亂皂𥴊仔店 ⓂⒺⒾⓃⓀⒾⓄⓈⓀ

揣無資料就順 Wikipedia ê 號名 kā 伊號做雞豆 ê Linsen(DE)佮 Lentil(EN) tī 目睭雄雄走出烏面賊，想著抾拾 ê 阿母雄雄按台灣敲電話 hōo 人 tī 中國 ê 我 ê 往過「我珠仔攏換好矣，免煩惱」彼个一直感覺誠無適合 ê 雞豆隨反頁。德文 ê Linsen tī 醫學是目睭 ê 水晶體，tī 食物就是現此時 bueh 記錄 ê 減肥助手珠仔豆。感謝老人囡仔性閒閒罔話仙 hōo 我確定，海馬無烏白亂走。

記錄珠仔豆我，我佮 WAS WIR ESSEN - Hülsenfrüchte: Obst oder Gemüse? 𫝛款好玄豆仔類 ê 珠仔豆，伊是果子？菜蔬？五穀米糧？畢竟我愛 211。講著 211 ê 一个手掌大，我一直掠做伊是手指頭仔 mā 算在內，一日看新聞挖挖哇看營養師分張 ê 圖 tsiah 知影是一个手捗大，我隨好玄是我華語理解能力無夠抑是現此時閣有新 ê 講法，像我慣勢講影片，現此時 ê 人若較慣勢講視頻，隨請 Google 大神開示，大神引𤆬我行踏這間廟，廟內底有詳細 ê 紹介。這个變來變去 ê 講法 mā hōo 我想著德文 ê 風颱聲音媒體攏講 Hurricane，文字媒體攏寫 Orkan hōo 進前無追美國新聞 mā 無繩德國新聞標題 ê 我一直掠著 Opera News ê 標題 teh 講 Okra(胃豆)。

我有 teh 跟綴 211，總是我 tuì 肉一个手捗大 ê 量 mā 無掠甲足詳細，211 ê 兩份菜蔬 mā 捷超磅，總是衛生福利部 ê 我 ê 糜飯盤仔，早晏一杯牛奶，水果拳頭拇大，菜比水果 tsuē，豆魚卵肉一手捗，飯佮菜蔬仝款 tsuē，𠕇仁一湯匙攏有食到額。總是遮是德國 m̄ 是臺灣，準做這个地球已經無國界，較早種 buē 出番薯 ê 德國 mā 種出番薯，兩爿 ê 食食文化猶是無相𫝛無法度完全縛做一伙。

 因為料理珠仔豆 hōo 我想著人 tī 瑞典回答甜粅粅食過頭想 bueh 翻頭解決腹肚桶仔 ê 翁講 ê 話「Linsen ist kleiner Helfer zum abnehmen」mā 想著前幾日看 ê 影片，請求者過磅醫生請總舖師教伊做料理，料理菜色有一份就是珠仔豆餅配 Quinoa，這个畫面又閣 hōo 我成做一隻貓，珠仔豆佮 Quinoa tī 營養分類 m̄ 是攏是五穀米糧含水碳素，請求者有糖尿、高血壓、高血油按呢食有伊 ê 理由，總是猶原無法度解釋珠仔豆是水果抑是菜蔬 ê 問題。

請教 WAS WIR ESSEN 我 ê 想法 mā 這是 Diese Frage ist doch an den Haaren herbeigezogen 按頭毛紮來 ê 問題，專業問題教 hōo 專家頭疼，平凡老百姓 ê 我 kan-ta 需要要意我 ê 糜飯盤仔，畢竟健康 ê 物合脾土 mā 是無較縒。 

較早傍別人 ê 圖，今仔日成做自立一人。

故事講幾仔回，m̄ 捌搪過 ê 人抑是選擇致著失憶症 ê 人攏 ē 講「我聽你 teh 講漫画，咱臺灣呔有這款代誌」像咱臺灣從來 m̄ 捌食過美國炸彈 m̄-koh hōo 咱勇壯 ê 牛奶佮麵粉。

