亂皂𥴊仔店 ⓂⒺⒾⓃⓀⒾⓄⓈⓀ

本底是想 bueh kā 德文食譜囥踮德文版本 ê Cookpad 成做掠外一个德語練習環境。

Tsiâ 知 APP tsiah 掠一半伊就懶屍 buē-tín-buē-tāng 隨放棄，總是我是𠢕反冊 ê 性地，一決定放棄 mā 反著近來發生 tī 美國免費網站 ê 個資漏洩佮二冬前我捌搪過 ê 問題，特別是這件代誌是發生 tī 德國。

德國有一个聽講(𪜶家己分張 ê 紹介)是全歐洲上大上 tsiâu 全 ê 食譜網站，𪜶歡迎世界各國 ê 人踮𪜶遐寫食譜佮分張家己綴 leh 做 ê 相片，簡單講就是臺灣 ê Icook 精差語言需要使用德文佮每一份食譜 hām 相片攏愛經過𪜶 ê 審查，有通過 tsiah ē-tàng 上𪜶 ê 網站，這點佮愛料理就無相仝。這个規定看起來規矩閣公正，窮真是顯現一个人提著權利 ê 㾀勢面。

猶未參加愛料理進前，我人已經 tī 這个網站踮沫分張家己綴 leh 做 ê 相片。加入愛料理我就沓沓仔 kā 綴 leh 做 ê 食譜佮相片記錄踮愛料理， mā kā 原食譜連結分張踮小撇步這格，hōo 有興趣理解閣較 tsuē 資訊 ê 朋友有完整 ê 資料做參考。

一日，我照四常 ê 慣勢 kā 相片寄 hōo 德國這个網站。我 ê 攝影風格從來 m̄ 捌改變，寄出去 ê 相片 mā 罕得有回應隨上刊，除了一回人 tī 臺灣無正港 ê 白脫牛奶(Buttermilch)就家己捎優格透 Lê-bóng 汁來做 Irisches Sodabrot(愛爾蘭蘇打麭)，彼成品當然無法度上刊，畢竟優格 m̄ 是白脫牛奶。

當我 buē 閣想 bueh 發表演講或是寫一篇作文 ê 時，我知影彼就表示我 tuì Mǹg-sǹg ê 出現 mā 已經成做四常 ê 無要意。

合該然按呢講，我知影伊 tī 我 ê 四箍圍仔 mā 拚勢想 bueh hōo 我驚甲失魂。

總是，這粒球 ê 年間 hē-hāng 一直 teh 改變，我 mā 𫝛款。

我 tuì Mǹg-sǹg ê 態度 buē 纏綴孔老夫子交代 ê 金言「敬鬼神，而遠之」。

起因，彼表示你原仔愛驚 Mǹg-sǹg m̄-nā 3分 niā-tiānn。

當初號名做阿表(A-Pió)，無啥特別 ê 因端，kan-ta 我無想 bueh iōng 本名本姓投稿 mā 無想 bueh 號一个假俳 ê 筆名佮 gún 翁 m̄ bua̋i hōo 我借伊 ê 姓投稿，我就想著 tsuē-tsuē 臺灣序大按捌字 hőng 準作 m̄ 捌字 koh 兼無水準 ê 低路人，阿表(A-Pió) 這个我捷捷 tuì 人講 gún 媽若無 tuì 人講伊疊翁 ê 姓，應當無人 ē 認為這 m̄ 是伊 ê 本姓。

這 m̄ 知影敢是 gún 阿公知影查某人嫁翁後愛疊姓，sóo-tí 查埔攏號雙字，查某號孤字，按呢日後成做人 ê 牽手疊姓較自然，唸起來 mā 較 buē 頓蹬㧎㧎。 

事實是 m̄ 是按呢，我 m̄ 知影，總--是自我捌代誌，大多數 ê 人攏掠做這是 gún 媽媽 ê 本字姓。

當然--lah，這是有年間 ê 差別，gún 媽媽𪜶彼沿--ê，一聽隨知影 gún 爸爸姓啥。 

2023.05.18 那款早起頓，頭殼 mā 一直烰詹美樹三字。

Ē 記得新聞講𠢕眠夢 ê 人是因為睏無好 m̄ tsiah-ē 一直眠夢 buē 離。

歷史是一篇 hōo 研究者揀選出來 ê 世說新語。

物食是按這个土地生湠佮看 tsiâ 較有才調佮耐性將伊四處湠。

恁講 gún 正宗，我家己 mā 無確定。

起因，我捷捷 teh 思考，領土 ê 定義 m̄ 是講倚恁彼搭就是恁--ê，是按怎我倚 TR 遐爾仔倚，Zypern 倚 TR 遐爾仔遠，GR 佮 TR 攏講 Zypern 是𪜶-ê，雖罔現此時 ê Zypern 有一半是國家，總是遮 ê 問題 tī 未來又閣 ē 成做啥物款生張咱 m̄ 知影，因為未來 ê 故事原仔 m̄ 是咱遮 ê 平凡人所編寫。

