(2023.12.18 早起頓 ひき肉米蘭草花白醬滷 + 清飯 + 優格/904kcal)
Tī《讀台語,學科學科學，讀台語 Tha̍k Tâi-gí, o̍h kho-ha̍k》讀著〈是按怎來美國生活了後定定予人大箍？Sī-án-tsuánn lâi Bí-kok sing-ua̍h liáu-āu tiānn-tiānn hōo-lâng tuā-khoo〉我笑甲邊仔 ê 人掠做我見著啥物好笑 ê 影片 mā 文文仔笑 kā 目神細膩徒來我遮䀐。
轉來到厝，裘仔猶未褪隨 tuì 佮手機仔黏相倚 ê 翁講「我揣著一年膨風 15 公斤 ê 因端，起因我是泰國族群。」
「你底時又閣透著泰國血統」目 m̄ 捌離開手機仔 ê 翁問。
「咱攏 m̄ 知影咱有透著偌 tsuē 血統，總是按科學研究我有綴著泰國族群 ê 跤步」我講。
「Die Ernährungs-Docs 又閣出新 ê 集數」翁問。
「講臺語 ê Die Ernährungs」我隨 kā 手機仔畫面分 hōo 伊看。
「彼是美國人」翁隨講。
(2023.12.11 早起頓 米蘭草花雞肉飯法國焗 + 木瓜/1005kcal)
我相信每一个觸著心 ê 事件攏有伊 ê 啟發佮提醒。
受訪者「我無認為我是瑞士人，正經，我一屑仔攏無認為我是遐 ê 人，m̄-koh gún 爸母確實是瑞士人。」
受訪者「我六個月大 hōo tī 加拿大揣著穡頭 ê 爸母𤆬來遮，瑞士我捌轉去 mā-ē 曉講瑞士德語，我猶是無認為我是瑞士人，正經講。」
受訪者「若是硬 bueh 講我佮瑞士 ê 關係 kan-ta 我 tī 遐出世佮爸母按遐來這層 niā-tiānn。」
受訪者「我 ê 生活過甲若瑞士，m̄ 是我佮意瑞士抑是認同瑞士，這只是承爸母教 hōo 我 ê 四常，像這久 ê 釣魚。」
這是 3Sat 看著 ê 紀錄片 mā 是開破半路參加節目就隨掠受訪者是回泅三文魚 ê 我理解這 m̄ 是倒轉去家鄉 ê 故事，mā hōo 本底想 bueh 踅台 ê 我開始停跤繼續看落去上重要 ê 一節。
「你外省人！」
(2023.12.02 早起頓 番薑仔ひき肉秮仔飯焗 + Quark/907kcal)
今年露台影戲加一位前幾冬 m̄ 捌看過 ê 朋友「山雀」。
伊 ê 出現 hōo 慒心家己 kā 包袱仔款款出門掠外，繩 Like Amsel like your ma ê 「Amsel/歐洲烏鳥/Eurasian blackbird」mā 轉來。
看來，彼欉 hōo 我擘腹厝頭家若是 kā 剉掉遮 ê 鳥仔 bueh 蹛佗位 ê 問題，窮實是我家己驚惶 ê 投射。
是講，我 mā m̄ 知影是按怎家己 ē 遮爾仔愛驚惶，不過我清楚知影彼若是自囡仔時就慣勢 ê 自然，咱攏愛活 tī buē 振動 ê 慣勢內底。
彼欉 hōo 二樓厝邊嫌閘光 ê 相思仔已經 hōo 厝頭家剉甲連拄 ē 曉行路 ê 幼嬰仔攏有法度自自在在坐起去𨑨迌，花園 ê 鳥隻猶原無減半隻，甚至閣添新朋友山雀。
動物面對咱人類無講無呾 ê 改變，𪜶有法度自然綴這个改變繼續自在生活，是按怎我愛按呢 kā 家己縛 tī 見 buē 著 mā m̄ 知伊敢 ē 照我設定 ê 戲文來搬戲 ê 未來遮爾仔慒心，我正經是食飽換枵。
是講按呢自我對話，我 mā 好玄遐 ê 綴日鬚踅圓箍 ê 鴟鴞，敢有興趣 tī gún 遮停跤？
(2023.12.01 早起頓 菜擴雞肉麵法國焗 + Quark/1004kcal)