我 ê 睏眠時間真固定，較按怎成做暗光鳥 má 無法度渡過 12 點 tshan-tshiūnn 塗炭仔按呢。總是阿霞 ê 故事 kā 我規个情緒縛佮伊做伙 hōo 我雙目成做 m̄ 願開喙 ê 蚵仔 mā 硬 bueh kā 撬開閣𫞼撐篙。

冊讀煞，手機仔捎來看時間，夭壽骨，讀一本冊讀甲若 tī Bangkok 等紅目班機飛德國仝款忝頭，只不過這久 ê 忝頭閣添一味，茶鈷呻 buē 離 ê 哭呻。

作者呔 ē 遮爾仔無人情，無 bueh hōo 阿霞佮臺灣麵包樹成做龍鳳，是按怎 bueh 按呢 kā 𪜶拆做天間佮凡間，是按怎，是按怎，是按怎。

近來 YouTube 一直放送 Maggi ê Masala 利便包 hōo 我想著去年跟綴 Google 臆你佮意 ê Kheema Masala 隨揣出來熥 mā 那熥那繩伊誠 Somewhere in time 火燒豬頭，面熟，隨照記憶 ê 文字請示 Google，Google 果然是大神隨 hōo 我正確 NON-NO --- Savoury Mince。

大神𤆬入門，賰 ê 靠家己，一字一字斟酌繩 Savoury Mince ê 做法，發見除了芳料無相仝賰 ê 無宛 2 體 ê 相𫝛隨閣越頭請教 Google Kheema Masala 這斗見著 ê NON-NO 添別 ê 版本，彼就是 kā 肉換做黃豆。食食正經是世界大同，無分你我 ê 互相學習，互相變化。

Kheema Masala 美味しい

Ē 記得 tī 日本 ê Wiki 讀著「絞肉」mā ē-tàng 寫做「 挽肉/ひきにく/Hikiniku」就閣一斗請教日本 Wiki 得著 ê 答案是無剉(錯)，規欉好好。

前幾日 Google 推薦我看西南電視台近來又閣暫時無放送 ê 節目 hōo 我想著這篇隨越頭 tuì 翁講「你 mā teh 耍好運得時鐘，歹運得龍眼。」

「我有一个好牽手。」

「我確實是一个好牽手，總是你家己無覺醒 mā 是了然。」

一位已經得龍眼 ê 先生知影家己 ê 身體 buē 堪得伊繼續烏白舞落去，寫批 hōo 電視節目請專家 kā 伊鬥相共，專家 mā 針對伊 ê 問題提出改善計劃，不過效果無啥大，起因佮伊𫝛款體格 ê 牽手 m̄ 願 kā 鬥相共，甚至認為伊佮𪜶翁婿藥仔攏照起工來食，呔 ē 衰甲若梨仔像專家講 ê 閣差一步就斷腦筋，這位太太按呢 ê 想法，我 m̄ 知影愛算伊樂觀抑是世間上大隻 m̄-koh buē 曉飛 ê 駝島？

總是，𪜶翁知影手頭 ê 藥仔食甲盡磅猶原無法度改善身體 ê 無四序，sóo-tí 𪜶翁放手 hōo 伊飛，家己一个人跟綴專家 ê 分張沓沓仔按漉糊仔糜泅出來。

2021 冇蟳夯籠 m̄ 知見笑，冇蟳無膏 m̄ 驚人笑 tī 台語社團以低路 ê 智識分張法國作家紀德 (André Paul Guillaume Gide)《一粒麥子》(紀德逝世六十五週年紀念．人生二部曲之一)，我 ê 低路智識 mā 順這本冊成做落塗 ê 麥仔發穎生湠，台文里長伯鄭順聰先生分張《拍破臺語顛倒勇》，拍破臺語顛倒勇 ê 紀德篇生湠到顧德莎 ê《我佇黃昏的水邊等你》，按顧德莎我認捌著詩人寫一首押韻，格律整齊 ê 作品，講伊 m̄ 是詩，是小說，小說家寫一篇無押韻，無格律 koh 無分行寫 ê 作品，講伊 m̄ 是詩。是詩，m̄ 是詩，自 19 世紀就花 sah-sah➀。