我真慣勢別人 kā 我當做中國人來看待。

#記錄寫 tiàm IG ê 文字

你敢相信夢中 ê 你是掠外一个神魂。

我相信，我有一个朋友 gún 因為另外一个人 tuì 伊講寡代誌 ，就此 m̄ 捌相交插 20 guā 冬 mā m̄ 知影伊人 tī 佗落。

一暝，我夢著伊。

夢中 ê gún 猶原若往過按呢快樂練仙543，m̄-koh m̄ 知啥物因端悲傷 ê 海湧 mā 一直按我遮絞過來。

#記錄寫踮 IG ê 文字

相片翕煞 tsiah 發見這斗碗盤攏是雙生仔，一逝暖暖燒燒 ê 幸福開始 tī 心肝穎發。

感謝所有 ê 生份人，感謝恁 ê 愛佮分張，因為無恁我這个頇顢人無可能 ē-tàng tī 到期進前 kā 遮 ê 瓷仔攏款齊。

Heh--lah，tsuē-tsuē 德國朋友看著我 tī 抾點數隨 kā 手頭 ê 點數讓渡(jiōng-tōo) hōo 我。

特別是有一斗，一位太太一斗提著100點拄好一張卡 ē-tàng 換瓷仔，伊隨 kā 100點讓渡 hōo 我。

#記錄寫 tiàm IG ê 文字

愛就是無聊無賴 ê 四常，湠出來 ê 滿足。

愛 mā 是自私 ê 好朋友。

我是好字運 ê 人搪著 buē kā 愛當做理所當然 ê 牽手。

聽翁按呢褒唆，我 ê 手實在是無法得無賤一下 kā 伊準做度針 kā 伊度一个。

近來我又閣 teh 踅這个箍仔...

我 tī IG 囥我 ê Blog 網鍊誠風神...

當我想 bueh kā 網鍊提掉雄雄想著我分張我翕 ê 相片煞 hōo 人講相片是我 ka̋ng 偷 ê 代誌。

一想著這點本底 ê 起毛敲油隨敨放，起因我想著彼陣就是無家己 ê 厝 m̄ tsiah hōo 彼个明明是歧視煞 hōo 伊轉做咱無所在通證明彼是我翕 ê 相片 ê 過了代。

人生有 tsuē-tsuē ê 起毛敲油，愛按怎 kā 遮 ê 歹油轉做好油這誠實是智慧。

四常食食，四常翕相，四常寫文佯星/青，四常成做一粒長尾星。

M̄ 知影老舵(tāi)公是 m̄ 是有看見海來 ê 對手堅心漲懸價 ê 報表，sóo-tí 近來一直俗賣𪜶兜 ê 魚。

我 m̄ 知影別搭 ê 超市敢有按呢做，賣魚敆食譜。

總是 gún 遮 ê 超市是按呢 teh 推捒老船長 ê 魚。

按呢 ê 做法我想應當有 hōo 供應商佮阿羅𪜶 ê 合作社笑咍咍，因為 hōo 人嫌呔 ē 值這个價 ê 瓜仔哖猶原賣甲斷貨。

翁某做伙食早起頓，我 tuì 翁講「tsa̋ng，我 kā 記錄 ê 資料一擺刣 bueh 50 篇。」

「按呢，你 m̄ 著愛 tī Icook/愛料理囥遮 ê 个網鍊」翁講。

「目前無這个想法」我答。

「按呢敢 buē 拍損」伊問。

「一屑仔攏 buē 拍損」我應。

已經 buē 記得 gún 是底時去澎湖，不而過 gún 攏數念彼尾好食甲連喙白 ê 翁 ê 舌 mā 擉 buē 離 ê みそ旗魚。

魚臊 tuì 我這个按番薯島大漢 ê 囝仔 buē 生份，魚臊 tuì 蹛 tī 倚海 ê tsiah 小小一角勢 ê 德國，gún 翁來講伊 m̄ 是僫 bué 伊是 bué buē 落手。

不過，德國 ê 魚臊成做今仔日 ê 生張 mā m̄ 是伊一出世就按呢生，伊罕得食魚主要是厝內 ê 天霸王一人咻過敏，逐个 mā 愛纏綴伊過敏 buē-tàng 食，無綴表示無愛伊，真有意思。

