(2023.05.28 早起頓 Moussaka + 螺絲麵 + 果子 Yogur/1137kcal)
歷史是一篇 hōo 研究者揀選出來 ê 世說新語。
物食是按這个土地生湠佮看 tsiâ 較有才調佮耐性將伊四處湠。
恁講 gún 正宗，我家己 mā 無確定。
起因，我捷捷 teh 思考，領土 ê 定義 m̄ 是講倚恁彼搭就是恁--ê，是按怎我倚 TR 遐爾仔倚，Zypern 倚 TR 遐爾仔遠，GR 佮 TR 攏講 Zypern 是𪜶-ê，雖罔現此時 ê Zypern 有一半是國家，總是遮 ê 問題 tī 未來又閣 ē 成做啥物款生張咱 m̄ 知影，因為未來 ê 故事原仔 m̄ 是咱遮 ê 平凡人所編寫。
我真慣勢別人 kā 我當做中國人來看待。
起因，𪜶讀 ê 歷史就敢若我讀 ê 歷史，世界 kan-na 一个生張，一个美麗。
Sóo-tí 當我搪著這位厝內窗仔門一拍開隨看著 Türkiye ê 同學按呢回答遐 ê 世界就是我所講佮認為 ê 人𪜶 ê 應話 hōo 我感覺伊該當 mā 搪著佮我相𫝛 ê 問題。
收著冊無斟酌看內容隨掠做伊是華語冊 hōo 我哭呻幾句以敨放 hőng 騙 ê 感覺，起因讀著 ê 紹介攏講伊是台語 ê 封神榜。
冊開始反 iōng 華語讀閣不止仔順，不過那讀 mā 那開始㧎㧎隨換台語讀，怪奇呔 ē 遮爾仔順，m̄-koh 我 m̄ 是文言一致按呢讀，我是自動 kā 字轉做我學 ê 台語字我講 ê 音，tshan-tshiūnn「他」我 kā 轉做「𪜶」，「不是」我 kā 轉做「m̄ 是」按呢。
雖罔按呢 ê 轉化 hōo 我讀甲順順順，總是我 mā buē-tàng 按呢 m̄ 捌字看告示一霎仔尊存攏無隨踅轉去讀𤆬讀...
我真𠢕剾洗別人「欠錢怨債主，不孝怨父母」，我家己 mā 是半斤八兩「bué 冊 m̄ 認真讀，讀無隨詈別人」。
人冊 ê 目錄寫 kah 清清楚楚「臺語原版《小封神》」又閣特別 tī 這段紹介 iōng 醒目 ê 紅底做提醒。
遮爾仔清楚 ê 提醒，我猶原有法度成做大目新娘揣無灶 mā 是厲害非常 ê 見笑代。
捎著摠隨綴摠頭行，那讀那踅去呂美親教授 tī 「亞特聊聊天」ê 一段話，大意是按呢。
這本《台語現代小說選》我 ê 學生 kā 我反應，𪜶開始讀有台語文學抑是讀甲較 buē 遐爾仔艱苦。
我 tuì APP 系統無興趣，sóo-tí 這个態度 mā 影響我 tuì Podcast ê 興趣。
這幾日《錦荔枝的滋味》讀煞隨上網搜揣廣播劇。
廣播劇有揣著，m̄-koh kan-na 揣著 Podcast，tuì APP 無興趣 ê 我隨放棄收聽。
2023.01.13 又閣相𫝛 ê 透早那款早起頓那聽德國西南廣播電台放送𪜶 ê Podcast。
早前，無論 Podcast 聽甲偌爾仔興趣趣原仔 buē 起心動念上網掠 Podcast ê APP。
是啥物因端 ē 遮爾仔排斥(pâi-thik) APP 窮實我 mā 無啥知影，總是伊 hōo 我 ê 感覺就佮電子冊𫝛款足虛足空無意神。