冊櫃有一堆台語詩，除了《 iPad kap 杯仔》佮《我佇黃昏的水邊等你》讀有意思賰 ê 齊是青盲牛捌字 m̄ 捌意，這敢是《台灣人台灣事》【台語。生活】電子報「做伙來讀〈13，15 hia〉」：「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58）ê 一粒麥仔無落塗，猶原是一粒麥仔，一粒麥仔準做落塗，無按 Einkorn（一粒麥仔）湠做 Emmer（鐵殼麥仔）, Dinkel（斯佩爾特麥仔）等等 ê 後代，伊猶原行向死亡，像二戰後 ê Dinkel。

厝內空間有限，書櫥腹肚 mā 有制限，無想 bueh 掠外添書櫥，沓沓仔交無料收藏 ê 食譜冊斷、捨、離 mā 殘殘 kā 當初 ê 驚惶，驚惶無 kā 台語詩鬥相伨，伊就走甲連一絲仔風 mā 揣無 ê 台語詩送入紙箱。

作家 ê 任務是 kā 大眾講出重要 hām 必要 ê 代誌，那疊書，托爾斯泰步頻徛在眼前，收入紙箱 ê 冊一本一本挈出來，閣殘殘 kā 伊分類，這兩本詩 m̄ 是詩是行入我心肝穎 ê 愖，是我心目中 ê 行向台語文學彼條湖邊的路。

我 buē 曉寫詩 mā buē 曉讀詩，總是我有才調 kā 詩讀做 m̄ 是詩。

這站仔因為疫情 ê 關係較少坐公車行踏別庄 bué 亞洲食物，彼陣 ê 翁 mā 猶有機會逐日做蜂飛，總是社會經濟就敢若水沖，無水伊就 buē 閣繼續沖。

這斗第三斗 ê 封城，翁無法度繼續做蜂，跔 tī 厝 ê 伊開始 kā 我當做太陽公轉 mā 若 Watsons ê 放送頭一直熥「你敢 bueh 去 bué 菜，我 ē-tang 載你來去」hōo 我提早感受伊 ê 退休人生。

因為疫情，我 mā 按一禮拜款2 ~ 3 擺菜改做一禮拜，這久因為伊 ê Watsons 人生 hōo 我決定提早解封，踅轉來早前 ê 慣勢。

「厝內無越南米粉遮 ê 物，這久 ê 你敢有閒載我去泰國太太遐款物？」

早前貧惰坐公車去泰國太太遐， bueh 請伊載我去攏愛斟酌撨伊願意 ê 日佮時，這久啥物攏免撨隨應「敢這馬 bueh 出發?」

3 冬前款這碗湯，翁 ê 態度佮恁老母掠著牛肉麵內底有薟隨做出「我誠知機你想 bueh 毒 gún 翁」ê 表情，3 冬後因為我 ê 痟貪險 bueh 軁雞籠進前想著 Blog 有記錄一篇番仔薑湯隨搜出來消化彼袋 3 公斤 1.99€ ê 番薑仔。遮 ê 番薑仔金常一袋 500g/1.59€(特價)，烏露戰爭拄開始捌起甲紅色規包 2.29€，三色番薑仔 3.49€。

3 冬後湯款好我無特別交代主要食材是啥物 hōo 翁家己去愖我葫蘆內底賣啥物藥，起因我 tuì 彼个表情佮態度到今猶是彼陣 ê 反白睚 buē 跟綴伊 ê 話踅金龜磨。

「番薑仔湯好食」翁食一喙隨笑微微 kā 我褒唆。

我清楚知影這是商詳後必捧 ê 客氣話「你若無佮意 ē-tàng 家己攢糜飯」我那食家己 ê 額那應。

有嫌有哭呻果真有差，林檎總算無閣 tshan-tshiūnn 水龍車 bueh 拍火一路無擋按呢直直衝衝衝 hōo 我 kā 林檎當做架頂鼓仔燈一爍紅一爍青順伊 ê 青紅燈變化平安行過斑馬線(pan-má-suànn)。

