亂皂𥴊仔店 ⓂⒺⒾⓃⓀⒾⓄⓈⓀ

我愛食敏豆，德國 mā 有濟濟無𫝛款 ê 敏豆通選擇，gún 翁見著豆就若見著冤仇人仝款，致使豆仔 tī gún 兜 buē-su hōo 大家欺負甲忝忝忝 ê 新婦仔 tī 伊猶未踏出房門大家就開始詈，踏出房門 bueh 好好仔寬寬仔沓沓仔踅踅蹓蹓又閣愛等大家無踮厝內 tsiah 有法度順順仔敨中氣。

寢頭我掠伊這喙白是純天然，sóo-tí 尊存伊佮豆仔 ê 冤仇結甲深無看底，總是 L'essentiel est invisible pour les yeux 上蓋重要 ê 物件，用目睭是看袂著的。

Tshan-tshiūnn 翁 m̄ 承認伊承𪜶爸母 ê 歹癖，𪜶爸母 m̄ 承認家己 ê 智識 kan-ta 拄好峇𪜶彼个年間 ê 驕傲，特別是𪜶老母認定家己是四書五經讀透透 ê 窮實是 m̄ 捌字，告看示黿鼇龜鼊竈(guân ngôo ku pih tsàu)齊講做龜 ê 臭煬。

翁 tuì 豆仔 ê 態度就 tshan-tshiūnn 伊老母黿鼇龜鼊竈齊講做龜𫝛款，豆仔有臭味 buē 食，不過有臭味 ê 菜蔬 tuì 伊來講 mā m̄ 是 kan-ta 豆子家族 niā-tiānn，植物類 kan-ta 甘蔗無䆀味，是按怎甘蔗無䆀味，因為伊「糖甘甜」。

我愛食豆所以我有法度接受𪜶兜勥母出 ê 豆仔 mā 因為我有法度接受𪜶兜勥母 ê 豆 hōo 我神經絞無按失覺察，繩佮愖是按怎伊 ē 慼豆仔慼甲深無見底。

魚肉鋪一層 Tshì-sù 喙尾敢若 tī 食封肉，佮意甲。

我 tuì 翁老母咸豐三，講到今 ê 驚人 m̄ 知「魚臊 bueh 挃伊 ê 命」無興趣研究「Kore wa honto....」意思是「這是毋是真的....」〈若掠水雞的〉；總是我確確實實確定翁佮𪜶老爸、小妹三个人無一个人 tuì 魚臊過敏，不過天霸王講𪜶 mā 愛過敏，三个人就綴天霸王 tī 伊 ê 面頭前過敏抑是綴 leh m̄ 敢講一句「Meeresfrüchte」上譀古 ê 代誌是連 Seafood 佮 Mariscos mā buē-tàng 講出喙。

翁本底 mā 向望我跟綴𪜶 ê 跤步 tī 天霸王面頭前 mā tuì 魚臊過敏，總是我無姓𪜶兜 ê 姓，正經真僫綴前綴後半路出師來過敏。

這斗，天霸王佮翁婿做陣來囝遮暝，無興成做翁佮𪜶老爸盾牌 ê 我 mā 照家己 ê 跤步款下昏飯，翁老爸行入來灶跤問「咱今仔日 bueh 食啥？」

「Gún 今仔日 bueh 食鱈魚烘」話聲猶未落塗，玉音已經隔一堵牆放送「Gún 規家伙仔食魚過敏。」

翁講，伊較佮意食三文魚 ê 原味，因為這句話我開始思考，我 bueh 按怎解決這仝桌無仝喙斗 ê 問題。

愖仔愖，想仔想，想甲頭殼 kiōng-bueh 磅去 tsiah 發見家己正經是大目新娘揣無灶閣食飽換枵。

Kā 咱臺灣媽媽上捷煎 ê 肉鯽仔照原路 kā 伊徙過來就解決矣，不過，三文魚有我無意愛 ê 臭塗味，愛加一步 hōo 三文魚食寡酒。

--- 2020.08.27

巡菜股翻田塗想著【台灣新眼界】20221212 中國閣來矣！王梨.午仔魚.食品輸出攏刁難！政府問原因已讀不回！敢真正無伊法？應當是這集...貧惰閣熥一斗。

W vodzie, owj płynnej Materii, never ma nic stałego and vox et praeterea nihil

水這个物質從來 m̄ 捌固定，挪威三文魚 ê 價數是若臺灣 ê 山嶺一下仔懸一下仔低 ê m̄ 捌固定 hōo 我開始數念無肺部 ê 伊 hőng 診斷出伊滓著 Covid-19 ê 日子。

