𠢕乞食攑蠓捽仔➃捷捷 kā Rosa Luxemburg ê 金句 Freiheit ist immer die Freiheit der Andersdenkenden➄ 掛 tī 喙角 ê 人呔 ē-tàng 輸 hōo 德國。
簡單想 bueh 寫寡感想卻發現寫這篇若蓋成 ē hőng 看做看票揣位 ê 感覺。
總是，冊讀 suah mā 搪著這篇早就設定好勢 ê 文章，愛我 uī-tio̍h 這款 m̄ 知按佗來 ê 情緒叨撚 teh 無枷夯交椅並違背家己 ê 個性莫寫一篇感想，彼 m̄ 是傷過假仙，彼是出家又帶枷 ê 無聊。
無聊歸無聊，總是拆白講我 mā m̄ 是自底就是按呢 ê 性地，起因我真清楚準做我已經按《後天美女製造機》升級到 m̄ 免閣倚靠機器來展現家己，總是《靈魂裏的胖女孩》猶原三不五時傱出來揣我𨑨迌。
每一个人有伊家己犯官欺，m̄-thang 犯眾議 ê 想法，總是我這輩 ê kan-ta 若啥物攏驚，啥物攏 m̄ 敢做，閣 kā 無合理 ê 事項當做燉補來食，這正經是龜怪。
我猶 teh 揣神魂 ê m̄ 知是熊抑是虎，總是我知影跤步踏無出去，kan-ta bueh 按呢雙跤踏雙船，心頭只有亂紛紛，無法度粗糠還(huān)粗糠，冇粟還冇粟來做代誌。
關於這本冊，拆白講 tī Books 搪著伊我第一个想法是傍語賣文 --- 傍臺語賣華文 tshan-tshiūnn《後天美女製造機》按呢利用一台機器調整家己 ê 不足。
我 m̄ 知影別人 tuì 90%華文透濫10%臺文 mā kā 號做「臺語文文學」有啥物想法，總是我個人 tuì 這款寫作方式是按呢分類「牽尪姨，順話尾」，我知影按呢比論真龜怪，總是尪姨敢 m̄ 是順人 ê 意愛調整伊 bueh 講 ê 話來得著金銀財寶，sòo-pái 這本冊一開始並無吸引我 ê 烏白雙仁。
總是，bué 冊 mā 是一件有緣做牽手，無緣做朋友 ê 過程。
日本文學 tuì 我來講較生疏，應當講規个日本文化 tuì 我來講攏生疏。
青春少女，逐个朋友攏 leh 痟日本歌星日本劇，我原仔 teh 讀西方文學佮收藏西方影戲。
這久朋友 teh 痟中國戲齣、泰國戲齣、韓國戲齣，我 teh 揣臺文出版冊讀臺文閱本。
自囡仔時到今佮意 ê 事項攏 bueh 相𫝛無啥變化，唯一 ê 變化日本文學開始 teh 讀，日文 mā 開始沓沓仔 teh 學。
是按怎 ē 按呢生?
我想這應當佮夏目漱石(なつめ そうせき) ê《吾輩は猫である》(I'm a cat)有關係。
按怎講?
伊讀起來 buē 遐爾仔沈重。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