這禮拜(10.7~10.12) Lidl lohnt sich 總算正經 lohn sich(大碗閣滿墘)，林檎無分紅皮抑是青皮齊 1 公斤/1€，遮爾仔迷人 ê 數字無傱去款一袋轉來囤呔 ē-tàng 隨佮翁商詳伊 bueh 佗一色，畢竟林檎踮 gún 兜 tuì 伊較有銷。

色緻商詳好勢，伊向東軁，我向西飛，翁仔姐仝心成做豬仔鼠囤貨(Hamsterkäufe)。

按自本 ê 性地林檎一斗愛 bué 2 公斤 tī 翁猶末開喙我 ē 隨講「德國林檎窒倒街 m̄ 免痟貪」經過 2 冬 m̄ 捌 tī 寒人款林檎 ê 我 m̄ 免翁開喙家己隨開喙「這禮拜 ê 林檎價數誠媠 bueh 囤貨無？」

2 公斤 ê 林檎十外粒，無愛甜粅粅 mā 無愛生食 ê 我，除了濫優格佮煮湯猶閣有啥物滋味通變化？

古都 ê 故事留 hōo 古都家己去說。

踮遮我 kan-na 想 bueh tuì 追求清芳氣息 ê 人致意。

涵空龜掠做挪威三文魚 kan-ta tī 臺灣佮德國戶橂較懸門楣，這斗跤花猶未行到挪威踮瑞典見著挪威三文魚 m̄ 管新沢抑是冷凍 ê 數價攏 hōo 我驚甲食拳頭。瑞典是挪威 ê 厝邊，三文魚 ê 價數竟然比德國閣較無媠面 hōo 我認真思考厝邊 ê 分張「瑞典 Tshì-sù 俗閣豐沛，在地挪威三文魚無比德國較俗價」，押尾證明若放送頭 ê 厝邊無烏白亂炸，挪威本土三文魚正經比德國較懸價，不過挪威 ê 魚指比德國俗 bueh 2 倍 ê 價數，遮 ê 魚指又閣按德國進口，按呢 ê 懸低坎價數 m̄ 知敢佮德國人無愛食魚臊有相干？

按瑞典挪威轉來到今，猶有心情整理彼久 ê 行跤花，這久翻頭整理出發進前 ê 攝相見著三文魚隨 kā 手指仔伸出來算，瑞典個外月無食半尾，挪威食過兩斗，而且閣是利用 Kiwi 無要求人客愛攄𪜶 ê 會員卡就有 ê 會員價，4 塊一包裝，冷凍，換做歐圓 17塊左右，17€ 踮德國 ē-tàng bué 一尾按挪威新沢三文魚。

德國三文魚 Lidl ê 價數，一公斤 19 ~ 22€，特價 ē 落價到 15€，像這禮拜 10.7 一公斤新沢三文魚 14.99€。是啥物因端造成挪威三文魚遮爾仔戶橂懸過門楣 hōo 我到今猶捎無摠頭，起因人 tī 挪威見著 tsuē-tsuē 當地 bué 魚罐頭佮蝦罐頭，無 tshan-tshiūnn 德國人較 bué 攏加工煙腸，包裝一開就通食彼款。

9 月半按捷克轉來三文魚 ê 價數猶原維持四常價數 hōo 我想著，挪威有講 bueh 起價隨 kā 目標囥 tī 冷凍白跤蝦 1公斤 17€，無好鬥陣猶是比三文魚好鬥陣。

頂禮拜三文魚開始大落價，這禮拜白跤蝦拄拄好銷甲無半尾 ē-tàng 接續來囤貨，順紲 kā 攝甲無佮意 ê 相片換掉，一想著這規仙人就若圓仔按底烰出來。

「今仔日呔 ē 想著這味」翁問。

「閣 kā 你飼米抑是秮仔，你 ē 綴 leh 喝講，不可思議，十外冬攏是仝一个查某人，愛換人。」

「我若繼續喙白，真正 ē hőng 換掉....」

「知影就好。」

這 tī 往過三不五時就款來食，自跟綴醫師好辣聽來 ê 1400kcal/日，我就 m̄ 捌 hōo 伊出現過，起因我保存 ê 食譜是一斗 250g 麥片敆 100g Tshì-sù，這兩項敆做伙隨超磅。

