亂皂𥴊仔店 ⓂⒺⒾⓃⓀⒾⓄⓈⓀ

.(2024.03.06 早起頓 番薑仔ひき肉粟仔麵 + 草莓優格/1083kcal)

頭一擺見著伊是腹肚正枵又閣無想 bueh 食傳統 Balkans 料理 -- 肉、肉、肉佮 tshan-tshiūnn「Papa」四界生湠 ê 義大利料理雄雄一踅身 tī 一間看起來若猶生活 tī 阿祖年間 ê 餐廳門跤口看著一桌三个人食肉閣配一盤飯隨決定踮遮飼枵。

因為店東 buē 曉講英語 gún mā buē 曉講希臘(Hi-lia̍p)語，菜單又閣讀無路來就 iōng 上原始 ê 語言比跤畫手，先送一个笑容 hōo 彼桌 hōo 我停跤 ê 朋友挨拶(Aisatsu)紲落來開始遮比遐指，サラダ、Πίτα、肉...Mo？Me？Kônn？確定選牛、選羊、選豬，久無見著米 ê 我呔 ē-tàng 無來一盤飯隨 kā 手指過去。

店東佮三位 uī-tio̍h hōo 我 buē 點 m̄ 著菜 ê 朋友敢若知影我 ê 想法隨開始比跤畫手 hōo 我掠做傷晏來，清飯已經 Nóo-sut 隨表示按呢無要緊，我 mā 綴猶是男朋友 ê gún 翁食 Πίτα 就好隨 kā 手閣按 Πίτα 指過去，表示閣一份。

店東 kā 手頭 ê 紙條囥踮桌頂，手綴指我本底 bueh 點 ê 物食講「Kein Problem」這 hōo 我楞去捎無摠通搝，隨越頭請教翁德文後 ê 14。

「Kein Anhnung」伊應。

聽伊按呢應，我隨反白睚(píng-pe̍h-kâinn) hōo 伊食。

「我捌 tī 遮上班無表示我 ē 曉講希臘語，另外我上班 ê 公司是德國公司 」伊講。

(2024.03.04 早起頓 䆀豆雞肉チーズ滷 + 糙米飯 + 優格/1006kcal)

德文䆀豆食譜無 tsuē 就請教英文食譜，無疑悟英文食譜 mā 是少甲 hōo 我又閣想 bueh 熥這句話按《驚驚袂著等》學來 ê 句，只不過這斗 kā 伊換軀新衫「䆀豆遮爾無人緣」，正經無滾耍笑 tī 這个英文窒倒街 ê 年間，德文佮英文 ê 䆀豆食譜平均起來，無夠疊(thia̍p)一个 20 尺 ê 無施捨。

雖罔按呢生，踅英文櫥窗猶是較有機會搪著 Muse，畢竟英文佮人敆線 ê 歷史比德文較久長，準做腹腸無德文遐爾仔闊閬閬猶是大目孔 hōo 鰮仔魚成做三文魚，像印度四常食食カレー tī 世界猶未成做啥物攏無啥稀奇 ê 年間，伊是印度人 ê 鰮仔魚，咱臺灣人 ê 三文魚。

是講，正經愛褒唆英國，我這个讀無 Hindī ê 青盲牛透過英國網頁捷捷搪著好食 ê 印度佮四爿厝邊料理。

凡勢一斗愛款雙人食額兼人又閣蹛 tī 德國 ê 入人門，順人意 ê 性地，致使我較 buē 綿爛認定甚至成做天霸王要求 gún 翁愛跟綴我自本 ê 喙斗，顛倒反是循𪜶 ê 喙斗款三頓，只不過較按怎循猶是無法度循甲峇峇峇，像「深圳「油畫村」，複製「梵谷名作」妙手畫師卻一輩子身無分文」m̄ 管你 ê Vincent Willem van Gogh 較按怎循你猶原 m̄ 是伊，sóo-tí 我無法度百分之百成做德國人喙斗 kā チーズ、パン當做牽手按呢意愛，翁 mā 相仝，伊無法度成做臺灣人 ê 脾土 kā 豆油、珍珠奶茶鏨落萬丈深坑 ê 胃腸。