德國白金(Spargel m̄ 管佗一色)今年漲懸價到一公斤 20€，草莓一公斤 9€ hōo 我巡菜股見著 Asparagus 隨翻田塗栽新栽，總是人是有感情 ê 動物，栽新栽老欉猶是 m̄ 甘 kā 徙栽抑是薅甲無半个根頭，這个手栽新栽，老欉 m̄ 甘薅 ê 雙跤踏雙船 hōo 我靜甲若 Palau 豬籠草(ti-láng-tsháu) ê 心又閣開始腹肚枵。

Inhale, Exhale...德國保險無保筋骨痠痛無想 bueh 跟綴 Story ê 故事成做主角群其中一个我就愛骨力寡，畢竟我 ê 橐袋仔是袋磅子 m̄ 是銀兩，Einatmen, Ausatmen...Den Stil verbessern - das heißt den Gedanken verbessern, und gar nichts weiter! 

Insanity: Doing the same thing over and over again and expecting different results.

料理這出 tuì 臺灣人來講是珍貴 ê 菜蔬 ，tuì 歐洲人來講是白汫無味 ê 夏金瓜，亞特問巴奈「母語」佮「第一語言」，巴奈佮柯董 ê 回答攏足觸觸我 ê 心，起因我 ê 阿母本等是福建客人，來到臺灣綴環境改變，語法當中凡勢猶原保留客語，總是年間變化，伊認捌 ê 語法就是台語 m̄ 是客語，準做有人講台語無人按呢講，總是彼是伊 ê 族群 tuì 環境生湠 ê 語法。

我 ê 芋仔老爸 mā 仝款，按中國顛顛跛跛來到臺灣，故鄉 ê 語言留 hōo 故鄉，紲落來學習新 ê 語言，準做有人笑講一句攏聽無，這个新故鄉新語言 mā 是伊 ê 母語。

我 ê 母語就 tsuē 款，總是現此時講甲較輾轉 ê kan-ta 華語，不過我 mā 認為德國通用德語 mā 是台語掠外 ê 母語，準做我 ê 英語講甲比德語較輾轉，我猶是感覺講德語比英語自在，像巴奈講著伊唱「法語」、「德語」、「葡萄牙語」ê 感覺。

凡勢有人 ē 講，彼是因為你有彼个環境 m̄-tsiah 有法度 tuì 德語產生認同，這點我無確定，總是我知影 tī 臺灣這塊土地有 tsuē-tsuē 人是連講優勢語言「華語」 mā 感覺見笑，愛講「I don't speak Mandarin but English」。

亞巴奈26歲開始揣家己，我26歲開始揣家己 ê 認同佮認捌家己是 tsiâ，gún 攏 tī 26 歲開始想 bueh 成做真正 ê 家己，這个做家己 tuì 我來講是一件比「選擇」閣較重要 ê 代誌，起因一開始選擇就有比並 buē 煞 ê 驕傲佮自卑，無法度簡單享受人生在世短短十幾冬 ê 景緻。

一直有這个慣勢，看佮意抑是有興趣 ê 物就 kā 楔一張紙做記號。

這出菜自德國宣佈封城 hōo 我楔一張紙做有興趣料理 ê 提醒到今 m̄ 捌反過一斗，主要 ê 因端猶是網路太利便，利便甲準做食譜冊有媠媠 ê 相片 mā buē 起心動念 kā 翻一个仔身。

總是，網路猶是較攑香綴拜相趁相喊 ê 環境，一出菜準做美味しい無數字 kā 伊鬥讚聲，準做媠甲若玫瑰猶是比 buē 過圓仔花 ê 無較縒。

DAS GOLDENE KOCHBUCH 食譜冊是 tī 遮登記家甲市政府送 ê 伴手禮，菜譜百樣豐沛不過無啥相片就 hōo 我一直冷凍 tī 廚房 ê 冊櫃。

疫情進前猶有手面趁食通倚靠 ê 我，因為無法度閣自在冇手 tī 網路隔海款菜就開始綴廚房 ê 食譜冊行尞行跤花，這出菜就是按彼當時行出來 m̄-koh m̄ 捌綴 leh 栽 ê 一蕊花。

