亂皂𥴊仔店 ⓂⒺⒾⓃⓀⒾⓄⓈⓀ

冊有一版二版三版，我 ê Blog 有一改，再改，閣再改。

自無料使用 Pixnet (300mb?貧惰請教...閬過)到決定撏錢 bué 15G 儉相片，這 4 冬 ê Blog 四常成做我訓練家己食老較莫老倒頹(thē)佮增加智識 ê 好角勢，特別是貧惰寫字做筆記 ê 我迵過寫 Blog 總算有法度好好仔 kā 好玄 m̄-koh 無才調 kā 鏨 tī 海馬鉼針(Hippocampus)隨揣隨有 ê 資訊成做家己 ê 通書。

《我在西伯利亞的監獄》讀煞，四月芒種雨，五月無燒土，六月火燒埔 ê 黃酸雨成做內山出水(Sturzfluten/Flash Flood) hōo 芒雨望豐年 ê 向望成做失望，跤踏佮臺灣 bueh 佮臺灣 bueh 平大細 ê BW(Baden-Württtemberg)，一个圓箍仔兩種心情，耳那聽 Ingo(Tagesthemen) ê 專題報導，海馬鉼針 mā 綴遮 ê 報導開始踅圓箍，Schorndorf ê Gottlieb Wilhelm Daimler ê 古宅敢 mā 受災，若受災需要偌久 ê 時間 tsiah 有法度恢復自本 ê 面肉，耳那聽 Ingo 佮記者 ê 連線，本底恬靜 ê 海馬 mā 綴電視聲、窗仔外 ê 鳥仔歌聲、徛踮肩仔頭 ê 阿 bueh 佮阿 buaih tī 我 ê 耳仔邊比賽啥人較𠢕呲(tshū)。

「夏至到秋分，我搭胸坎保證你包穩 buē 讀伊一字」阿 buaih 翹跤撚喙鬚，那講那笑。

「你永遠 m̄ 知影，你 tī 當時 ē 閒甲掠蝨母來相咬 mā 無法度佮閒閒美代子好好做陣冇談」阿 bueh tshan-tshiūnn 永遠擘腹囡仔食無飽穿無燒 ê 阿母按呢溫暖。

不論扞鼎抑是無，我 ê 食食喙斗 m̄ 捌走過回頭車 ê 一日熥三斗抑是隔轉日接力走標繼續熥。

這是好喙斗抑是喙白，知食 m̄ 知訴喉韻 ê 我 m̄ 知機，總是我清楚知影無走回頭車 ê 食食慣勢 hōo 我白汫無素 ê 人生，有機會按舌楦到全世界 m̄ 是縛 tī 仝世界像大多數 ê 德國人，一塊麭餾三頓，閣按三頓餾一世人。

食食反應人生，人生反應食食，gún 翁 ê 心肝寶貝𪜶勥母就是上好 ê 見本，一塊麭餾三頓，閣按三頓一世人，人生大細事 mā 相𫝛，六十冬前 hōo 西班牙人建議改手路，六十冬後手路原在 m̄ 捌改變，建議 ê 人按西班牙人改做台灣人，伊四界投 hōo 人知 ê 理由猶原相𫝛 m̄ 捌改變，台灣人無食 ê 文化 m̄-tsiah m̄ 捌貨。一个人一世人有才調堅持 m̄ 進步 mā 是厲害。

咸豐三，講到今，換題目。

緊緊 kā 下昏飯送入腹肚，緊緊換車幫到戲園，緊緊拆一張，緊緊傱入影戲廳對號入座。

怪奇，已經 8:20 影戲呔猶未開始？當我認真思考這个問題，四位德國人互相討論號碼問題，煞落來客氣請教我「請問你敢 mā 5 排 6 號？」緊 kā 票撏出來，五个人互相䀐一下，繼續討論敢是工作人員拆 m̄ 著位。我 mā 因為這个現象感覺紅龜生蟲，龜怪，Bridget Jones: Verrückt nach ihm 合該然較合女人脾土，呔討遮 tsuē 男人來贊聲，敢是因為這場是特別場，原音播出。當我成做貓 tuì 戲廳貓貓相。