「你敢 ē 驚人已經行到耳順這坎站」 邀請 gún 做陣迒年 ê 主人家輕輕仔幌一下仔頭兼峇文仔笑講「buē，m̄-koh 我足驚健康無去」話 tsiah 濆出喙紅酒隨斟落 hōo 我想著李勤岸教授分張 tī《青春寫真》ê 心梗塞故事 。
2023 熱人，翁 ê 這位朋友佮李勤岸教授仝款，天猶未光心臟就 kā 伊喝醒，因為伊有食薰 mā 捷捷 tī 三更半暝 hōo 雄雄挨拶 ê 嗽舞甲失眠，伊就起床一个人坐踮客廳那看電視那食四秀仔配一杯紅酒等拆箬。
四常 tī 伊 teh 等拆箬，伊猶有法度因為紅酒佮四秀仔 kā 睏神(Sandmännchen)唌過來 hōo 伊閣小小仔瞇一下，這斗 m̄ 管伊按怎延睏神，睏神就是 m̄ 來相揣，顛倒 kā 疫病神(やくびょうがみ/Yakubyōgami)揣來佮伊做伙喝拳拚輸贏閣喝甲電公電母 mā 來摻一跤，伊 tsiah 發見閣按呢家己節脈 m̄ 免 tuì 家己講慢慢仔是，免驚惶，是直接上車往西方，隨錢包仔提 leh 按病院出發。
人一到病院急診室猶未開喙講病灶，護理師隨叫先生來，先生 mā 隨問胸坎敢有疼，伊應有，就隨 hőng 送去開刀，紲落來 uì 手腕(uánn)囥引導管。
Tī 伊 teh 蹛院 ê 期間，伊無講著伊有心梗塞 mā 無講伊裝幾支弓仔，總是當 gún 翁 kā 伊蹛院佮治療 ê 狀況講 hōo 我聽，我第一个想著就是心梗塞，起因按《醫師好辣》看來 ê 智識有講著查某人因為ホルモン得著心梗塞 ê 機會較無查埔人遐爾仔懸，m̄-koh 這無表示查某人 buē 有這个病症，特別是有食薰 ê 慣勢。
彼日聽翁朋友按呢應，我 m̄ 知影是伊 tuì 家己 ê 健康真有把握抑是認為德國外科真正 Nummer 1.，總是我正經認為無改變生活慣勢，認為 ê 健康猶是拚 buē 過無聲 ê 水崩山佮塗石流(liû)，Nummer 1. ê 醫療無病人 ê 配合 mā 是無較縒，特別是身體素質、日常生活攏中獎閣 m̄ 願改變。
彼暝，那聽遮 ê 德國朋友喙講行到這个歲頭健康比錢閣較重要，喙繼續食酒、食糋、食甜，我感謝家己無愛食酒 mā 無彼个慣勢愛綴日子過啥物生活，sóo-tí 當我需要治療齒岸發癀，齒科先生一聽我糖尿、高血壓、高血油、高血糖隨講「Sehr gut，我隨 kā 你請保險」。
(2023.11.28 早起頓 雙菜頭雞肉滷 + 清飯 + 卵包 + Quark/955kcal)
雪走，霜倚，霜行，雨來。
發穎 tī 見日 ē 驚，見雨 ē 笑番薯島 ê 我沓沓仔感受著 hőng 欣羨 m̄-koh 卻是選擇自我了斷 % 上懸 ê Suomi 人是按怎 ē 按呢做，起因我 mā 開始感受一種無法度控制 ê 悲傷。
彼 m̄ 是青春少女 ê 無愁揣愁，彼是一種你雄雄感覺活 tī 這个世間蓋無味無素 ê 是按怎閣 bueh 按呢蹽落去 ê 無奈何。
我無鬱症，總是好好仔一个人開始綴這款想法踅 hōo 我開始好玄敢誠實是「日頭」曝無夠？
餾猶記 ē 牢 ê 科學檢驗，看家己 ê 皮膚變化，熱人 ê 跤跡猶印 tī 保守地區，按呢我並無嚴重 ê 欠 Vitamin D，當然這是我家己做王祿仔仙 ê 答案，無科學證據，總是我 m̄ 是烏肉底 hōo D 揣無所在上車。
猶未看德國醫學衛教研究報導進前，我一直掠做日頭猛 ê 所在，遐 ê 人無欠 D，看煞 tsiah 知影 D 就佮紅外線相仝有伊 ê 雞仔目。