13 這日電台放送按瑞士來 ê DJ BOBO hōo 我聽甲 m̄ 願按呢有頭無尾就結束，隨上網清彩拍一个往過捌看過目 m̄-koh m̄ 捌聽過 ê Podcast「亞特聊聊天」隨出現 Soundon 這个系統隨揤落去讀細節，無讀 m̄ 知影一个 Podcast 竟然有遐爾仔 tsuē ê 系統，照慣例 Google 大神引𤆬我揣著 tsiâ 我就優先使用這个系統。
檢采是我頇顢，舞規半晡 ê 結果是 ē-sái 聽卻無法度揣其他 ê 節目 tsiah 發見我愛註冊，隨照起工註冊又閣搪著問題，我 ê 密碼 m̄ 著。
Tī 聚珍台灣見過伊幾偌擺 m̄ 捌 tuì 伊起心動念 ê 因端 m̄ 是 tshan-tshiūnn 早前踅 Books 看著冊皮 buē 想 bueh bué 來讀 ê 問題，是聚珍台灣無摘(tik)要通讀。
我 ê 意思是 tshan-tshiūnn Books ē 囥幾頁內文 hōo 讀者做參考 tsiah 決定敢 bueh 撏錢。
不過，論真講選華文冊，我 buē 遮爾仔囉嗦，為何？
華文用字大部份攏標準化，sóo-tí 讀無意思抑是無確定伊愛按怎講手頭又閣無字典或是專業字典(學術專用...我是無用到學術辭典，不過手頭 ê 字典 tuì 我這个青盲牛來講已經真夠額--ah)上網查大部份攏查 ē 著，查 ē 著 ê 因端佮我注音真 lóo 無依賴(I-nāi)伊凡勢 mā 有關係，起因我是使用 hőng 嫌舊漚舊臭又閣因為伊 hōo 鬼哭，神 teh 吼 ê 倉頡輸入法。
台文字 ê 標準化按怎變化，我 m̄ 捌一箍芋仔番薯，不過我是慣用教育部 ê 推薦用字來書寫。
起因，伊省去我成做倉頡 ê 時間。
論真講，我 mā 無彼个才調成做倉頡。
另外，mā 無興趣研究這敢是本字。
世界文學台讀少年雙語系列㊂《銀河鐵道 ê 暗暝》佮其他 ê 冊按臺灣寄到德國，整理好勢準備 bueh 排冊櫃想著文青 ê 分張「無法度成做大色貨、頭篩仔」想著 Hesse ê 性命行到尾站，你敢有法度聽出音符升G調抑是降A調，喙角成做月眉，冊 mā 是廣東目鏡，隨人佮意佮賣麵 ê 看人撒油 ê 大細心。
畢竟，文青紹介 ê 冊佮伊寫 ê 冊讀煞我 mā buē 合味。
我無興探討文青 ê 世界，總是我 tuì Anne hőng 按呢講真 m̄ 甘 mā 認為 tuì Anne ê 譯者感覺無公平。
不過，世界著是按呢，食食有家己 ê 喙斗讀冊 mā 是，m̄ 免要意，上重要 ê 代誌是揣著家己 ê 喙斗，sóo-pái 我正經真歡喜有機會讀著 Anne，青春少女m̄ 管Ὕπνος➀按怎來招猶原堅心成做暗光鳥佮台視約會 ê 日子。
Ah--我 ê 青春少女，想著褲袋仔袋磅子，uī-tio̍h bué 冊 kā 便當錢儉落來 ê 噤喙。
噤喙 m̄ 是講無食，噤喙是講放棄學校遐有糋雞腿 ê 便當換創赤肉炒豆干按呢。
便當凡勢是這久 ê 料小，伊卻是庄跤囡仔 ê 山珍海味。
Ah--青春少女愛食 m̄ 驚肥 uī 冊放棄山珍海味，uī-tio̍h Anne 按冊行到電視成做暗光鳥 ê 日子，快樂、滿足。
I don't know who he is, actually.
Once when I was out with my husband, he saw someone sharing this book in a public bookcase.