我看起來烏貓貓無媠，m̄-koh 保證好食甲 hōo 你擉舌

聽《公視台語台Podcast》S2EP16 - 出名人請借問 - 我們的島陳信聰談著有一个網站 ē-tàng 請教台語植物名 mā 談著𪜶 ē 分張這个網站 ê 連結，較無耐性讀紹介 ê 我，節目一收聽結束隨斟酌繩紹介兼揣連結，總是 m̄ 知影敢是我 teh 使用 ê Google Podcast 佮人佮無相仝，起因我揣無連結，m̄ 死心隨請教公視台語台 ê 面冊 mā 是揣無....

O.K. Das Schicksal wollte es so. 運命就是 bueh 按呢按排，我就莫遮綿精狗咬鐵釘，m̄ 願放。

起因， Es sollte so sein，時間一到自然 ē 相會。是講到今我猶 m̄ 捌佮𪜶相會，請教公視台語台 ê 新辭到今 mā 無聲無息。

Das macht den Kohl nicht fett，這按草花來 buē hőng 大箍，我請教 ê 辭 tuì 公視台語台來講凡勢是無重要 ê 代誌，我家己 mā 愛學 ē 曉莫免意這無聲無息 ê 請教。

有一句話三日無餾 peh 上樹，出門一逝轉來，竟然 buē-kì 愛按怎使用信望愛台文輸入法，tsit 个現象 hōo 阮翁笑講，sńg kah siunn 過歡喜。確實是有影，tsit 逝 ê 行跤花 hōo 我印象難忘。

除了，抾拾 ê 翁步頻煩惱錢，煩惱阮 khai siunn 濟錢食餐廳，我理解伊是一位抾拾 ê 人。

M̄-koh，伊 ê 抾拾有時仔會 tsiânn 做一个錢拍二十四結 hōo 我 tsiânn 做䆀猴 tsham 伊 sann-tak-tshuì。

不而過，減采是有歲數矣沓沓仔感覺 tsiânn 做 䆀猴 tsin thiám，tuì 翁仔某 ê 感情又閣無助益。Tsit 回我 kā 雙手佮雙跤伸 tshut-khì tuì 伊講，tiàm 臺灣阮會講 khì 人兜𨑨迌無 tsah 伴手號做兩莢弓蕉，lán 一逝路 uì 德國來波蘭行踏 tsah 四莢弓蕉，波蘭無棄嫌 lán 凍霜 koh 家己紮四項等路來歡迎 lán，你 kám buē 感覺家己是有福 ê 人有食閣有掠，m̄-bián 過 tsit 款人已經離開德國，猶原食德國煙腸 ê 日子。我 kā 倒手伸出來，大頭姆藏起來講「田園若有收，鳥隻食得偌」lán tsit 隻鳥仔 tsit 回 tsham 你做伙出門行踏 beh 一個月，食你 tsit 位大頭家4回，大頭家你若是感覺 lán siunn 𠢕食會 kā 你 ê 田園滿厝間食甲無半間，lán ē-tàng 買賣算分，相請無論，因為 lán lóng 食杮粿，雙爿囤家伙 ê 人。

烏牛大影，好看無好食。

我一直迒 buē 過我認定 ê 藝術又閣無興繼續攢這味就愛家己撨骨 hōo 家己有法度繼續臭頭包布，防蠅(風神)。

這斗 ê 做法是循往過行踏捷克無張持搪著 ê 好滋味，專門提供做穡人食頓 ê 食堂其中一項菜色酸菜炕肉，是講彼日 mā kan-na 這份菜色無別項。 我 tuì 酸菜 ê 印象按遮來巡 ē-tàng 看出伊 tuì 我有偌爾仔無路。不過自彼日 tī 捷克 tsham 伊相拄搪，酸菜成做我意愛 ê 菜色之一，不過 m̄ 管我按怎跟綴 Google 籤詩來 ê 煮食，伊猶原是一粒田螺煮九碗湯 ê 無味無素 hōo 我憢疑家己 ê 舌，凡勢出問題。總是，好里佳哉，捷克無偌遠，波蘭 mā 是，見感覺家己 ê 舌有問題 mā 有機會行踏這兩个角勢就隨款酸菜來試鹹汫，見試無一擺無想著囡仔時上愛 ê 鹹菜鴨。