總是我 m̄ 知影紅外線敢誠實有雞仔目，總是讀過 ê 文章猶 ē 記得有人捌分張紅外線搪著像《青瓦厝 ê 安妮》ê 頭鬃色緻隨成做雞仔目，寫著這件代誌，我想著囡仔時總是欣羨歐洲人有一對藍甲若海洋 ê 目睭，有機會佮遮 ê 目睭色緻較淺 ê 朋友盤撋 tsiah 知影咱欣羨 ê 美麗是𪜶 ê 欠點，像咱討厭 ê 烏是伊欣羨 ê 媠。
(2023.11.27 早起頓 ひき肉番薑仔秮仔飯 + 優格/914kcal)
Bueh hōo 現實生活過著有意義，kan-na 創作 --- 川端康成
《拯救莎曼珊》(Saving Samantha)有一段話「感謝書寫」改變我 ê 世界 mā hōo 我揣著家己。
少年讀這本冊佩服作者黜臭挖空家己 ê 問題，這久我 mā 綴 leh 寫，總是人行到這个坎站有足 tsuē 代誌，m̄ 知是貧惰抑是 buē 閣綿精纏綴遐 ê 問題硩金龜磨，起因𪜶 tsham 遐 ê 人、事、物攏成做一陣風，揣無 mā buē 繼續專工揣風箱來挓火。
Sóo-pái 講過一擺、二擺就 m̄ 免繼續乞食扮嘉慶，假仙假觸，有 ê 無 ê 濫糝講到今，抑是拚勢換小鬼仔殼來妝娗家己設定 ê 人生，不過我有這个向望寫 Blog 較莫寫別人兜 ê 代，總是我是普通百姓，無可能完全無寫著別人兜 ê 代，sóo-tí 寫 Blog mā 成做我 bueh Seinen Senf dazu geben(發表個人意見)真重要 ê 關門著閂(tshuànn)，講話著看 ê 點拄。
𫝛時，寫 Blog mā 是廕 Ich koche vor Wut➀(風火著)佮 kā 電線サラダ(Kabelsalat➀)好好仔整理 ê 當你 kā 盤食甲清清，明仔載就有好天氣(Wenn du deinen Teller leer isst, gibt es morgen gutes Wetter➀) ê 認真面對咱總愛三罐栽落 tsiah 有法度硩嗽 ê 癮。
像猶未寫 Blog 進前，我真𠢕綿精綴四常 ê 料小踅金龜磨，像捷 tuì 翁講𪜶老母 ê 金句「Man kann das Essen nicht essen, du muss das essen」(你 buē-tàng 食這，你愛食這)，開始寫 Blog mā 開始成做 Samantha 我發見綿精成做𪜶爸母 ê 副本 buē hōo 我解決伊按𪜶爸母遐承來 ê 病症，我按呢攑日本剾刀 kā 倒剾 mā m̄ 捌得著恬靜，不過規腹火 m̄ 捌廕掉過，顛倒反愈挓愈猛 hōo 我成做白娘娘水淹金山寺 - 大動干戈，是講 mā 無遮爾仔譀古，m̄-koh 我確實捌 tī 馬祖 kā gún 攏講好 ê 食食，伊食伊 ê 牛肉麵我食我 ê「魚麵」ê「Man kann das Essen nicht essen」 規碗麵無摸隨徛起身越頭離開，m̄ 管伊按怎 tī 後頭姑情我轉去食麵，我就是 m̄ 轉去一路行轉去人民厝遐揣食。
這是我做過上蓋無禮貌 ê 回應，是講按呢回應總比隨佮伊冤家 hōo 伊無面子 mā hōo 家己 buē 卸面皮閣較好，起因火 teh 著，啥物漚古物攏 ē 捎出來烘 hōo 伊鼻芳，敢 m̄ 是。
(2023.12.10 早起頓 玫瑰草花ひき肉馬鈴薯泥 + 木瓜/962kcal)
近來無事揣事愖，愖朋友 ê 齷齪。
做一件代誌 ê 因由佮初心是 uī-tio̍h 得著榮華富貴抑是 kan-ta 想 bueh 分張家己 mā 意愛又閣感覺遮爾仔好 ê 代誌無 kā 伊食好鬥相報 buē 得。