His eyes, just like I saw Jogi's, super Excitement.
You must read this book, he said.
This is so interesting, my husband recommended me to read the book, I must read!
I'm not mocking my husband, but everyone has different tastes in reading.
My husband likes to read about geography which I am not interested in, and this type of book, for him, is like my attitude to geography.
I must say that this book was not easy for me to understand, but I'm still very happy that I had the patience to finish it.
當我認為家己所做 ê 代誌 tshan-tshiūnn Hänsel(番薯 kah 月桃/你無聽--過ê格林童話) 掖 ê 麭按呢，無望。
一路按德國掖到波蘭閣轉來到德國寫出去 ê 電子批猶是一屑仔聲音攏無隨準備放棄，胡長松先生 ê《幻影號的奇航》引𤆬佮伊相拄搪。
我庄跤倯 m̄ 捌詩 ê 媠，總是讀著這篇記持 ê 海馬又閣泅入海湧滾絞 tshan-tshiūnn 彼陣讀著顧德莎女仕 ê《讀詩》相𫝛。
我 m̄ 知是海馬無事揣事來絞抑是我猶原無法度 kā 這个情緒擲挕掉。
「有人寫信息 hōo 你」
詩讀煞 ê 彼日翁 mā kā 伊 ê IG 信息轉 hōo 我讀。
彼陣 ê 無四序又閣踅轉來。
不過，這款情緒 kan-ta 一霎仔 niā-niā，起因我 ê 海馬已經知影按怎 tī 遮 ê 海湧內底滾絞。
這本冊 tī 我這个連蠓仔攏無 bueh 來行踏 ê Blog m̄ 知出現過幾擺，tī 愛料理 mā m̄ 知影喋過幾仔斗就知影我 luā 佮意伊。
我佮意伊若 teh 佮厝邊頭尾破豆 ê 筆尾 mā 佮意伊敢若哲學家 ê 自我對談。
一切自自然然，無任何 ê 虛華 --- 我 ê 意思是揀字寫揀字講。
寫著虛華 mā 是我頇顢倒吊無墨水，sóo-tí tsuē-tsuē 字讀有 m̄-koh m̄ 捌半撇，無論華文抑是台文，總是猶是愛講華文字較好揣資料。
我講 ê 華文字較好揣資料 m̄ 是講台文字冷僻抑是豆腐字，起因遮 ê 問題 tuì 我來講攏 m̄ 是問題。
比論講「挨拶」ê「拶/satsu」我是按日文學著這个字，華文 buē 曉講使用倉頡輸入法 ê 我猶原有法度迵過「手女女弓」kā 字拍出來。
台語字 ê 𠢕、勥、𪜶無法度使用倉頡輸入法猶原無要緊，起因有信望愛台客語輸入法佮PhahTaigi台語輸入法 thang 使用。
按呢 ê 無精差是按怎 bueh 特別寫一段?