Gún 有家己綿死綿爛 ê 主張 mā 有放伴 ê 相疼痛，雖罔一寢開始故事 m̄ 是按呢搬，總是我 m̄ 是天霸王伊 ê 頭殼 mā m̄ 是 A-ta-mah-khòng-ku-lī ê 一遍賊，百世賊 ê buē 曉軁鑽，gún tsiah 有法度 kā 伊慣勢 ê 三斑擾家、蜈蜞咬蛤(kap)送出門，畢竟這款天落紅雨 ê 代誌是無可能 tī 我 ê 身軀發生，kā 食蒜仔吐蕗蕎當做是寶 ê 褒唆，我 ê 耳仔生兩葉，家己看 ē 著。

無人緣 ê 䆀豆按德文徙來英文猶是這三款較 tsuē 1. 炒豆油 2. カレー 3. 德文佮英文攏紹介伊是傳統土耳其料理 ê 䆀豆 Kam-má-tooh 燉，我 tuì 料理煠、燉(tūn)、燖、煮、㴘、𤉙遮 ê 料理手路 m̄ 捌一个芋仔番薯，總是第 3.  項 tuì 我來講較成𤉙，起因照教育部臺灣閩南語常用詞辭典 ê 紹介伊較峇「燉」無適合「𤉙」，不過成果攏是若「豬跤𤉙甲爛爛爛」ê 無合 gún-ê 喙斗。

(2024.01.20 早起頓 ひき肉金瓜焗 + 藍莓優格/971kcal)

Tsuē-tsuē 冬前，翁某做伙去 Allgäu peh 山。

落山後，開始踮德國上懸 ê 埠頭 Oberjoch 揣下昏飯。

揣仔揣，揣甲人想 bueh 直接做仙莫食 tsiah 發見 gún 已經行到按百冬前到今猶原猶未解決 ê 歷史，總是這段歷史 tuì 當地人來 kóng tshan-tshiūnn 這塊土地 ê 變化。

伊甸(Ài-tiān)園原在，吐舌 ê 蛇 mā 原仔 tī 吐舌，逐家 m̄ 管 Adam、Eva 猶原 tī 𫝛一搭抑是離開，日子原仔過 m̄ 管彼粒林檎敢有合你 ê 脾土，起因無人知影 tī 家己成做塊土地肥底進前，眼前 ê 世界敢原仔是家己熟似 ê 世界。

Tshan-tshiūnn OPA Stoll(阿公)一世人綴時間成做 Preußen 人、Nazi 德國人、西德人，最後 ê 德國人 ê 外地人，我家己 ê 阿母按日本 ê 外地人成做臺灣 ê 外地人，我 mā 是，出世 ê 角勢無法度家己選擇，m̄ 宫我是啥物人我猶原清楚知影我是啥人，唯一 m̄ 知影 ê 是遐 ê 永遠枵燥並認定我 ê 權利就是你 ê 福利 ê 人。

按德國 ê 柴杙行過奧地利 ê 柴杙，我想著這句話好囝免祖公仔業。

「奧地利總理近來應當嫌祖公仔產無夠額 mā tsiah 反家甲」我講。

(2024.03.02 早起頓 チーズひき肉白花仔菜 + 糙米飯 + 優格/1048kcal)

熥食譜 tsiah 想著家己捌使用 IG，熥食譜 mā tsiah 發覺 tsuē-tsuē 代誌 m̄ 是迒 buē 過，是家己想 bueh 放伊過抑是 m̄ ê 問題 niā-tiānn。

當初步頻想 bueh 綴 leh 使用 IG kan-ta uī-tio̍h 這件代誌，翁 tī 網路看著我 ê 䆀筆尾〔行尞ⒸⓏ行跤花〕行涼心世界 ⋯ 捷克第皮賽克 · Písek, Česko，彼陣 ê 我就 tshan-tshiūnn tsuē-tsuē 捏死 m̄ 放問題 ê 人𫝛款，開始研究是按怎人 ē 遮爾仔 m̄ 知見笑 mā 開始愖我愛按怎 tsiah 有法度證明彼个人 m̄ 是我本人，就是按呢 ê 食飽傷閒無事揣事 ê 無議量 hōo 我申請 IG 佮愛料理(I-Cook)。

總是我較按怎食飽傷閒 mā buē 綿精 tī 這个譀譀仔世界，尾手就 let it go kā 遮 ê 事項當做是褒唆，畢竟咱 ê 物若無夠好呔 ē hōo 人數想，敢 m̄ 是?