若是 uī-tio̍h 榮華富貴無人 bueh 來咱 ê 角勢行踏確實是愛擘腹，若是簡單 ê 食好鬥機報，搪著無人要意應當 buē 遮爾仔艱苦敢 m̄ 是，甚至 buē 風火著抑是中氣 buē 敨。
思仔思，愖仔愖，我想著這件代誌。
你呔 ē 無 bueh 使用面冊，按呢咱是 bueh 按怎連絡？
咱有電話抑是 Email。
面冊較利便--lah。
(2023.12.30 早起頓 菠薐仔雞肉咖哩 + 秮仔 + 王梨優格/705kcal)
翁較早無愛食菠稜仔，伊講菠薐仔 m̄ 是菜，伊是路糊仔糜。
這个菠稜仔 m̄ 是菜 ê 問題，tī 我熟似 ê 德國朋友箍仔內有誠 tsuē 人有相𫝛 ê 症頭。
Sòo-pái 自佮伊來往，我 m̄ 捌感覺佗位 m̄ 著勢，不過見佮遮 ê 德國人做陣食飯，我攏 ē 得著這个智慧「我 ê 修養真正蓋好」。
起因，𪜶凡勢真慣勢 iōng 這種方式來表達𪜶見著 buē 合軀抑是 buē 上目 ê 事項，愛覕喙兼激氣「Ne」buē 離來表示我上捌世間事佮享受，總是修養較好 ê 人 mā 應當無興一日到暗看人 tuì 家己「Ne」兼「覕喙」。
Sóo-tí 正經愛 kā 家己褒唆講我是修養蓋好 ê 人，起因我從來 m̄ 捌當場綴𪜶激面腔兼相激，我 kan-ta buē-su 一仙柴頭尪仔 kā 家己祀佛公放外外。
畢竟隨人有隨人 ê 喙斗佮脾土，像我愛食豆腐 mā 愛食印度料理，翁愛食チーズ佮パン，這兩个無相仝拄好掩來扯去 gún 兩人 tuì 生份食物 ê 智識，無啥人 ê 食食文化較贏面抑是低路。
我認捌 ê 德國人問題 m̄ 免閣咸豐三，講到今，sòo-pái 寫到遮為止。
(2023.11.26 早起頓 德國尖頭草花ひき肉馬鈴薯法國焗 + 優格/1120kcal)
網路世界 m̄ 免擘腹「文字」。
前一暝寫寒人食食全全草花，隔轉工 Google 就分張食草花佮紫頭菜遮 ê 愛覕塗 ê 菜蔬，mā 好，省得我愖是按怎 Ka-pi m̄ 知食幾杯，Muse 猶未來相揣 ê 問題。
2023.03.15
想 bueh 試驗家己 ê 文學程度 sóo-tí 起手翻譯手頭有 ê 德文冊，自決定試驗 ê 彼日開始到今 kan-ta 翻譯二頁，這久步頻想著伊 mā 是受著 bueh 揣存檔(tsûn-tòng)資料 tsiah 想著家己捌做過這件代誌。
我 m̄ 知這敢有合專家 ê 標準，總是我是感覺家己翻譯甲 buē 䆀。
只是，我 buē 想 bueh 繼續落去，畢竟這 m̄ 是我 ê 專業。
另外，當興趣成做工課這 m̄ 是敨放壓力 ê 方式，sòo-pái 我抑是莫無枷夯交椅，戇猴搬石頭。
Pension Kalista, Klatovy, Česko
遮 ê 相片貧惰閣記錄一篇就徙來這 leh「讀文佯青」ê 文章，是講我 mā 感覺遮 ê 相片佮這篇「佯青」文章真峇，起因這就佮人 tī Кирково(Kirkowo/Kirkovo/基爾科沃), Bŭlgariya(保加利亞)聽李勤岸教授 tī 關懷廣播電台 ê 演講相𫝛。
「我 tī 大學教冊 mā 是講台語，你家己自在別人 mā-ē 綴你自在」這是記錄我大約仔 ê 印象 m̄ 是全文照抄，bueh 全文照抄我 mā 無彼个記持。
這篇〔捷克ⒸⓏ行跤花〕本底想 bueh kā 伊記錄 tī「台語散文 ⁘《青春寫真散文集》 von 李勤岸 ∾ 開朗雜誌」起因想著李勤岸教授 ê「和樂」兩字佮 tuì 語言 ê「自在」。.