「你走 m̄ 著廳，這廳 m̄ 是 Bridget Jones」其中一位男子微微笑 kā 手頭 ê 票分 hōo 我看。

我 ê 天公伯矣，誠實走 m̄ 著廳，那講歹勢外套捎 leh 隨傱出去揣我 ê 廳。

「你 ê 廳 tī 2 樓」著矣，遮是二樓，呔 m̄ 是我 ê 廳，我 kā 頭閣一斗探入去舊廳，內底 ê 戲迷齊笑講「這廳確定無講英語」我緊說謝斡頭傱向檢查人員「我揣無我 ê 廳。」

「這瓷仔有毒。」

第一斗交伊見面，gún 翁隨 hōo 勥母上童聽我 ê 話食藥包穩你食百二閣 buē 食虧。

第一斗交伊見面見，準做我無信仰，我猶是順勥母 ê 乩身交伊保持距離，畢竟我跤踏 ê 萬項代伊上知機。

第二斗交伊見面，手猶未伸出去摸勥母隨來跳童，我斡頭問一句「這瓷仔有毒，伊呔猶原活跳跳，遮是德國，敢 m̄ 是？」邊仔掠做家己是神 teh 跳神舞 ê 勥母乩身隨退童問「敢 bueh 款幾个轉來做網衝?」

我一直掠做家己 m̄ 捌出過木瓜生菜盤，巡田園揣靈感 tsiah 發見家己 tī 二冬外前就捌出菜。

記持真正 buē 食餌，無 Blog ê 記錄，現此時 ê 我絕對一分田磅甲若甲 buē 講伊偌好味素 m̄-koh 寫一堆跤帛文。

感謝阿羅交阿珊，無𪜶 ê 福利分張，這鞏金閣包銀 ê 木瓜無金色驢仔 kā gún 鬥相共，伊無啥機會通出現 tī gún 兜桌頂，養飼 gún-ê 腹肚捅仔。

2025 按算落南西班牙，向望翁分張 ê 西班牙木瓜有機會交伊相拄搪。

Wer mit Ungeheuern kämpft, mag zusehn, dass er nicht dabei zum Ungeheuer wird. Und wenn du lange in einen Abgrund blickst, blickt der Abgrund auch in dich hinein. - "Jenseits von Gut und Böse" 

--- Friedrich Nietzsche

Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。

當你年久月深 tuì 萬丈深坑金金相，萬丈深坑 mā teh tuì 你貓貓相。

雄雄想著這件代誌，我一直喋牛 m̄ 通𠢕走，人 m̄ 通出名，這久煞 tī 遮 m̄-nā 綿豉跟綴食譜冊出菜 mā kā 伊綿豉記錄踮愛料理，我按呢做敢 mā m̄ 是食菜食菜，食甲肚臍為界？