窒牢 ê 水管無到三日月就清甲通通通，IG 口座隨刣掉，愛料理自舊年 kā 申請取消口座到今 m̄ 捌成功，我 mā 貧惰閣請教 ê 據在伊，huînn-ti̍t 我清楚知影家己 buē 閣使用彼个口座 mā buē 回應任何按遐來 ê 請教。

這份食譜𫝛款是按 Keto 生酮食食遐看來，只不過2冬前 ê 彼時 kā Keto 掠做是出名人 ê 名，2冬後因為好玄 Keto 你到底是佗一位出名人 tsiah 知影原來伊是早前猶 tī 面冊捷看人 teh 分張 ê 生酮食食。

2冬前佮2冬後我猶原 m̄ 知我綴 leh 做 ê 食食敢有 Keto 總是我知影一个 Keto 有 tsuē-tsuē 面容通變化，像這2冬前 ê チーズひき肉白花仔菜我嫌伊面肉䆀想 bueh kā 伊仕上げ一个就上 Google 請大神伊閣一擺 kā Muse 送 hōo 我，大神 mā 聖甲隨 hōo 我一个𫝛款 ê Muse m̄-koh 枝骨比進前 ê 較幼路 mā 較好妝娗 ê Keto。

按呢講真鬍 ê 不仁，不過這就敢若記錄青花仔菜蘑菇ひき肉仝款，一个國家目前搪著啥物問題就 ē 綴 leh 出現相干 ê 議題。

(2024.01.19 早起頓 菜蔬ひき肉番薯雞豆飯 + Quark/1023kcal)

我想 bueh 家己 bué 雞心豆來浸，總是貧惰猶是大過骨力，就隨斡頭轉去捾罐頭並 tuì 家己講，罐頭窮實 mā 無遐爾仔䆀...

我無反對罐頭食食，總是虛華捷捷成做目頭懸 ê înn-tsinn 硬 bueh kā 罐頭講甲若妖魔鬼怪按呢。

彼日當我 teh 搝大索兼 tuì 家己洗腦「愛 bué 豆仔轉來家己浸 m̄-tsiah 是料理」，我 ê 頭殼雄雄出現這个畫面「我感覺按呢足無健康，一日到暗 teh 講恁老母 ê 尻川話，總是你老母就是 înn-tsinn 認為伊講 ê 攏著 mā 上𠢕扞灶」一想著 gún 翁𪜶老母 ê 表情我隨 kā 罐頭會失禮。

早前真愛食雞心豆泥(Hummus) m̄-koh 貧惰家己動手，一回佮一位蹛加拿大 ê 廚子開講講著「Hummus」ê 厚工，伊隨笑講「家己浸豆仔佮 bué 便 ê 罐頭來做窮實無宛2體」。

彼陣我 m̄ 信篤，畢竟逐家攏講豆仔就是愛家己浸，後來有機會搪著按黎巴嫩(lūn)來德國開餐廳 ê 廚子 mā 講著相仝 ê 話佮加這句「Hummus 好食 ê 重點是 Tahini 佮橄欖油，特別是 Tahini」，聽兩位廚子按呢分張，我總算知影豆仔 m̄ 是重點是 Tahini，不過見 bueh bué 雞心豆我猶是迒 buē 過虛華，像這斗。

不過，我是有知覺 ê 人，當我 tuì 翁講「我真正無興趣成做恁爸母 ê 烏面賊 mā 無想 bueh 一支喙若恁小妹按呢若刀仔仝款」我就真細膩兼斟酌提醒家己「虛華」佮「哭呻」看起來無仝人窮實是𫝛一位，像這久 ê 我 mā 綴𪜶一家伙 teh 目物無目地佮 kan-ta ē 曉哭呻講別人 m̄ 著卻 m̄ 稽考家己 ê 問題。

一想著 gún 翁𪜶老母 m̄ 稽考是按怎逐家攏嫌伊手路䆀 kan-ta bueh 褒唆家己手路讚佮是別人無食福，我就感覺足恐怖。

(2024.02.28 早起頓 青花仔菜蘑菇ひき肉 + 糙米飯 + 優格/963kcal)