M̄ 是文青兼智識無夠額，所以 tuì 作者無印象。
按呢講 buē-su teh 剾洗啥物。
無，我無剾洗啥物，只是踅網路社群捷看著人 teh 討論作者現此時 mā 開始寫「台語散文」hōo 我感覺真好玄隨揣冊來讀。
冊讀煞拆白講我並無感受文青講 ê 特別，這凡勢佮我從來 m̄ 捌讀過作者 ê 華文作品有相干。
總是猶是愛講，伊讀起來就敢若 teh tsham 厝邊頭尾開講 ê 輕鬆自在閣直透你 ê 世界，有這个感覺 mā 凡勢是作者 ê 背景佮我相𫝛，我 ê 14 是 gún 攏是臺中大漢 ê 囡仔，雖罔蹛 ê 角勢佮年間有精差，總是成做臺中囡仔現此時蹛遠兜綴伊 ê 文字總 mā 想起猶 tī 家鄉 ê 一切佮按家鄉湠出來 ê 記持。
Tshan-tshiūnn 作者蹛 tī 鐵枝路邊 ê 故事「火車行過的時，就予我餾一下仔囡仔佮少年時的習慣，揲一下仔手，想一下仔爸母的愛、兄姊的情，閣有彼段永遠袂褪色的囡仔時代」 ê〈火車行過的時〉，tshan-tshiūnn〈老母的字典〉「你今是咧講，我是無智識的人，完全毋捌字，是毋是?」hōo 我想著家己佮阿母 ê 對話佮掠做我智識飽滇窮實是年間無相𫝛 ê 變化 niā-tiānn。
我 m̄ 捌作者，m̄ 捌讀過華文作品，sòo-pái 無法度比較華台差異，準做有華台通比較，我 mā buē 撨時間讀華文部份 tshan-tshiūnn 讀《記持開始食餌》相𫝛，厚厚3百外篇，我 kan-ta 會讀台文，華文直接放水流。
是按怎會按呢生，無按怎按呢生，我會 bué 這本冊除了好玄 hōo 文青講「我已經厭倦台文總是講親情」ê 見作者就講「這是絕佳 ê 優質台文作品」ê 一粒林檎 ê 媠䆀伊講就是 ê hōo 我成做一隻貓 tuì 這本好玄甲無 kā 讀一下 buē-sái，另外一个因端就是伊是台文又閣 m̄ 是詩類，這 hōo 我更加好玄作者 ê 故事。
M̄ 知 tī 佗位讀著紹介講，伊是一本適合 bueh 成做台語老師 ê 葵花寶鑑。
彼時 hōo 一直想 bueh 有一本台語字典 ê 我按目睭金爍爍成做連想 bueh 爍一下攏 buē 閣想。
不過，因為太想 bueh 有一本台語字典閣加上總編輯是李勤岸教授 hōo 我按家己 ê 情緒叨撚轉做智慧生，準做無 bueh 成做台語老師，我相信這本詞典決定是葵花寶鑑。
因為...王秀蓉老師，我捌，韓滿老師，我捌，李勤岸教授彼愈免講就隨落單，就按呢伊成做我上重要 ê Muse 之一。
期待第二本。
書讀無半撇 m̄ 知論文生做啥物生張，總是規本冊讀煞，我 ē 感覺讀「論文」mā 是一件有意思 ê 代誌。
第一擺看著這本冊 ê 興趣無大，起因冊名就敢若作者 ê 後記「這本書是從我的碩士論文改寫而成」。
「論文」是 hōo 學問飽滇 ê 研究者來讀文寫文閣論文言文 m̄ 是 hōo 我這款倒吊無墨水 ê 人 kā 伊當做暝時尪仔冊來讀消遣。
不過，當我 uī-tio̍h 運費姑不而將閣踅翻頭 kā Books ê 冊櫃閣搜一斗原仔揣無家己意愛 ê 讀本，我想著德語課按 Iraq 來 ê Kurds 同學。
這位 Kurds 同學 uī-tio̍h 未婚妻願意重餾 A1.1 佮已經 tsham 我 tī 無相仝時間上課 ê 伊佮牽手兩人 tshan-tshiūnn 往過按呢，手牽手專工坐公車來我上課 ê 所在分張𪜶成做龍鳳 ê 快樂 hōo 我隨踅轉去 冊櫃揣這本冊讀紹介 tsiah 發見伊是 tsuē 冬前捌 tī gún-ê 箍仔討論 ê「愛情故事」。