計畫永遠趕 buē 赴變化。

安歇日前一暝交翁頓印仔講「來食鰮仔魚意大利 I-tá-lih 麵。」

隔轉工目蚶猶瞌瞌隨反僥講「我 ê 胃 kā 我講伊今仔日愛食塗肉林檎。」

「你款 ê 早起頓齊好味素」翁講。

「我無確定我款 ê 糜飯敢攏好味素，總是我知機家己 ê 性地，無興成做獨裁者，像恁阿母」我講。

You and I, we were meant to be

I feel it in my soul

Feel it in my soul

芥辣 tuì 蜂蜜講，你佮我註好好

我感受你 ê 魂

田螺循舊逝，較行 mā 彼逝。

人有半桶師，我是一跤跤桶齊無舊循 mā 舊逝 ê 低路師。

人 tī 臺灣罕得食菜擴，目今 tī 德國根莖菜蔬 tsuē 過葉菜類 hōo 菜擴成做食飯桌 ê 無伊 buē 慣勢，有伊嫌無局 ê 老伴。

除了煮湯、炕肉、烘猶閣有啥物通變化？

人講仝師傅，無仝工，我 tuì 白銀魚 ê 歹印象按 gún 翁遐來，我強烈拒絕瑞典薄餅麭是按勥母遐來，insgesamt 總合來講順 1918 出世 ê Herr Stoll 阿爸➀分張 ê Das ist neues Gemüse 這是新菜蔬 ê 我若哭呻白銀魚、白草花、紫頭菜、瑞典薄餅麭歹味齊是按 gún 翁交𪜶𠢕扞鼎𠢕享受生活 ê 爸母遐來。

Gún 翁 buē 綿纏觸纏哭呻菜擴、芹菜、敏豆、白花仔菜一大トラック(LKW, Truck)䆀味 buaih 食 mā 是仝款，無仝師傅 ê 結果。

「後生娶某是人兜--ê」這是勥母交勥爸 tī 往過嫌新婦頇顢扞家專工落南來出菜，搪著後生一屑仔攏無帶念伊 ê 辛苦 mā 無要意伊 ê 恐喝就開始唸歌 --- Gún 後生是鹹甜汫無嫌呔 ē 某一娶，翁親某親，老婆仔拋車輪 ê kā 我戲棚頂做甲流汗，戲棚跤嫌甲流瀾，我呔 ē tsiah 業相。

翁兜 ê 勥爸母閣喋詳落去連阿菇攏喝救命。

德國人按勇甲若戰車沓沓仔行向荏身到荏身命 ê 時間大約按 1960 開始，往過鞏金 ê 牛豬雞羊肉成做俗物 bué 食破家，往過 hőng 頓印仔 ê 魚成做愛擲捒 ê 舊漚舊臭，除了顧筋骨 ê 魚油掠外，m̄ 免飼料成本 ê 魚是散凶人上好 ê 卵白質來源。

巡田園翻田塗，巡著這篇確定 buē 閣熥一斗 ê 食譜隨徙來迎新棄舊。

迎新棄舊想 bueh kā 舊文筅黗，總是過了代無表示伊 m̄ 捌跟綴咱生活，敢 m̄ 是？

雞毛筅仔按屜仔捎出來順坱埃一字一字筅黗 mā 筅近來滓著 ê 無枷夯交椅。

近來收聽風雅三姊妹《較停仔，講予你聽》hōo 我 tuì 這三位大學生生湠頂勻交下勻 ê 心適 mā 想 bueh 跟綴𪜶 ê 跤跡翻頭踅轉去 Instagram，總是一聽著 Instagram 壓力就若玉山。

寢幾日反 gún 翁無 bueh 穿 ê 衫褲做粗穿，順紲反著三領伊家己 mā buē 記得布料誠好 ê 牛仔褲。

問伊敢 bueh 囊看覓，伊應好隨囊 mā 隨做花枝一尾㽎 buē 離講「你有十冬前 ê 牛仔褲，我 mā 有(32腰)」。

看伊 tsiah 風神， 我講「咱來看你 ê 風神敢有法度擋一冬」。

話講無幾日，聖誕節過後隨講「我加 bueh 兩公斤...敢 ē-tàng請媠某繼續 kā 我鬥相共.....」

「Gún 德國人過聖誕節舊底就是愛食甜粅粅，而且我按怎食猶原無起磅」我應。

頂幾日磅仔 ê 數字一屑仔攏無變化 hōo gún 翁開始 tuì 醫師好辣看來 ê 5:2 食食慼心，我 mā 清楚知影 tī 這个崁站 tuì 伊講寡愛有耐性齊是提石頭擲 tī 水埤，無應效，隨 kā 耳仔鬥門枋較 buē 成做相拍雞，畢竟這个主意是我推薦 hōo 伊--ê。

