亂皂𥴊仔店 ⓂⒺⒾⓃⓀⒾⓄⓈⓀ

明仔載便當你 bueh 食敏豆抑是玫瑰草花？

我知影你愛敏豆，sòo-pái 我食玫瑰草花就好。

感恩你 ê 客氣！

一點仔攏 buē。

Buē 記得 tī tueh 讀著這 pha 新聞。

不而過，近來款「玫瑰草花」攏 ē 想著往過按臺灣飛來德國 kā tī 翁𪜶公司實習 ê 學生囡仔鬥攢飯包 ê 故事。

彼陣 ê 我鼎是扞甲無半桶好，這久 mā 是總是遐 ê 學生囝仔攏相信我 ê 喙斗，sòo-pái 我款 ê 物食𪜶 m̄ 捌成做 gún 翁 ê 副本「Nee 這 buē 食」，不過有一項食物 hōo 遮 ê 囡仔一看著菜單 ē 隨反應講𪜶確實無愛這味，彼就是「Rosenkohl」。

我 m̄ 捌請教遮 ê 囡仔是按怎無愛食這項 tuì 我來講比白草花抑是高麗菜閣較好食 ê 菜蔬，總是我尊存遮 ê 囡仔試過我手藝後 ê 分張 --- 飯包真正好滋味，m̄-koh Rosenkohl 真正 buē 敆喙。

這久寫遮 ê 故事猶 ē 想著綴飯盒轉來 ê 紙條仔，uī-tio̍h bueh hōo 我讀有𪜶寫 ê 字，逐个攏綴 leh kā 羅馬字寫甲若電腦刻出來 ê 清楚 hōo 我足感心。

我相信每一个觸著心 ê 事件攏有伊 ê 啟發佮提醒。

受訪者「我無認為我是瑞士人，正經，我一屑仔攏無認為我是遐 ê 人，m̄-koh gún 爸母確實是瑞士人。」

受訪者「我六個月大 hōo tī 加拿大揣著穡頭 ê 爸母𤆬來遮，瑞士我捌轉去 mā-ē 曉講瑞士德語，我猶是無認為我是瑞士人，正經講。」

受訪者「若是硬 bueh 講我佮瑞士 ê 關係 kan-ta 我 tī 遐出世佮爸母按遐來這層 niā-tiānn。」

受訪者「我 ê 生活過甲若瑞士，m̄ 是我佮意瑞士抑是認同瑞士，這只是承爸母教 hōo 我 ê 四常，像這久 ê 釣魚。」

今年露台影戲加一位前幾冬 m̄ 捌看過 ê 朋友「山雀」。

伊 ê 出現 hōo 慒心家己 kā 包袱仔款款出門掠外，繩 Like Amsel like your ma ê 「Amsel/歐洲烏鶇/Eurasian blackbird」mā 轉來。

看來，彼欉 hōo 我擘腹厝頭家若是 kā 剉掉遮 ê 鳥仔 bueh 蹛佗位 ê 問題，窮實是我家己驚惶 ê 投射。

是講，我 mā m̄ 知影是按怎家己 ē 遮爾仔愛驚惶，不過我清楚知影彼若是自囡仔時就慣勢 ê 自然，咱攏愛活 tī buē 振動 ê 慣勢內底。

彼欉 hōo 二樓厝邊嫌閘光 ê 相思仔已經 hōo 厝頭家剉甲連拄 ē 曉行路 ê 幼嬰仔攏有法度自自在在坐起去𨑨迌，花園 ê 鳥隻猶原無減半隻，甚至閣添新朋友山雀。

Bueh hōo 現實生活過著有意義，kan-na 創作 --- 川端康成

《拯救莎曼珊》(Saving Samantha)有一段話「感謝書寫」改變我 ê 世界 mā hōo 我揣著家己。

少年讀這本冊佩服作者黜臭挖空家己 ê 問題，這久我 mā 綴 leh 寫，總是人行到這个坎站有足 tsuē 代誌，m̄ 知是貧惰抑是 buē 閣綿精纏綴遐 ê 問題硩金龜磨，起因𪜶 tsham 遐 ê 人、事、物攏成做一陣風，揣無 mā buē 繼續專工揣風箱來挓火。

Sóo-pái 講過一擺、二擺就 m̄ 免繼續乞食扮嘉慶，假仙假觸，有 ê 無 ê 濫糝講到今，抑是拚勢換小鬼仔殼來妝娗家己設定 ê 人生，不過我有這个向望寫 Blog 較莫寫別人兜 ê 代，總是我是普通百姓，無可能完全無寫著別人兜 ê 代，sóo-tí 寫 Blog mā 成做我 bueh Seinen Senf dazu geben(發表個人意見)真重要 ê 關門著閂(tshuànn)，講話著看 ê 點拄。