提早歇睏無想 bueh 綴四常隨轉來厝祀佛公，就盤 Bá-suh 到 Marktkauf 揣寶。 

近來 m̄ 知是天氣 teh 張掇抑是超市 teh 張掇，架頂捷捷闊閬閬 hōo 我手一伸隨摸到底，這款狀況若是猶蹛 tī 全庄 kan-ta 一間 Lidl ê Greffern 我應當驚甲『吃手手』擘腹家己瘦過頭。

這久徙位到猶是庄跤 ê 大庄，搪著這款狀況我 kan-ta 這个狀態心安草厝穩，因為超市若荔枝一大捾，路邊無人看顧 ê 良心菜蔬舖 mā 是三跤一坎攤，不過我猶是意愛踅超市，愛踅超市 m̄ 是 uī-tio̍h 吹冷氣享受優美 ê 環境，是超市 ê 菜蔬比遮 ê 攤抑是舖大碗閣滿墘兼 ē-tàng 自在手賤 buē hőng tshînn。

Marktkauf 交 Lidl、 Aldi、Netto 遮 ê 平價超市比並伊 ê 價數 buē 講真吸消費者 ê 目睭仁，Marktkauf mā 知影這个問題，所以當𪜶落價，價數是媠甲連平價超市攏喝 buaih 綴，而且閣有 tsuē-tsuē 新奇好物，像 gún 捌 bué 著無到 0.4€ ê  BIO 牛奶佮無到 1€ 好食甲到今我猶流喙瀾 ê 阿拉伯甜路。

Marktkauf mā 是我想 bueh 探德國有啥新冊 ê 好角勢。

總算 tī Google Podcast 停止服務進前，我學 ē 曉按怎掠 tsuē-tsuē Podcast 其中一个 --- Spotify。

按無耐性轉做有耐心 ê 人，這愛感謝 YouTube，準做 tsuē-tsuē 人慣勢 tī YouTube 聽 Podcast，我猶是佮意無「臆你佮意」佮若豬母牽去牛墟 ê「推薦」ê kan-ta 聲音 ê Podcast 。

感謝 Google 感謝 YouTube，因為恁我 tsiah 有這个機會發現家己 ê 潛力(Tsiâm-li̍k)闊閬閬。

是講 uī-tio̍h bueh 收聽 Podcast 我 mā 申請 tsuē-tsuē 佮我無底代 ê 口座，像「SoundOn」、「Firstory」遮 ê 我 kan-ta bueh 成做聽眾 m̄-koh m̄ 知影佗一節脫(thut)箠，我 kan-ta ē-tàng 開節目 buē-tàng 收聽。

這个問題 hōo 我齷齪，起因我有這个癖，我無佮意抑是無 bueh 使用 ê 物就愛隨清掉 buē-tàng「收藏」來鎮地。

YouTube 推薦我看  "Meet My Family" 那看那笑甲目汁生珍珠 mā 那隨想著做甲無真雙生仔 20% ê Frikassee，隨換菜單 mā 請教 Wikipedia 華文按怎 kā 定名，起因華文標題需要伊。

無請教無代誌，一請教我笑甲目汁㴙㴙滴 mā 隨決定照原名做標題。

Fricassée 是 17 世紀按 Ragout 演化 ê 法國料理，tī 18 世紀 ê 法國佮德國定名做 Fricassée 佮 Frikassee，英語 kā「é」ê 羽毛提掉成做 Fricassee。Fricassée ê 意思是切塊 ê 肉、菜蔬敆白色牽粉 --- Wikipedia。

2022 猶 teh 糋板膋驚食牽羮，2024 猶原 teh 糋板膋 m̄-koh 心安草厝穩知影「牽羮」窮實 buē hōo gún 目睭看 tī 粿，跤踏著火，只要 gún 知捌喙飽目睭枵 ê 後(hiō)果。

Mā 正經愛拆白講偷工減料 ê Fricassée 就敢若遮 ê 亞洲炒麵，你認為伊是你 ê 囡仔，事實你 mā 清楚伊並 m̄ 是你 ê 囡仔 ê  A.I. Artificial Intelligence。