寅(în)猶停跤，臺灣熱人 ê 卯(báu)已經行跤到 ê 德國天色今仔日敢若代先預知(ī-ti)逐日做陣讀夜間部 ê 人 bueh 燃一鈷茶請我啉，sóo-tí 到今猶原暗殕暗殕。

我無應話 mā 無深情交伊四目相看，欶一喙大氣 kā 家己當做貓仔交牛展筋骨，kā 呻 buē 離 ê 茶鈷聲轉做 Savasana ê 音樂聲勻勻仔跟綴恬靜起身划向客廳，看露台彼幾坩無人看顧猶原生湠甲若英國花園 ê 花草，彼欉茄仔花有 ET BOITE ê 色水。

啊，我 ê 青春，隨斡頭踅轉去房間開始揣彼領按人徙岫到德國 m̄ 捌閣囊過 ê 十外冬牛仔褲。

「你 teh 揣啥？」翁總算 kā 燃甲無水 ê 茶鈷禁掉。

我 ê Blog 就 tshan-tshiūnn 引𤆬德國按四散領土沓沓仔成做若一隻草鍥(kueh)仔 Friedrich der Große tuì Schloss Sanssouci 無愁宮 ê 設定 den, hier mus ein jeder nach seiner Fasson Selich werden tī 遮 ê 每一个人攏愛順家己 ê 意志得著快樂佮幸福。

Blog 是我自在成做茶鈷呻 buē 離 ê Sanssocui mā 是記錄目今、未來交翻草過去喙斗 ê Muse。

自交歐洲人來往到成做龍鳳十外冬，烏貓姊 ê 向望，有一日 bueh 行踏 In the Name of the Father 以父之名 ê 愛爾蘭交 hām 伊有交纏歷史 ê 007 故鄉英國到今猶未 hōo 伊按想法成做現實，是按怎 ē 按呢生，我無啥理解，總是清楚知影自 2008 按美東轉來臺灣，本底興趣趣 ê 英國火轉做廕火，愛爾蘭因為 Michael Collins 交 The Cranberrie, U2 帶 hōo 我 ê 翻草到今猶原 m̄ 捌洘流，總是想 bueh 行踏 ê 角勢 tsuē 甲若麻仔 hōo 我無法度成做愛哭愛綴路跟綴德國本底按算實施 ê 法令，𠕇仁 ê 包裝除了標示克重 mā 愛標示有幾粒 ê 閒甲掠蝨母 kā 時間分 hōo 愛爾蘭。

按臺灣徙岫到德國，愛爾蘭無閣 tshan-tshiūnn Fiona ê 徛家遐爾仔遙遠 mā 無閣一年 365 工 kan-ta 拜六交禮拜通歇睏交歇一个長假需要窮斤算兩交算日，我 tī 德國 ê 時間 ē-tàng 講是閒甲掠蝨母相咬 ê 閒仙仙，按算 ê 愛爾蘭猶原 m̄ 捌實踐，準做全球 uī-tio̍h Covid-19 無閒𩑾𩑾 hōo 我閣一斗學著人生千算萬算，m̄ 值天一劃 ê 智慧，我 tuì 行踏愛爾蘭 ê 綿死綿爛猶是瓊花一暝就散甲無見一片花瓣(bān)。

今年(2019)愛來愛爾蘭，機票一訂隨飛交英國 mā 是交纏 ê Malta 馬爾他。今年(2020)愛來冰島抑是愛爾蘭，歐洲鞏金 ê 飯店大落價一台 Peugeot 206 就 ē-tàng kā 荷蘭交比利時踅透透，出發。 今年愛來愛爾蘭抑是冰島，按馬爾他，荷蘭比利時，波蘭捷克(2021)，Balkans 巴爾幹半島(2022)，波羅的海三國(2023)到瑞典挪威(2024)，愛爾蘭逐年攏按算 mā 無一年有準算。