越南人市場 --- 美容美髮廳，Horní Folmava, Česko
咱攏知影，語言已經成做「資本主義」ê 一部份，sòo-pái 咱真慣勢使用一个語言當做「世界語言」，總是 kā 歐洲各國箍做聯邦體制 ê 歐盟高層無法度選擇「軍隊語言」咱遮 ê 百姓更加無可能選擇「世界語言」，咱 kan-ta 知影愛徛大於(>,tuā-î)這爿 hōo 咱 ê 日子 ē-tàng 過甲較熱鬧閣較輕可寡，像捷克倚德國邊境(pian-kíng) ê 人，𪜶 ê 世界語言大多數是德語 m̄ 是英語，連按外埠行踏到遮 ê 越南朋友 mā 是德語講甲比捷克語閣較輾轉。
„Freiheit ist immer die Freiheit der Andersdenkenden“
無事揣事愖
我 tī 想， kan-ta「作文」是 iōng 台語其他 ê 齊是華語，tshan-tshiūnn 是按怎 bueh 按呢寫佮寫作 ê 起因，是因為驚大眾讀無路來抑是 tī 𫝛款 ê 文學內底已經揣無空間通成做出名人？
畢竟，逐家攏是鰮仔魚，鰮仔魚 bueh 按怎成做白腹仔(看新聞挖挖哇，按澎湖來 ê 小花講，白腹仔愈來愈少)就愛先試這件代誌，看家己敢有法度按鰮仔魚轉做紅鰱魚，無法度轉做紅鰱魚，至少原仔是一尾 m̄ 驚 hőng 看 buē 著 ê 鰮仔魚。
我 m̄ 知影，起因目前我 kan-na 捌 tī 亞特聊聊天聽過「台語話故事」出版社不是影印店，這集聽過前衛出版社 ê 總編輯鄭清鴻先生分張《復活的人》佮《幻影號的奇航》ê 作者胡長松先生 ê 分張。
--- 寫台語確實是較無市場，m̄-koh 這 mā 表示空間原仔闊莽莽 ---
原句 m̄ 是按呢講，總是這是我家己濃縮 ê 蜂蜜。
我無心望成做作家或是出名人，總是聽著這段話 hōo 我言行一致 m̄ 是乞食攑蠓捽仔，假仙。
(2023.11.30 早起頓 金瓜馬鈴薯ひき肉滷 + Quark/877kcal)
早起精神翁看我 tī 面冊硞硞趖，伊問「你想著啥物代誌 bueh 分張？」
「無」
聽我按呢應隨 kā 大頭鬥過來「誠重要 ê 款」。
「四常來投講聽無抑是讀無 gún 攏 ē 講無重要，m̄-koh 這久誠實足重要」我𥍉這下仔目尾笑講。
兩个隨笑甲軟骨，起因看著國王無穿衫，咱 buē-tàng 講國王無穿衫，因為逐家攏講國王 ê 新衫蓋媠，看著人讀無字 ê 冊，咱 buē-tàng 講彼無寫字，因為逐家攏講天機不可露洩。
檢采是大腸告小腸，告甲伊 mā 愛告我，四常 buē 趕我緊去款早起頓 ê 伊客氣仔問「咱攏看無藝術，咱敢 ē-tàng 先食飯？」
這句 buē-su 武功高強 ê 人按我 ê 笑脈(mē)揤落去 hōo 我笑 buē 離。
(2023.11.25 早起頓 敏豆ひき肉秮仔飯 + 優格/987kcal)