Gún 翁自囡仔就若馬戲團 ê 熊，本底愛食魚臊 mā 成做見魚臊 buē-su 若鬼仝款，遮寫魚臊表示各款海底各款生物伊攏無食，總是翁某 ē 誠懇睏鬥陣食食 mā-ē 成做米糕𣻸 hōo 伊我無法。

總是，德國 ê 魚臊正經無講耍笑，新沢魚臊 bué buē 冇手換冷凍魚臊 ê 我試過幾斗，我甘願食肉過日子。

M̄ 知按底時開始，食一个物件抑是分張佮意 ê 物食攏愛 tuì 人講喙尾，好味素無。

我無反對別人成做美食專家，總是我討厭別人要求我愛成做𪜶 ê 美食專家。

佮 gún 分張喙尾，敢 ē 減你一塊肉？

敢有需要遮爾仔孤佬 kā gún 講一句好味素抑是䆀味素敢？

分張喙尾，buē 減我一塊肉，我 mā buē 孤佬，起因食譜抑是物件攏攢 tsiâu-tsiâu hōo 你試鹹汫。

Tī 肺炎疫情開始進前，我一冬 ē 轉去臺灣一改，轉到厝我 ē 紲手 kā 寄踮德國 ê 冊紮轉去閣紮寡新冊來德國，kā 冊紮轉去臺灣，這是一个六月芥菜假有心好禮挨推別人「順紲」閣一兼二顧摸蜊仔兼洗褲 ê 好辦法。

自 Covid-19 四界開始走傱，這个六月芥菜假好心摸蜊仔兼洗褲 ê 過冬鳥日子就此無閣接續，準做我足想 bueh 接力(li̍k)走標，一想著厚甲若蠓 ê 規定𩛩無夠勇壯若 Richard Branson ê 枝骨，我猶是乖乖仔做地球 ê 狗蟻，拆一張往回--ê 機票，我 ē-tàng tī Balkans, Baltikum, Skandinavien 車日子。

人正經是相踏黜 ê 動物，往過僫離島一所懸命(Isshokenmei)來離島，這久正經離島，一所懸命(いっしょけんめい)轉去食番薯。

窮實，按呢寫數念是有較一隻蝨母嗙甲水牛大，起因人是感情動物，我 tī 臺灣除了彼間公寓通蹛，賰 ê 是四角磚揣無一塊通徛 ê 無依無倚 tuì 番薯島 ê 數念自然就 buē 深甲若 Mariana 海溝，深無見底。不過我猶是食番薯奶水大漢 ê 囡仔，我 hōo 番薯飼大漢 ê 胃口來到德國猶是無法度改變，準做遮有 tsuē-tsuē 圖書館通無料借冊來讀，總是遮是德國 m̄ 是臺灣，遮 ê 人意愛 ê 文學佮我意愛 ê 文學無相𫝛，譬論講犯罪寫實(Tatort)，我 ê 德國朋友十个有十个攏讀這類 ê 冊，2023 跨年夜一陣德國人交換 ê 冊猶原是犯罪小說，只不過作者按德國人轉做加拿大人。

按呢紹介德國圖書館 mā 傷重敧爿，不過這是我徛地環境 ê 面肉佮日常，是講 m̄ 管讀啥物冊，總比讀手機仔冊閣較好。

鏡新聞台語聽有無是 tsuē-tsuē ê 台語教學連結，我 ē 一集一集接續看落去 ê 節目，m̄ 知敢是這个 m̄ 捌煞鼓 ê 興趣 hōo 翁 mā 綴 leh 成做一隻貓跟綴我 ê 跤步看節目。

「我讀有 mā ē 曉講--neh」，「賣麵--ê，看人撒油 mā 是無較縒」這 mā 是單元煞鼓 gún 上捷 ê 對話。

翁捷講「台語攏寫漢字伊讀無，自然就 buē 有興趣」，這久有羅馬字 hōo 伊讀，伊又閣講「這系統佮德文無相仝，僫學」簡單一句看 buē 上目 mā buē-tàng 一條腸仔迵尻川，總愛 kā 家己 ê 大細心捒轉去 hōo 看 buē 上目 ê 事項，來哭呻是恁 ê 複雜造成我 ê 慢牛厚屎尿。

今仔日下班轉來看我認真綴何信翰副教授學習 phi̋n-phóng，伊隨出聲我知影 phi̋n-phóng 是 Tischtennis「咱敢 ē-tàng 翻頭重看一擺？」