每一个人 tuì「愛情故事」有家己 ê 認知佮想法，sòo-pái tuì 我來講無啥物好接續喋落去，總--是自新聞挖挖哇認捌作者佮牽手 ê 故事到這本冊一目𥍉十冬外，我 kan-ta 這个想法，無勇氣講偌愛攏是廢話，無獨立 ê 人格講偌信賴偌 buē 分級攏是虛--ê。
我 ê 佯青 tsham 冊無底代，總--是自新聞挖挖哇彼集閬縫到今接續第二集，真歡喜看著作者佮女朋友成做龍鳳閣有一个古錐 ê 後生，這是我讀這本冊上大 ê 感受。
Schloss Gondelsheim
世間萬代攏 ē 拋荒，唯一 buē 拋荒是咱 ê 慾望(io̍k-bōng)
5月1德國鐵路局開始實施49歐元坐全國
Gún mā tī 這日開始享受這僫得 ê 交通優惠專案出門四界行踏，票價限定 RE(普通車、平快)到 S-bahn(捷運)
這斗 ê 歇睏日 kan-ta 5月1號無閣加冗 通坐遠途，就決定照氣象局 ê 跤步行踏北爿曝日頭
總是人算總不如天一劃，本底 bueh 行踏 ê Baden.Baden tī gún 一到車頭搬車隨變天
(2023.01.11 早起頓 紅菜頭紅雞豆湯 + 番薯飯 + 菜擴雞肉 + 弓蕉時計果優格/989kcal)
翁寄若沙漠 ê Congee 出現 tī 𪜶 ê 電視台 ê 影片 hōo 我，隨 kā 揤 Play。
無揤無驚奇，一揤奇甲 m̄ 知影反應，總是每一个地區有家己 ê Exotisch。
M̄-koh 愛我照𪜶 ê 脾土按呢煮糜，我甘願成做 Hesse 筆尾內底彼个哭呻婦仁仁 kā 米煮甲若 Brei hōo 伊慼 ê 人。
不而過原仔愛講著生驚 mā m̄ 是一件歹代，起因伊 hōo 我想著阿母在生時看著就 ē 吼，吼 buaih 食 ê 番薯飯。
講著阿母 ê 番薯飯德國老輩 mā 有相𫝛見著隨吼 buaih 食 ê 番薯飯 -- 蚵仔菇。
這兩項我攏愛食。
歸結，我是好字運 ê 人。
(2023.01.11 早起頓 紅菜頭紅雞豆湯 + 番薯飯 + 菜擴雞肉 + 弓蕉計時果優格/989kcal)
你敢相信夢中 ê 你是掠外一个神魂。
我相信，我有一个朋友 gún 因為另外一个人 tuì 伊講寡代誌 ，就此 m̄ 捌相交插 20 guā 冬 mā m̄ 知影伊人 tī 佗落。
一暝，我夢著伊。
夢中 ê gún 猶原若往過按呢快樂練仙543，m̄-koh m̄ 知啥物因端悲傷 ê 海湧 mā 一直按我遮絞過來。
精神後隨上面冊、IG 遮 ê 社群媒體搜揣伊，總是我相信伊 tsham 我相𫝛決定 buē 使用家己家甲 ê 字名。
Sóo-tí 踅面冊、IG 遮 ê 網路媒體只是跋一个夢揣運氣 hōo 我有一个機會 tuì 伊會失禮。
一日 tī 網路搜揣朋友紹介 ê 影片 m̄ 知 uī-hô mā 順紲揣著伊 ê 名 hōo 四常 m̄ 敢烏白揤網站 ê 我隨成做好玄 ê 貓隨揤落去 mā 恬靜綴影片熟似這幾十外冬 m̄ 知影 ê 伊 mā 恬靜 tsham 伊相辭。
(2022.12.12 青花仔菜雞豆 + 魚指 + 塗肉林檎羮湯 + 弓蕉藍莓優格/961kcal)
文學是啥物？
M̄ 捌字智識低路 ê 我 m̄ 知。
M̄-koh，我知影當你攑著權勢 ê 拐仔，m̄ 管你講寡 lua̋-nī 無營養，伊猶原是上有營養 ê 物件。
我無向望家己是文學家 mā 無向望「文字」ē-tàng 𤆬 hōo 我名佮利，sóo-tí 拚勢寫。
我寫字 kan-na 因為伊是我 ê 興趣，tshan-tshiūnn 有 ê 人愛成做放送頭開喙按呢簡單。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