𫝛時，寫 Blog mā 是廕 Ich koche vor Wut➀(風火著)佮 kā 電線生菜盤(Kabelsalat➀)好好仔整理 ê 當你 kā 盤食甲清清，明仔載就有好天氣(Wenn du deinen Teller leer isst, gibt es morgen gutes Wetter➀) ê 認真面對咱總愛三罐栽落 tsiah 有法度硩嗽 ê 癮。

早起精神翁看我 tī 面冊硞硞趖，伊問「你想著啥物代誌 bueh 分張？」

「無」

聽我按呢應隨 kā 大頭鬥過來「誠重要 ê 款」。

「四常來投講聽無抑是讀無 gún 攏 ē 講無重要，m̄-koh 這久誠實足重要」我𥍉這下仔目尾笑講。

兩个隨笑甲軟骨，起因看著國王無穿衫，咱 buē-tàng 講國王無穿衫，因為逐家攏講國王 ê 新衫蓋媠，看著人讀無字 ê 冊，咱 buē-tàng 講彼無寫字，因為逐家攏講天機不可露洩。

一冬按年頭行到年尾，我 ê Muse mā tshan-tshiūnn 西方 ê 年節 tī 這睏仔倒轉去圍爐無時間佮我盤撋 hōo 我規仙人見著電腦 m̄ 知 bueh 做啥代誌，總是烏陰天是食茶配冊 ê 好日子。

雖罔，烏陰天是食茶配冊 ê 好日子，我 mā m̄ 是彼款規日有法度佮冊成做米糕𣻸 ê 人，特別是一想著猶有 tsuē-tsuē hōo 家己感覺無整理 ê 事項就規个刺疫，像 Blog ê 相片文字更正(king-tsìng)。

我知影無人要意遮 ê 代誌，總是我要意，這个要意就 tshan-tshiūnn 有 ê 人認為出門就是愛化妝，有 ê 人認為 m̄ 免按呢 ê 簡單。

那調整文字，那更正相片文字，那增加按公視台語「台語智識辭庫網」mā 篩選文章佮食譜，我發見按 2019 到今 ê 家己有真 tsuē 變化，特別是我猶原 tī 網路賴賴趖 m̄-koh 這賴賴趖已經 tsham 往過無相𫝛，我 buē 閣 uī-tio̍h 一个生份 ê 留話跳童抑是無料提供我 ê 時間，甚至感覺無好禮仔佮人交陪是一件失禮 ê 代誌，我就是我，這个 Blog 是我無𫞼柴杙 ê 田園 m̄ 是刁工 uī 別人起造 ê 田園 tsiah 簡單。

按年頭行到年尾，除了遮 ê 事項，我 mā 開始清家己 ê 堅持，tshan-tshiūnn 本底猶 ē 踅 ê 開放面冊迷眾頁，這久規个攏筅黗，我無需要遐爾仔 tsuē ê 四常信息，準做彼當時是 uī-tio̍h bueh 得著第一手資料像新冊出版，總是 tī 這个信息窒倒街 ê 年間，你無揣信息，信息 mā-ē 自動挨拶，像頂站仔踅冊店，我 ê 手機仔 mā 開始出現「50 本年度最佳讀本」ê 紹介，特別是我是揣四角字，手機仔煞推薦肚胿仔字，這敢 m̄ 是「世界大同」ê 一款，sóo-tí 遐 ê 社群媒體𠢕人真正無欠我一人，是講我 mā 無 ka̋ng 揤讚我是 leh 做啥茶鈷呻 buē 離。

那食早起頓那配【台灣新眼界】20230419  "土豆"=馬鈴薯爭議！外來語的交流佮侵略！臺灣按怎面對？tī 節目 bueh 煞鼓進前揤暫停，愖一睏仔決定行向冊櫥 kā 彼本 hōo 翁暢甲 buē-su 著獎 ê 冊紮過來食飯店。