Google ê Podcast 沓沓仔徙來 YouTube 這个變化 tuì 頇顢揣 Podcast 來聽 ê 我是一个好現象，起因迵過這个變化我 tsiah 知影引𤆬我行入寫台語文世界 ê 黃越綏老師 mā 有出 Podcast《恁祖媽來了》真好聽，特別是這集EP481 黃越綏｜【名人專訪】發生在台灣首席災難記者身上的靈異事件 Feat. 眭澔平，真向望眭教授 ē-tàng 閣上一改節目，伊 ê 人生故事正經是蓋精彩。

是講是按怎 ē 講黃越綏老師是我 ê 台語文𤆬路雞，這愛按《黃越綏的意外人生》講起，讀這本冊進前我 m̄ 捌啥物號做台語詩 mā m̄ 知影台語窮實有字通寫文章，總是愈來愈無頭神 ê 我猶 ē 記持第一斗佮這本冊 tī 諾貝爾相拄搪 mā 讀有黃老師寫 ê 台語詩，我 ê 心池就開始發水泱(iann)想 bueh 綴老師我口我寫 tshan-tshiūnn 寫德文、英文、華文按呢，只不過這段路我有 kā 伊行有較久淡薄仔，總是我猶是感覺家己足幸運，有機會搪著黃老師 ê 台語詩 hōo 我知影台語 m̄ 是 kan-ta 人講 ê 口說文化，伊 mā ē-tàng 成做展風神 ê 神奇符號。

一个食譜記錄寫到遮爾仔遠 mā 是有意思，總是這是我 ê Blog，我寫遮 ê 代誌 mā 決定有伊 ê 因由。

因為 Google 沓沓仔 kā Podcast 徙來到 YouTube 無訂閱像《華視潮台》這款網路節目 ê 我 mā 因為 Google 業務調整有機會聽著閣較 tsuē ê 節目。

是，YouTube tuì 我來講上大 ê 功能 m̄ 是看影片是聽影片/音樂。

Tsa̋ng tī Google 圖庫揣食譜 YouTube mā 隨紹介 Keto 料理佮影片，是講 YouTube 是按怎直直紹介 Keto 食食，這个因由到今我 mā 捎無摠，總是 tī 這段使用英文揣圖 ê 期間，我發見 Keto 食譜 tī 英文世界真時行。

Keto 食食法 tī 英文食譜真好搪著 m̄ 知敢有受著「超磅文化」ê 影響，起因頂站仔看 Abnehmen, um zu überleben | ARD Doku 分張各國縮胃手術比例，其中美國 ê pha̋-siàn-tòo 就 tshan-tshiūnn 𪜶家己製作 ê My 600-lb Life 仝款 ê tsuē。

(2024.01.18 Tshì-sù 咖哩米蘭草花白銀魚糋 + 糙米 + 優格 + 藍莓俗麭/851kcal)

Gún 蹛 ê 城邦 tī Fastnacht 這段期間推捒「Ein Kuss」唚一个無料參觀城堡，gún 就四界「唚一个」參觀城堡。

一日踅到歷史感情較倚法國 ê 城市，建城 mā 比現此時 ê 首都，gún 蹛 ê 所在有兩个首都，m̄-koh 行政權猶是 tī 後來成做德國歷史上重要 ê Hohenzollern 家族徛家這爿。

Gún 翁某一个喙白兼驚食 buē 飽，一个驚開錢食外口，sóo-tì gún 攏真慣勢早早出門早早轉來食下昏頓，出發 RESIDENZSCHLOSS RASTATT 彼日 gún bueh 坐 ê 車幫受著別搭鐵枝路著火暫時無通車，我隨 tuì 翁講「這表示咱佮 Residenzschloss Rastatt ê 緣份無夠深，來轉。」

「德國鐵枝路 m̄ 是 kan-ta 南北兩爿 mā m̄ 是 kan-ta 一間公司 teh 運作，較停仔 ē 廣播新路線」翁應。

著謼，遮是德國 m̄ 是臺灣，德國 ê 高鐵無法動運作猶有其他 IC、IR、RE 通替換，臺灣 ê 火車系統一出問題彼日 ê 計劃百分之 90 全臭火焦無 teh 調整，10% 有法度調整是因為出發 ê 所在無蓋遠。