我 m̄ 知影德國酸菜敢是自較早就遮爾仔酸，總是我清楚知影德國 ê 食品加工厲害甲 hōo 你食甜猶原感覺食酸，像這份報導罐頭草花。另外，我 mā 一直掠做草花料理攏愛切絲 tsiah 有好滋味，押尾 tsiah 發現代誌 m̄ 是戇人我想 ê 遮簡單 mā 漸漸揣著逐條幼甲若絲佮逐條若指頭仔無仝大條 ê 滋味有啥物精差。

這篇記錄原本是記錄白草花炕肉，總是這按 Google 求來 ê 籤詩無敆我 ê 喙斗，我就愛 kā 換新衫。

因為捷克白草花 hōo 我按本底是 Es sollte nicht so sein 無緣 ê 白草花轉做 Es sollte so sein 有緣，這幾日𫝛款是無緣 ê 紺草花開始 tuì 翁上童並呻我是大細目，懸低耳。

「我 tsiah 無大細目，懸低耳，是你無鹹無纖」

「我 tsiah 無無鹹無纖，是你 buē 泅嫌溪狹」

「你 m̄ 通有 sui 無 kuānn，烏白講話」

「這是水晶鐘，照玻璃 ê 清清清，你講別人 A-ta-mah-khòng-ku-lī 你家己 mā 是」

M̄ 知這位 hōo 中國人號做阿福 ê Peru 同學猶閣 tī 德國開 Ka-pi 廳，總是近來準做無 teh 追踪這葩新聞，手機仔佮電視齊自動放送黎巴嫩佮以色列 ê 戰爭 hōo 我想著阿公𤆬規家伙仔按黎巴嫩徙岫到 Peru 定根生湠 uī-tio̍h 囡仔 mā 跟綴阿公 ê 跤步 ，按 Peru 徙岫到德國 ê 伊。

我佮這位同學窮真講無熟似，起因 gún 無跟綴別人 ê 跤步 hōo 一个老師按一年𤆬到六年，gún mā 清楚知影除了上課 4 點鐘有機會做伙破豆，賰 ê 猶是孤人過孤人 ê 四常，畢竟 gún m̄ 是留學生，逐人 ê 素質 mā 無一个固定，我 ê 14 是這款德語課無分語言基礎，sóo-tí 大多數 ê 人猶是 tsham 家己相𫝛語言 ê 人做伴 buē 佮其他 ê 人盤撋。

我 m̄ 知影別 ê 人敢有我這款情形，總是我佮 Peru 同學 hām 加拿大同學攏有相𫝛 ê 經驗，下課捷是一个人等十分鐘過。

我 m̄ 知影這位 Peru 同學敢猶閣 tī 德國，總是見款番麥抑是花豆攏 ē 想著伊，特別是最後一工伊攢一份 Peru Ceviche(Lê-bóng 魚刺身冷盤)閣敆一大份肨奶甲若龍眼 ê 番麥講「你知影薑按秘魯來 m̄-koh 我相信你 m̄ 知影 gún Peru 有這款番麥」當做 gún 有緣再相 ê 相辭禮。

我 m̄ 知影這位 Peru 同學敢猶閣 tī 德國，總是伊分張 hōo 我 ê 故鄉特色是點拄我，準做十八港跤行到到，世界猶是曠闊甲 hōo 我 m̄ 知伊是啥 ê 隨時愛做貓，m̄ 通 hōo 慣勢飼甲 buē 記持好玄是啥物。