我知影牛牽到北京猶是牛 kā 影片踅翻頭轉去餾一斗是白了工，猶是 kā 家己當做影戲放送師 kā 影片底片沓沓仔絞轉去第一秒，放伊一个人恬靜仔綴何信翰副教授學習台語，我利用這个時間斟酌繩家己花巴哩貓(hue-pa-lí-niau) ê 筆記。

翁分張謝大使接受德國 N-TV 電視採訪 mā 呵咾謝大使 ê 德語講甲實在有夠讚， 只不過腔口重甲 hōo 伊無法度踅神。 

「你 bueh 講幾句仔英文抑是臺語無」我講。

「謝大使 m̄ 是德國人，伊講 ê 德語有外國人腔彼是足正常 ê 代誌」伊知影𪜶某 teh 剾洗伊佮𪜶爸母無宛 2 體 ê 有喙講別人無喙講家己 ê tī hőng 𠞭甲骨攏看無進前緊收煞。

總是，病按喙食，禍(ē) mā 按喙來，伊掠做按呢就 ē-tàng kā 代誌挲掉，伊就正經 kā 我當做佮戇 ê，掠做我佮伊相仝，只要𪜶爸母出喙 m̄ 管正經抑是不答不七攏 ê 認真收藏閣 kā 當做聖旨來守護。

「你 bueh 寫批請恁德國大使重錄品味歐洲 無」我講。

I'm feeling angry.

有 ê 人 ê 興趣凡勢是自七早八早起毛䆀，理解這个問題我就 buē 閣了工 tsham 𪜶盤撋。

畢竟，氣死驗無傷。

Tshan-tshiūnn V 遐 ê 人按呢，我 m̄ 免 uī-tio̍h 𪜶是朋友我就愛 kā 𪜶關心到到。

起因，佮遮 ê m̄ 驚火燒厝，kan-ta 驚跋落屎礐萬事 kan-ta 要意家己 ê 人認真是蜈蚣趖入狗蟻岫自揣死路。

近來一直想 bueh 做一斗 kā 早前囥 tī 愛料理 ê 相片全數刣掉，起因我無想 bueh 繼續跍 tī 遐。

是講 mā 無人叫我愛跍 tī 遐，是我家己倚過去....

總是，我著是有這个病症，無佮意 ê 事項決定愛規捾消失 tsiah buē 刺鑿。

總是，一筆一筆刣我 mā 無彼个閒工，就煞煞去.....

當我願意放伊煞煞去，我雄雄想 bueh 吼，起因我總算學著扴著魚刺 mā 愛冷靜 ê 智慧。

我 tuì 食 ê 態度較垃圾食垃圾大。

這垃圾食垃圾大 m̄ 是講，物食臭臊我 mā buē 要意。

我 ê 垃圾食垃圾大是，我 buē 纏綴商品包裝日期來決定物食猶原 ē 食抑是 buē 食。

Tshan-tshiūnn 這份料理 ê 雞肉就是按超市落價專區遐款轉來又閣囥一睏仔久 tsiah 挈來煮 ê 一項物食。

不過，我這款食食態度 tuì 萬事攏愛遵照「專家講咱愛按呢過日子」ê 翁來講這是自殺行為。

這幾日直直愖這句按朋友遐學來 ê「抓麻」tī  台語愛按怎表達？

請教教典揣著仝音，m̄-koh tsham「抓麻」門扇枋鬥 buē 峇，請教客語教典 mā 揣無。

早前猶 tī 面冊賴賴趖，有人見著我寫「tiàu」寡味隨講「台語無這个講法」，彼陣我 mā 無了時間解釋，不過「專家」修正 hōo 我想著真𠢕抾恨 ê 遠親表兄分張 ê 族譜歷史，gún 媽媽這邊本底是福建客家人按第一代來到臺灣，gún 這代是第九代，這件代誌隨請教客語辭典隨揣著台語專家講台語無這个音 ê「tiàu」(大埔音)：調味、搣、撮。

有 ê 人食到老 hoo-lú-bóng 猶厚甲若蠓愛嗡嗡叫，我猶未行到中箍 hoo-lú-bóng 就若倒山內海見無海仝款，凡勢是無見海，所以較醉心揣海愛無一件代誌餾 buē 講「遮本底就按呢生」，另外 tī 教典猶未見著 ê「Chhiok」/「Tshiok」mā tī 台華字典揣著並 tī「揣台語」揣著 ' 甘字典 ' ê 解釋「用手捻」閣「掠」，心內有一種講 buē 出喙 ê 快樂。