本底就挨挨陣陣 ê 車頭，這久因為車幫問題 hōo 伊愈成牽罟。

(2024.02.26 番薑仔三文魚麵 + 優格/921kcal)

當胃腸願意沓沓仔佮食物鬥陣，我又閣搪著另外一个問題，一个自我有印象開始 m̄ 捌搪過 ê 問題 --- 頭殼一直踅神兼戇神。

我 buē 講家己是冊迷，總是我 mā m̄ 是彼款見冊隨慼無法度讀字 ê 人。

這斗 kā 家己種 tī 眠床 bueh 2 禮拜 ê 時間，搪我掠做家己精神較好想 bueh 繼續讀陳雷醫師 ê《鄉史補記》，我竟然無法度讀字，而且是一讀頭就隨眩(hîn)目就隨抽。

這个現象 hōo 我驚甲咬舌，畢竟無啥特殊才能 ê 我，唯一猶有通佮人競爭 ê 一步取(tshú)就賰好好仔讀一本冊 ê 耐性。

冊無法度讀，手機仔 leh？

緊 kā 離跤手 ê 手機仔揣轉來開始𫝻，畫面 tsiah 拄拍開我 ê 頭仝款眩，目仝款抽疼 buē 離閣兼想 bueh 吐 buē-su 若有身仝款。

(2024.02.24 早起頓 三文魚 Kam-má-tooh I-tá-lih 麵 + 優格/975kcal）

 Kā 家己種  tī 眠床 bueh 2 禮拜 ê 這久，偷走厝 ê 味覺(bī-kak)猶原猶未轉來，本底活潑 ê 腸仔 mā 猶原死殗殗無元気(Genki)，總是今仔日透早我有法度按食一粒白煠卵攏艱苦 ê 喙斗 kā 這盤料理規个食甲清氣啖啖，這正經是比得頭獎閣較快樂。

我 m̄ 知影偷走厝 ê 味覺佮腸仔當時 ē 轉來相揣，總是我清楚知影無好好仔食一頓飯，味覺佮腸仔愈 buē 轉來，踅神 ê 問題 mā buē 解決。

(2023.06.04 早起頓 三文魚 Kam-má-tooh I-tá-lih 麵 + 檨仔 Quark/957kcal）

初初搪著伊感覺伊佮 Tagliatelle al salmone 𫝛款就隨看伊 buē 上目。

起因，Tagliatelle al salmone 咱 m̄ 知影已經食過幾百回 ê 𤺪，你 tī Italia 餐廳抑是土耳其烘肉店 mā 捷捷出現。

Sòo-pái 你想 bueh 是按閹雞成做火鳥 m̄ 愛看家己 ê 斤重，這是我搪著伊 ê 第一个想法。

(2024.01.06 ひき肉野菜雙薯カレー + 時計果 Topfen/832kcal)

明仔載便當你 bueh 食敏豆抑是玫瑰草花？

我知影你愛敏豆，sòo-pái 我食玫瑰草花就好。

感恩你 ê 客氣！

一點仔攏 buē。

玫瑰草花 ê 台文譯名參考；

1. 德(國)文：Rosenkohl

(2024.01.07 雞肉菜蔬雙豆𤉙 + 優格/907kcal)

Buē 記得 tī tueh 讀著這 pha 新聞。

不而過，近來款「玫瑰草花」攏 ē 想著往過按臺灣飛來德國 kā tī 翁𪜶公司實習 ê 學生囡仔鬥攢飯包 ê 故事。

彼陣 ê 我鼎是扞甲無半桶好，這久 mā 是總是遐 ê 學生囝仔攏相信我 ê 喙斗，sòo-pái 我款 ê 物食𪜶 m̄ 捌成做 gún 翁 ê 副本「Nee 這 buē 食」，不過有一項食物 hōo 遮 ê 囡仔一看著菜單 ē 隨反應講𪜶確實無愛這味，彼就是「Rosenkohl」。

我 m̄ 捌請教遮 ê 囡仔是按怎無愛食這項 tuì 我來講比白草花抑是高麗菜閣較好食 ê 菜蔬，總是我尊存遮 ê 囡仔試過我手藝後 ê 分張 --- 飯包真正好滋味，m̄-koh Rosenkohl 真正 buē 敆喙。