「你敢知影影片內底有你熟似 ê 人」我學 Jerry Maguire tuì 翁講。

伊那看定格 ê YouTube 佮我手捎 ê 冊講「tsiâ？」

我手指冊皮 ê 人，伊 mā 綴冊皮 ê 人斟酌蠅定格 ê 人講「你看每一个德國人攏相𫝛，我看每一个臺灣人 mā 是，閣較免講這久愛揣尪仔人。」

Mā 著，𪜶 ê 尪仔人大多數攏牽山 phuānn 林(nâ) ê 人物，除了得失 Picasso tsiah 有法度成做藝術品。

一目𥍉 mā 3 冬外，我猶原 tī 遮社群媒體 mā 無增加一个，我真愛這个四常。

一目𥍉 Icook ê 7工 Le Penseur 看起來是有申請猶是無應效，我猶原收 ē 著「你有新粉絲」。

一目𥍉無愛食秮仔 ê 翁成做秮仔 ê Fans。

人生正經是敢若和尚划船，無髮(法)度，tshan-tshiūnn 我是無料使用 Icook kā 𪜶申請口座刣掉，伊猶原規欉好好，有 ê 是咱掠做伊 ē 繼續田螺循舊逝，較行 mā 彼逝，tshan-tshiūnn 喙白 m̄ 食秮仔 m̄ 食米 m̄ 食雞心豆 kan-ta 愛食麭 ê 翁開始食魚食肉 mā 討菜來敆。 

人生--ah!

查某囡仔 tī 佗落？

查某囡仔 tī 佗落？

Tī 面冊𫝻著公視 ê 動物短片，我 kā 翁講我無想 bueh 繼續使用面冊，無使用面冊 tsuē-tsuē 按臺灣來--ê 影片我就無法就無地通看，因為「著作權」。

「按呢表示你足守規矩」翁講。

「這，我無啥確定」我笑應。

寢一站仔踮超市那看架頂 ê 報紙佮雜誌那等翁來遮 tsham 我會合。

過無偌久，翁徛踮我 ê 邊仔講「我透早讀著這條，m̄-koh 無 tsham 你破粒豆」。

「我聽無你 tī 講啥」我講。

翁指「Bild」，我 ê 目睭 mā 綴伊 ê 手按英國皇室 ê 「流言」踅轉來德國「耳風」。

「佗一條生言造語 hōo 你遮爾仔 m̄ 甘 tsham 我練仙」我問。

英雄 ê 精神是無形展現佮鏨 tī 人民 ê 心肝穎，m̄ 是靠墓牌保存。

---  Perikles

Tī 面冊讀著這段影片 hōo 我想著這件代誌。

踅面冊捷捷 ē 讀著「台語愛按怎行、按怎寫、按怎做」等等 ê 建言。

這个過程換另一个角度 kā 看，窮實 tsham 醫生 ê 分享相𫝛。

𠢕早

Tī-leh 搝鱟百冊 tsiah 發現規條街仔路已經 hōo 罩霧包圍。

啥物攏看 buē 著，啥物攏聽 buē 著。

Tī 這个宛然雺煙散霧 ê 世界，路燈峇微 ê 燈火就親像寒人 ê 日花仔 hōo 行 tī 罩霧內 ê 人 buē 驚惶。

越轉身斟一甌咖啡孤人坐踮窗仔邊聊聊仔啉，勻勻仔等待日鬚來行踏罩霧遠兜行 ê 時。

收著著賞包裹，代起先我無斟酌看擦仔。

起因，往過讀過 ê 資料多數攏是分張講「政府 kan-ta 愛𪜶規定 ê 彼味。」

意思就是通篇 kan-ta ē-tàng 寫教育部推薦 ê 漢字 niā-niā。

Sóo-tí，我 tuì 檫仔 ê 文體變化決定已經有所準備。

無疑悟，順 gún 翁 ê 好玄讀檫仔 ê 文字 hōo 伊聽家己 mā 綴 leh 發見驚喜，檫仔 ê 文體佮我本人寫 ê 文體一屑仔攏無變化。

翁 tī 抾字紙遐揣著有收 Theodor Storm 詩 ê 冊隨紮轉來 hōo 我。

論真講我這个倒吊無墨水 ê 人 tsham Theodor Storm 無蓋 熟。

不過，詩讀煞 mā 想 bueh kā 假𠢕 kā 伊翻譯做臺文。

雖罔，我知影我按呢做是漚柑鋪籠面，總是，我相信文章拳頭茶全捌了了 ê 人 mā 是經過加看思路廣，加寫筆生花 ê 階段。

作者 Theodor Storm

翁某有家己 ê 五里無仝風，十里無仝俗 ê 食頓慣勢，特別是雙人意愛 ê 物食無法度敆做伙，我愛按怎 kā 手頭 ê 秤仔提 hōo 在 buē 重欹爿，這是徒岫來德國進前 m̄ 捌愖過 ê 四常。

總是這个雙人𫝛桌𫝛箸無𫝛喙斗 ê 問題 tuì 我來講 m̄ 是 peh 青天按呢 ê 就準倩仙來鬥相共猶原無變撚(piàn-lián)，起因我無真依賴(i-nāi)亞洲食食，遮 ê 超市賣啥我就款啥 buē uī-tio̍h bueh 食一塊豆腐家己撆手䘼抑是坐火車到點外鐘 ê 大城款豆腐。