讀 Jennifer Aniston ê 新聞講著網路社群 hōo 我非常有感覺，總是我 tuì 遐 ê 代誌 bueh 閣熥 mā bueh 閣哭呻。
起因我清楚家己愛啥佮 uī-hô ē 出現 tī 網路。
雖罔，彼个魔神仔原仔誠愛來相借問 hōo 我感覺足厭慼，總是我 mā buē 閣因為魔神仔就按呢 kā 窗仔門關甲密喌喌。
感謝所有魔神仔抑是 mǹg-sǹg ê 分張，因為恁我 tsiah 有機會行出家己認為 ê 舒步箍仔佮學著真真正正 ê Das ist mir Wurst➀ m̄ 是喙講心煞 m̄ 甘願。
➀
一般來講 bueh 講這句話愛較有雅量，愛講 Das ist mir Egal m̄ 通講 Wurst，總是人生短短 m̄ 免凡事攏有雅量，特別是明明就慼甲 tī 心肝穎𧮙姦詈撟表面卻大跤假細鞋，乞食攑蠓捽仔，假仙。
(2023.12.05 早起頓 菜蔬ひき肉麵湯 + Quark/938kcal)
近來寫著「Tsiâ」想著三冬前 ê 故事。
四邊無一倚踮遮又閣無 tsham 有法得佮我冇談𫝛話 ê 人交陪，sóo-tí tsuē-tsuē 話原仔 ē 曉講，m̄-koh buē 去發覺佗落無對頭，我意思是我慣勢 ê 腔口。
2019年迵過面冊社團牽線，一位來德國行跤花 ê 朋友，見面破豆豆 tsiah 拄擘幾無粒，伊笑講「你中部人--hooh」。
我問伊按怎發覺？
Gún 後生 tī 中部讀書，gún 慣勢講「Suî」，m̄-koh 現此時 ê 伊攏講「Tsiâ」。
這件代誌 hōo 本底 tuì 學習「羅馬字」無興頭 ê 我，隨成做火燒厝：有厝味(有趣味)閣改變我寫台文佮拍台文 ê 方式。
羅馬字正經蓋重要。
(2023.11.24 早起頓 варе́ник-Wareniki 湯 + Quark/1097kcal)
敏豆或是敏豆仔？
蘑菇 bueh kā 寫做羅馬字抑是漢字？
華語的炒米粉 tī 台語愛成做米粉炒 tsiah 是名詞，綴華語講 ê 炒米粉是動詞...
我自囡仔時攏講「阿春姨，我 bueh 米粉」，上𠢕炒米粉 ê 屘妗 mā 是攏按呢問「bueh 食米粉 bő」m̄ 捌加一个炒，除非食「澹--ê 」--「米粉湯」。
這是參加線頂活動捷捷搪著 ê 建議，我無反對遮 ê 建議，起因加一个建議加一个智識，總是我 tuì 我講 ê tsiah 準算真反感，反感甲本底想 bueh 佮遮 ê 人做朋友，押尾連䀐一下攏無興趣。
過了代 ê 代誌 m̄ 免咸豐三，講到今，總是頂懸 ê 哭呻 m̄ 是 teh 熥往過 ê 故事。
敢無熥哭呻，有，確實是有 teh 熥，不過彼是因為這篇無 bueh 愛 ê 食譜有這段「敏豆或是敏豆仔？」，「蘑菇 bueh kā 寫做羅馬字抑是漢字？」hōo 我認為伊峇這个食譜。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