這久寫遮 ê 故事猶 ē 想著綴飯盒轉來 ê 紙條仔，uī-tio̍h bueh hōo 我讀有𪜶寫 ê 字，逐个攏綴 leh kā 羅馬字寫甲若電腦刻出來 ê 清楚 hōo 我足感心。

這久想著彼久 mā 想著讀著新聞記錄 tī 後台 ê 記錄；

(2023.12.24 早起頓 德國尖頭草花ひき肉チーズ醬 + 糙米飯 + 優格/919kcal)

米 tī gún 兜本底是有市無路，起因雙人一雙箸 bueh 食無仝味 ê 我 buē uī-tio̍h 這塊肉幼仔雞卵糕來一斗煮兩鼎，我想這佮我本身無遮爾仔依賴(I-nāi)亞洲食食有關係。

是講，無這个症頭凡勢是德國 ê 食食環境 tuì 我來講窮實無遐爾仔白汫無味，除了魚臊掠外，遮 ê 魚臊正經 bué buē 落手，總是這个問題 tī 臺灣 mā 相𫝛，厝內有牛肉抑是挪威三文魚彼決定是價數落甲 hōo 我滿意，我 tsiah-ē 冇手。

Sóo-tí 德國 ê 食食慣勢 tuì 我來講 buē 無聊，除了較無機會食餐廳這項。

是講，蹛臺灣 mā 罕得食餐廳，起因食來食去攏彼幾項，家己料理若較成有變化。按呢講真臭煬，總是我正經是按呢想，tshan-tshiūnn 這尖頭草花家己煮就 m̄ 免固定 kan-ta ē-tàng 食豉鹹 ê 酸菜抑是豉酸 ê サラダ敆馬鈴薯按呢 ê 無變化。

(2023.12.03 早起頓 䆀豆番薑仔卵燥𫝻 + 秮仔飯 + 優格/1006kcal)

經過一段時間 ê 搜揣，總算 hōo gún 揣著仝一个城邦無仝城市願意開放 hōo 𫝛城邦無仝縣市 ê 民眾跨區域踮𪜶遐種珠，雖罔，一逝路愛2點外鐘。

不過，踮這个 tsuē-tsuē 人 buē-su tī 九份仔挖金礦 ê 時間，gún 有法度 tī 這个金礦愈挖愈少 ê 年間挖著礦閣較遠 mā 是愛出發。

起因有種有保庇，有藏珠心情 mā 較 buē 纏綴新聞數字 ti 遐 leh 五時做藥，六時做石 phīnn-phēnn 跳。 

按申請到報到，所有 ê 鋩鋩角角攏是翁 teh 處理。

我 kan-ta 出一支喙回答伊遵照申請單提問 ê 問題，sóo-tí 等到人誠實到遐我 tsiah 開始擘腹。

我 tuì 種珠無搭嚇，m̄-koh 我煞沓沓仔因為德語愛按四常破豆 ê 蹛 tī tueh 晉級到醫學專用名詞開始頭眩目暗。

當我 teh 吐氣敨放 B1 程度 ê 德語猶有法度通過第三關敢有過敏問題遮 ê 醫學問題，第四關門一開我決定這斗 buaih 閣開喙講德語。

窮真，我 tuì 這本冊無興趣甲見擺見著臺文版攏 ē bué 轉來讀 ê 癖攏揣無一撇，這久是按怎生想 bueh 專工 uī 伊記錄一篇感想，講起來 mā 真簡單，伊牽我 ê 手做陣行轉去少女年間，我寶惜 ê 少女感情。

第一擺搪著《傲慢與偏見》是 tī 國校 ê 排冊擔仔，冊擔仔頂逐本若粗紙 ê 冊一本5塊，不而過冊皮若是有閣加貼一張紙條仔寫「世界名著」就隨愛加5箍，這就是我佮 Jane Austen Pride and Prejudice ê 第一擺接觸。

M̄ 知是年歲傷過細抑是冊 tshan-tshiūnn 台灣新眼界．文化新台灣 | 林文欽 臺灣意識佮智識的駁岸 前衛出版的堅心 20240122 社長林文欽先生談著《被出賣的台灣》「彼久 tī 我出版被出賣的台灣，阮 ê 版本進前，其實臺灣就已經有彼个，人印 leh 賣 ê 版本矣」sóo-tí 讀起來 tshan-tshiūnn tī 臺灣看 Forgetting Sarah Marshall 佮 tī 德國看 ê 精差。