喙咂一喙 Ka-pi 目借烏仁目鏡 ê 妝娗向窗仔外有淡薄仔黃、淡薄仔青、淡薄仔紅、淡薄仔烏 ê 街路金金相，阿章「我朦朧理解到這世界有些假惺惺的東西被裝飾得外表美麗➀」像一粒金含 tī 捎無摠 ê 金色 Blue 透甜蜜。

「這 m̄ 是妝娗悾闇(khong-am)交別人 ê 囡仔死 buē 了 ê 抾空。」

那些朽木滔滔飄流，那些漩渦讓人頭暈，那些沙蟲瘋狂跳躍，無數蜉蝣和蟲子死得理所當然，屍體覆蓋在河岸邊一層白。它們不會煩惱道德，它們也不雄辯 --- 阿章 ê 話 tshan-tshiūnn 鸕鶿(lôo-tsî)箍頷 kā 我捎無摠 ê 金色 Blue 伴彼暝你 ê m̄ 捌是我上好 ê 食聲齊送 hōo 無聲無說 mā 無照氣象報告來行 ê 頂晡。

金甲若卵包卵仁 ê 天，換一个角度食 Ka-pi R 專工按臺灣紮來德國送我 ê 遇見幾乎換個角度看生活 ê Ka-pi 茶甌，查埔囡仔手插胳頭敧一邊，兩蕊比四跤仔閣較細 ê 目睭 m̄ 知 teh 看啥物，我 ê 頭 mā 開始跟綴伊斜(tshiâ)一邊，本底 ê 光炎炎成做軟晡日斜西。詩人交哲學家多數在田野(tiân-iá)，詩文滿喙邊者多數像玲搪著 ê 華僑➁世界 kan-na 一个角度 。

假仙假觸是妝娗甕肚交悾闇上好 ê 欺瞞，hōo 我嫌伊䆀 ê 白銀魚紫頭菜生菜盤是我硬 bueh 笑伊老猴穿花衫 ê 無四配 ê mā kan-ta ē 曉用一个角看世界。

進前熥舊文就決定放棄逼虎傷家己 --- 硬 bueh 綴人成做文青讀遐 ê tsham 我無一倚 ê 冊，總是我就是愛佯青/星銅牙槽鐡喙齒 m̄ 相信家己無彼个斤兩，我掠做出門行跤花這囮(buê) ē hōo 我 kā 彼本冊讀甲齊齊無一屑仔肉幼仔通揣。

結果...我正經牛就是牛，牽到北京也是牛。

我甘願閒仙仙，閒到掠蝨母相咬 mā m̄ 願 kā 彼本冊提出來讀，這久寫 Blog 翻草 tsiah 掠著漏。

我愛黜臭別人十个臭頭，九个破豆，我家己 mā 是𫝛款。

不過，準做事實是按呢我原仔堅持愛佯青/星，起因十个囝仔十樣生。

M̄ 知影是減肥彼段期間食食無閣綴翁正頓 m̄ 食，激食點心，彼陪伴我久冬 ê 問題，伊發現猴踅桶，變無輦，包袱仔款款 leh 偷走厝，致使現此時 ê 我 ē-tàng 風神講「我誠實是一條腸仔迵尻川」總算，m̄ 免提錢買奴才來做。

不而過，我 ê 大腸頭現此時有法得遮爾仔輕蠓蠓 mā 愛感謝德國 ê 外科技術，無𪜶 ê 鬥相共，我 ê 大腸頭到今該當猶是滯甲若東石 ê 外傘頂浮崙 bueh 徙位愛等海波浪遮 ê 自然變化。

是啦，彼掠做無重要 ê 問題成做我跍便所上齷齪 ê 艱苦，彼弓蕉明明就 bueh 趖出來，糞口 ê 毋成囡仔就是 buaih 放伊出來 ê 風火著。

30 捅歲仔就知影家己有內痔，總是彼陣 ê 衛教資料無這久 ê 斟酌 hōo 我掠做內痔 buē 愈來愈大粒免去要意。

這斗因為醫師好辣 hōo 我知影內外痔 ê 變化，tī 彼粒 hōo 先生號做洋刺波 ê 內痔一走出來隨揣專門科來問診，總是遮是德國 m̄ 是台灣，電話、電子批敲甲寫甲我想 bueh 規去轉來咱番薯島處理，總算有一間專門外科有時間 hōo 我齪嘈並得著一隻德國豬(Schwein gehabt)先生隔轉工有時間 kā 我處理。