ZDFneo 放送《Lion》當 Saroo 綴火車來到 Kolkata 我想著翁按 Telegram 社團 ka̋ng 接收 ê 食譜冊 ' Currys - Spicy One-Pot-Wonders ' ê「Fisch-curry nach Madras Art」。

「有人 tī 社團分張無料食譜，你 bueh 佗幾本？」翁 kā kha-tá-lok-guh 直接𫞼 tī 我 ê 面頭前，那講那問。

「彼凡勢是囮」我 kā 手機仔掰掉繼續讀伊按公司紮轉來 ê 讀老人目 ē 增加頭 mā 抽抽痛，無讀德文字庫無法度增加到 D1 ê「Der Spiegel」。

「我 kā 你會失禮，我 kan-ta ē 曉剾洗你是圓仔花 m̄ 知䆀，大紅花䆀 m̄ 知 ê m̄ 捌愖過事實，buē 泅嫌溪狹 ê 人是我」踅翻頭 kā 食譜斟酌餾 tsiah 發見，人食譜寫甲遮爾仔明「Tomaten/Konserve」  我煞猶原堅持 kā Kam-má-tooh 當做菜蔬 teh 炒，做出來 ê 成品有法度按泔糜仔成做洘糜仔，彼是天落紅雨馬發角。

Tomaten/Konserve 表示罐頭遮 ê 利便包裝，進前我食著翁 ê 喙瀾看罐頭 Kam-má-tooh 無目地，舊年日子猶未徙跤到霜降 Kam-má-tooh 已經按我猶 ē-tàng 接受 ê 2.19€/公斤起價到 2.59€ hōo 我那 tuì 伊哭呻 mā 那咬喙根抉落去，等到 Chione 正經行跤到，我想 bueh 咬喙根 mā 無齒岸通咬 ê 一斤 3.69€ 起跳 mā 因為無齒岸通咬我 tsiah 無閣阿兄蹛樓頂，哥哥(高高)在上看罐頭 Kam-mâ-tooh。

拆白講，看罐頭 Kam-má-tooh 無目地窮實受翁 ê 影響無 tsuē，起因我無反對罐頭物食，認為罐頭物食無健康。

我看罐頭 Kam-má-tooh 無目地主要 ê 因由是，準做包裝寫 Italia 伊猶原 m̄ 是 Italia，伊是按無人權 ê 角勢到 Italia 換人權，準做伊正經 tī Italia 生產，伊 mā 佮遐 ê Made in Italy ê 衫褲仝款 kan-ta 賣 Italy 這个字名 ê 虛華，像阿麗。

「你蹛德國，你敢 ē-tàng 去恁厝邊遐 kā 我 bué Longchamp。」

收到愛料理電子批見著𪜶加一个 TNL mediagene 我又閣成做貓綴連結行，紲落來整理菜股見著稗仔就挲掉，有柴草就燒掉。

我真享受這个過程，起因伊 hōo 我加一斗機會餾㧎㧎 ê 語法佮得著 tsuē-tsuē 想法，像華語 ê「羅勒」臺語按怎講？

我 ē 記得公視台語台台語智識辭庫網有「羅勒」ê 講法，隨請教正經有「羅勒」，就隨 kā 伊按 Königskraut 國王芳料草改做洋九層塔，紲落來愖華語 ê「櫻桃蘿蔔」臺語按怎講?

較早我是寫水菜頭，這个辭是循 Wiki 紹介來，總是這是無閣請教其他資料 ê 貧惰副本，sóo-tí 我感謝愛料理，因為伊我 ê 青光眼又閣回魂。

我愛食 ê 菜頭 tī 英文窮實無分甲遐爾仔幼，Radish 指細粒種粉紅色 ê 菜頭華語 a.k.a「櫻桃蘿蔔」頭前加 Green, Black 指較大欉 ê 菜頭，咱臺灣人食 ê 菜頭號做 Daikon radish。