印象中 DVD 無 Kuckuck，sòo-pái 當我 tī ZDFneo 見著 Kuckuck，我規个人隨按膨椅跳起來。

「你敢有看著 Kuckuck」我問翁。

「有啊，彼有啥物通大驚小怪」翁應。

彼確實無啥物通大驚小怪，m̄-koh 若無閣看一斗我正經 ē 掠做彼个 phà-phà-phà ê 聲音就是 kan-ta ē-tàng 想 buē-tàng 看 ê 畫面，這个畫面 Wikipedia ê 忘掉負心女有紹介著。

按查某囡仔轉少女 tuì 愛情有 tsuē-tsuē 若霧 ê 想像，聽著身軀邊 ê 人講 Gone with the Wind mā 有人講著 Pride and Prejudice 我又閣揣冊來讀一斗，總是青春愛做夢 ê 我 tuì Vanilla Ice 演 ê Cool as Ice 比彼陣 tsuē-tsuē 人攏講浪漫閣好看 ê The Sound of Music 閣較有感覺。

(2023.12.20 早起頓 米蘭草花卵燥法國焗 + 秮仔 + 優格/991kcal)

 Tī Guteküche.at  見著伊隨想著囡仔時捷捷食 ê 高麗菜卵，總是又閣 buē 記得阿母是按怎料理，隨請教網路𠢕人，押尾 tī YouTube 揣著【蛋酥高麗菜】挑選更加清甜脆口！免油炸版蛋酥這樣做！｜阿慶師 想 bueh 綴 leh 做，總是欠一味 --- 豆皮隨放棄隨閣翻頭轉來看 Guteküche.at ê Wirsing mit Käse und Ei 手頭 ê 材料除了蔥仔無掠外其他全齊有，按呢就來綴 leh 做，不過我食 buē 慣勢。

食 buē 慣勢 m̄ 是原食譜䆀味，是我慣勢食卵包這款炒甲赤赤 ê 卵，sóo-tí 當卵愛成做若卵燥𫝻有淡薄仔水水 ê 口感，準做 gún 翁呵咾甲觸舌我 mā buē 繼續綴 leh 按呢做，起因彼 m̄ 是我慣勢 ê 喙斗。

食譜閣餾一斗確定家己無 kā 伊做甲重耽，按呢就繼續試落去，卵 ê 做法就 tshan-tshiūnn 阿慶師 ê 做法，先炒 hōo 好勢 tsiah 佮其他 ê 材料濫做伙，按呢 ê 做法 hōo 伊看起來無遐爾仔媠像原食譜按呢，總是足敆我 ê 喙斗 mā 合翁 ê 脾土，做菜正經是哲學。

米蘭草花卵燥法國焗

...... 材料 ......

米蘭草花，切絲　1/2

(2023.12.19 番薯薟肉醬 + 優格/999kcal)

第一擺見著 Chili con Carne 是 tī 16 台 ê 喝玲瓏。

彼陣我一直掠做這絕對無人 bueh bué，伊決定 ē hōo 古錐 ê 主持人 tuì 觀眾司奶講「害仔，今仔日 Feierabend 煞鼓來轉免賣」結果目猶未𥍉，走馬燈 ê 數字按 300 包走到無賰半包 hōo 我下頦落到塗跤，開始成做一隻貓是按怎伊 ē 賣甲遮爾仔好。

 不過，彼陣 ê 我是按呢認為，bué ê 族群 m̄ 是德國人，是𪜶 ê 厝邊奧地利人、盧森堡、瑞士遮 ê mā 講德語 ê 族群。

德國喝玲瓏台 m̄ 是 kan-ta 賣德國 mā 賣厝邊 ê 物，而且市草好甲連波蘭 mā 綴 leh 來叫花、洗花、卡花、收 花➀。

我 m̄ 知影臺灣有偌 tsuē 物理仔台，總是 gún 兜見 ē 著 ê 喝玲瓏就有五台。

我 ê 街仔路德語大多數 mā 按遮學來，特別是奧地利人叫花 ê 德語佮腔口。

我愛食花豆，總是食過德國人款 ê 花豆，我 mā 綴德國人開始 tuì 花豆喙白甲 ne ne ne buē 食、buē 食、buē-tàng 食。