按 Google 臆你佮意遐看來 ê 食譜感覺有興趣隨看厝內材料敢有 tsiâu-tsn̂g。

有，雞心豆有，生菜葉有，白花仔菜 mā 有隨成做愛食愛綴路 ê 綴 leh 做。

白花仔菜 tī 烘箱烘，湯鍋仔 ê 番薑仔湯 teh 𤉙，手內 ê 生菜葉當 leh 佮橄欖油牽手唱相褒歌。

我是 Pflücksalat➀，借問阿哥你是 Tsiâ。

對乎，借問阿哥你是 Tsiâ？

翁兜勥母蹛院，勥爸敲電話來交代昨日講 ê 危險已經渡過就開始無話講茭荖，問 gún 遮 ê 天氣按怎，問 gún 明年車日子 ê 計劃就是聽無𪜶後生問一句「你過了好無」hōo 我感覺爸母做到這个程度實在足悲哀，總是𪜶兜 ê 囝仔有這款態度𪜶做爸母 ê 人愛負責任。

翁兜 ê 家事我這个外人無權交插，總是爸仔囝彼日 ê 對話 hōo 我感覺足悲哀，家己捏大漢 ê 囡仔竟然是上熟似 ê 生份人，𪜶兜 ê 生份 m̄ 是咱認定 ê 18 歲就獨立 ê 生份，是後生出門車日子轉來第一个敲電話講平安 ê 對象是伊熟似十外冬 ê 朋友 m̄ 是𪜶爸母。伊這款手機仔捎起來 m̄ 捌想過爸母 ê 生份 hōo 我想著 Gún 一家伙仔生份人 ê Strangers in the House，是講 gún 翁 ê 故事佮這本冊無相仝，總是𪜶兜 ê 問題佮伊搪著我 tuì 伊相踏脫 ê 反抗 mā 佮誠品 ê 這段話無宛 2 體。

衝突，在於父親對於兒子自我主體追尋中，展現的巨大巍峨身影；也在於身處以色列占領的歷史境遇下，巴勒斯坦人主體行動、思考的關鍵性抉擇。戰爭在此一如劇場，內爆、震動、陌生化了舞台上微小個人的情感良知，特殊如父子至親，卻又普遍如境內人民，以致同屬一家，卻彼此隔閡疏離。

聽無後生 ê 關心閣 m̄ 甘掛電話開始喋伊這月日 ê 四常變化，𪜶開始食寡較早 hōo 𪜶投我想 bueh 毒𪜶佮無尊重德國人食食文化 ê 物，這些物 m̄-nā 好食閣健康。後生恬恬仔聽無問傷 tsuē 問題，坐踮客廳無愛聽𪜶爸仔囝對話 ê 新婦，因為伊開擴音 hōo 我無法度無 kā 耳仔成做天線斟酌聽，特別是魚這項。

「恁兜 m̄ 是規家伙仔攏 tuì 魚臊過敏？」翁電話掛掉我隨大聲問。

因為捷克白草花 hōo 我按本底是 Es sollte nicht so sein 無緣 ê 白草花轉做 Es sollte so sein 有緣，這幾日𫝛款是無緣 ê 紺草花開始 tuì 翁上童並呻我是大細目，懸低耳。

「我 tsiah 無大細目，懸低耳，是你無鹹無纖」

「我 tsiah 無無鹹無纖，是你 buē 泅嫌溪狹」

「你 m̄ 通有 sui 無 kuānn，烏白講話」

「這是水晶鐘，照玻璃 ê 清清清，你講別人 A-ta-mah-khòng-ku-lī 你家己 mā 是」