按公共冊櫥 kā 食譜冊紮轉來，攏有這个慣勢隨 kā 有興趣 ê 食譜練一回，紲落來 kā 伊記錄 tī Blog hōo 冊有機會繼續佮別人結緣。

總是有年冬，這久 ê 記持較無烏貓姊年間 ê 精光，sòo-pái mā m̄ 是逐本 ē 閣紮轉去公共冊櫥，不過這款現象是少甲比我頭殼頂 ê 白娘仔絲閣較少。

Leichter leben in Deutschland/掠肥食瘦德國生活是舊年踅街紮轉來 ê 食譜冊，彼陣綴 leh 做 tsuē-tsuē Frühstück/早起頓像鱷梨仔檨仔 Quark、Salat/サラダ像2月季節サラダ遮 ê 無講完全相𫝛 m̄-koh 絕對是照步數，無烏白亂舞，是講我 mā 無遐爾仔勥跤有法度家己變一份菜色，總是我猶原有法度 kā 寒人菜蔬轉做熱人菜蔬來款，像這項，第一斗料理是熱人就款番薑仔替代米蘭草花 ê 配色，雖罔德國熱人猶是有白草花通替換，總是我就是無愛白草花 ê 白汫無味。

2 月底米蘭草花沓沓仔按德國換做 Italia，愛食米蘭草花 ê 我 tī 2 月行到 3 月這段時間，那享受伊 ê 好味素 mā 那感覺佗落 m̄ 是勢，總是我是 buē 儉齷齪 ê 人，特別是這款準做捎無摠猶原 buē 三更半暝出世，亥(害)死人 ê 事項，就 kā 准過。

Gún 蹛 ê 城邦 tī Fastnacht 這段期間推捒「Ein Kuss」唚一个無料參觀城堡，gún 就四界「唚一个」參觀城堡。

一日踅到歷史感情較倚法國 ê 城市，建城 mā 比現此時 ê 首都，gún 蹛 ê 所在有兩个首都，m̄-koh 行政權猶是 tī 後來成做德國歷史上重要 ê Hohenzollern 家族徛家這爿。

Gún 翁某一个喙白兼驚食 buē 飽，一个驚開錢食外口，sóo-tì gún 攏真慣勢早早出門早早轉來食下昏頓，出發 RESIDENZSCHLOSS RASTATT 彼日 gún bueh 坐 ê 車幫受著別搭鐵枝路著火暫時無通車，我隨 tuì 翁講「這表示咱佮 Residenzschloss Rastatt ê 緣份無夠深，來轉。」

「德國鐵枝路 m̄ 是 kan-ta 南北兩爿 mā m̄ 是 kan-ta 一間公司 teh 運作，較停仔 ē 廣播新路線」翁應。

Kā 家己種 tī 眠床 bueh 2 禮拜 ê 這久，偷走厝 ê 味覺(bī-kak)猶原猶未轉來，本底活潑 ê 腸仔 mā 猶原死殗殗無元気(Genki)，總是今仔日透早我有法度按食一粒白煠卵攏艱苦 ê 喙斗 kā 這盤料理規个食甲清氣啖啖，這正經是比得頭獎閣較快樂。

我 m̄ 知影偷走厝 ê 味覺佮腸仔當時 ē 轉來相揣，總是我清楚知影無好好仔食一頓飯，味覺佮腸仔愈 buē 轉來，踅神 ê 問題 mā buē 解決。

初初搪著伊感覺伊佮 Tagliatelle al salmone 𫝛款就隨看伊 buē 上目。

起因，Tagliatelle al salmone 咱 m̄ 知影已經食過幾百回 ê 𤺪，你 tī Italia 餐廳抑是土耳其烘肉店 mā 捷捷出現。

翁較早無愛食菠稜仔，伊講菠薐仔 m̄ 是菜，伊是路糊仔糜。

這个菠稜仔 m̄ 是菜 ê 問題，tī 我熟似 ê 德國朋友箍仔內有誠 tsuē 人有相𫝛 ê 症頭。

Sòo-pái 自佮伊來往，我 m̄ 捌感覺佗位 m̄ 著勢，不過見佮遮 ê 德國人做陣食飯，我攏 ē 得著這个智慧「我 ê 修養真正蓋好」。

起因，𪜶凡勢真慣勢 iōng 這種方式來表達𪜶見著 buē 合軀抑是 buē 上目 ê 事項，愛覕喙兼激氣「Ne」buē 離來表示我上捌世間事佮享受，總是修養較好 ê 人 mā 應當無興一日到暗看人 tuì 家己「Ne」兼「覕喙」。

