![王梨葉仔酥 ▪ 鳳梨酥餅 @亂皂𥴊仔店 王梨葉仔酥 ▪ 鳳梨酥餅 @亂皂𥴊仔店](https://pic.pimg.tw/mayo18/1715175587-3566107376-g_n.jpg)
(2022.05.28 減肥早起頓 王梨葉仔酥餅。鳯梨酥餅)
今年熱人德國政府實施「自由選擇掛喙罨」,這个方案一實施反對喙罨 ê 人更加大聲講「你看我就講肺炎病毒是假--ê」,無想 bueh 掛喙罨煞驚人講閒仔話 ê 人 mā 敨放束縛恢復原本 ê 自在。
Gún 無啥特別 ê 想法,政府按怎講 gún 就按怎做,總是這个「自由選擇」tī 這个猶原 m̄ 知影「事實」是生做啥物生張 ê 日子,gún 猶原選擇掛喙罨 hōo 家己 m̄ 免捾一粒 pho̍k-pho̍k 跳 ê 心肝過日子。
實施自由選擇掛喙罨 ê 這禮拜 mā 搪著宗教節日,無佮意 tsham 人挨挨陣陣,gún 就選擇歇睏日 ê 前三工去超市款物件。
Tī gún 物件款甲 bueh 齊全 ê 時,一對規軀穿甲 buē-su 捷捷 teh 做運動 ê 某囝 tsham 我相拄搪,𪜶彼對自本就若牛目 ê 目睭褫(thí)做滿月 ê 月娘,本底就 bueh peh 上天 ê 嫦娥煞無細膩㧎 tī 大象 ê 身體。
我知影𪜶 ê 想法感覺,總是我 m̄ 是食香火過日子 ê 人 sóo-tí 感覺誠無自在,不過我 mā 已經 buē 閣遐爾仔𠢕起童綿精綴人 ê 態度 peh 崎閣落崎。
我照常款物件,起因「感覺」是個人情緒 ê 生湠,我有這款無自在 ê 感受決定 mā 受著家己認定 ê 主觀 teh 影響。
是,現此時 ê 我已經學 ē 曉目青盲、耳生研佮 mǹg-sǹg 保持距離 ê 功夫,除非我 ê 安全受著威脅我 tsiah-ē 跳童,sòo-pái 我 m̄ 免 tuì 這對某囝 ê 世界閒煩。