我按呢寫 m̄ 是表示家己偌爾仔好喙斗，我按呢寫只是 bueh 表示，入港隨灣，入鄉隨俗，遮有啥物物我就綴遮 ê 物做我意愛 ê 物食，像金瓜 tī 臺灣我 kan-ta ē 曉提來𤉙雞肉濫豆油，來到遮我學 ē 曉捎來烘做飯食。

遮爾仔𠢕入港隨灣，入鄉隨俗 ê 我，猶是無法度入人門，順人意纏綴另外一个問題過日子，彼就是順翁自囡仔時就慣勢 ê 態度，只要無合伊喙斗抑是看無目地 ê 事項，伊隨 Nee 甲我掠做家己正經無尊存𪜶德國人 ê 文化。

總是，我 m̄ 是無自信抑是 m̄ 捌看過四海 ê 人，伊 ê Nee 真緊就 hōo 我摠著龜跤佮知影按怎節脈治病佮燃茉(bua̍h)草來治伊 ê 病症佮避邪，不過現此時 ê 我 kan-ta 有法度挽茉草避邪猶無法度 kā 針灸(Tsiam-kù)，起因我猶未摸著膏肓，準做伊認為伊無病到膏肓，我猶是斟酌 teh 揣，畢竟 gún-ê 紅線是縛甲比 gún 爸母中國佮臺灣閣較遠 ê 遠，另外 gún 2 个人正經是 You and I, we were meant to be I feel it in my soul Feel it in my soul，一日若是愛分離決定 m̄ 是 gún 其中一个做 m̄ 著代誌抑是無感情，sòo-pái 我願意放下本底 ê 個性，門扇枋鬥 buē 峇就莫鬥 ê 繼續佮伊做陣調角度 kā 門扇枋鬥 hōo 合，真正 ê 合 m̄ 是𪜶兜彼款假包 ê 空榫峇甲 m̄ 免倩小木大木來敆榫。

凡勢是我無理解意思或是我較頇顢理解回函 ê 意思，致使閣寫一斗 ê 光批猶原恬寂寂。

總是，我小面神我家己 ē 稽考 gún 翁捷 tuì 我講 ê In Deutschland gibt es nichts kostenlos (踮德國無啥物是無料)。

㧎牢 ê 礙虐就隨敨放--ah。

Buē 纏綴礙虐金龜磨，mā 隨家己動手做手工。

寫到遮愛呵咾面冊。

讀新聞讀著「註銷文化」，我想著這件代誌。

踮這个網路利便 ê 世界，你想 bueh kā 家己註銷 mā 是一件真僫 ê 任務。

起因，咱 m̄ 免迵過別人 tuì 咱氣持ち敲油，咱家己就真𠢕 tuì 家己敲油。

是按怎無人來我 ê 網頁行踏，我寫甲遮爾仔好，相片翕甲遮爾仔專業，一切手路攏遮爾仔十全。

我無這个症頭，總是我真愛註銷家己。

近來發見，公視《臺灣新眼界》是我練習臺語 ê 好朋友。

M̄ 是我臺語 buē 曉講抑是誠𠢕說，總是若是聽著來賓 īng 華語表達，我就自動切換頻道 tshan-tshiūnn 學習英文抑是德語按呢。

Sóo-tí，見若有法度 kā 來賓講 ê 話隨對應做台語，彼款感覺著敢若得著頭賞按呢遮爾仔歡喜，起因我感覺家己 ê 臺語又閣加進步一寡仔。

白花菜珠仔豆飯

踮這个訊息窒倒街 ê 年間咱 ē-sái uì 著一个從來 m̄ 捌相借問抑是見過面 ê 人，氣身惱命、心心念念、扶扶挺挺做口彩，越頭就隨 tuì 咱 tuì 上親 ê 親人挽筋捘頷變䆀猴。

這是一日佮伊做陣討論問題，伊猶原 m̄ 承認伊承著𪜶爸母 ê 喙斗，敕一口喙 hōo 家己 tuì 伊有法度冷靜講 ê 話，這段話 mā 成做日後 bueh 成做六月蚶，開喙臭進前，愛捎一隻鐵攕仔斟酌揣火種。

我人頇顢閣較 buē 踅網路隨請教伊我搪著 ê 問題，伊開始成做《大士爺厚火氣》讀著 ê 這段；

福祿壽三仙問哈囉「樹仔大欉擲果子，人若受氣擲手機，飛機上天擲啥物？」

學問蓋飽的城隍擋袂牢講，喝出答案：「擲炸彈啦！」