Sóo-tí 正經愛 kā 家己褒唆講我是修養蓋好 ê 人，起因我從來 m̄ 捌當場綴𪜶激面腔兼相激，我 kan-ta buē-su 一仙柴頭尪仔 kā 家己祀佛公放外外。

玫瑰草花 tī 德國佮蚵仔菇 bueh 相仝無啥有人緣，另外伊佮我 ē 敆胃 ê 食譜 mā hōo 我做甲差不多就想講抑無來換英文食譜揣靈感。

總是，英語食譜凡勢 mā 是按歐洲生湠，我 ê 14 是講英語 ê 角勢大部份 mā 是按 Zeus 佮 Phoenicia 公主 Europa 生湠出來 ê 子民，𪜶 ê 喙斗猶原保留原生地 ê 脾土，所致有興趣 ê 食譜佮德文窮實無宛2體 ê 精差 tī 號名。

揣食譜我慣勢直接踅相片，相片有合八字我 tsiah-ē 揤落去斟酌讀作法。

玫瑰草花按歐洲湠到美洲，所致歐美兩搭 ê 食法 tī 網路攏無宛 2 體 ê hōo 我想 bueh 放棄繼續踅街，總是無宛2體猶原 ē 好玄啥物是「松阪豬(槽頭)」按呢。

Chicken Alfredo Brussels Sprouts，我捌雞肉 mā 捌歐盟首都之一 ê Brussels 佮玫瑰草花，總是彼个 Alfredo 是啥物碗粿。

食「秀珍菇」步頻想著伊 ê 德文 kan-na 是蚵仔 ê 意思，手頭 ê 碗放落桌徛起身踅去客廳反字典 hōo 家己險 bueh 德國時行 ê SOKO 現場。

華文 ê「秀珍菇」正經是德文 ê「蚵仔」(Austern) ，這个發現湠出其他 ê 好玄 --- 華文 ê「秀珍菇」是按佗落來？

華文 ê 外來物號名大多數 m̄ 是照日文就是順英文，先請教英文 --- oyster mushroom, oyster fungus, hiratake, or pearl oyster mushroom，齊齊攏蚵仔，英文受法文影響 mā tsuē 請教法文按怎寫 Pleurote en (forme d') huître 意思 mā 是蚵仔，歐洲久年 ê 三角戀愛攏寫「蚵仔」，按呢華文 ê「秀珍菇」到底是按怎來，日文？？？

日文讀無總是有和字 thang 理解平茸(Hiratake)、本平茸(Honhiratake) 扁 ê 菇，無「秀珍」2字，Ah，我講「阿珍仔」咱敢 ē-tàng hōo 我請教一下，你這个 ê 字名是按怎來？是按怎你無 bueh 照你舊底 ê 生張號名蠔菇？

わからない(Wakaranai)一聲隨放阿珍佮家己自由，huînn-ti̍t 咱文章拳頭茶 m̄ 捌半項 mā m̄ 是這久 tsiah 發生。

那款早起頓那聽 la-jí-ooh，聽著主持人請教 m̄ 知接受訪問 ê 人是出版社或是作者「以降價方式來揣讀者，你認為按呢 ê 做法敢有法度揣著閣較 tsuē ê 讀者？ 」

「Buē，因為環境已經改變咱 ê 閱讀慣勢。」

「價數無重要，重要 ê 是冊帶來 ê 價值」低路人若我 mā 綴 leh 提供我 ê 想法。

德國 ê 閱讀慣勢按設使一幫客滿 ê 火車大約有9成 ê 人 teh 閱讀，換做無夠一成 ê 人 teh 讀冊，這个現象 hōo 受法律保障 ê「固定冊數 」mā 沓沓仔 tī 討論「自由喝價」來救冊市。

按呢 ê 討論確實有發水泱(iann)，總是生理人自頭到尾猶是生理人，Radi 是 Rettiche，Rüben 是 Rote Beete ê 無宛2體，冊價降，稅金起 --- 7% 轉 19%。

頂一站仔請教翁這件代誌。

Bueh 讀各國新聞除了迵過利便 ê 面冊敢閣有其他 ê 方式 ？

「發生啥物代誌？」伊問。

「無啥代誌，只是感覺面冊愈反愈成 teh 反天公伯 ê 數簿，大冊(大慼)」我講。

「敢有遮爾仔嚴重」伊笑應。